Sunday, November 05, 2006

براح

من طاقة أضيق مالألم
شايف كناريا ضحكتك
شايف ملَك
شايف علم وردي تحييه السكك
ويدقله الطبل الشجر
وتنفخ البوق الرياح

من طاقة أوسع مالعجب
شايف جمالك ملتهب
شايف لهب
شايف دهب مصهور على كتفك غدير
شايف بيوت مالياها ضحكات الصغار
شايفك بتحكي للولاد عن القمر
شايف قمر عدا وسلم في الصباح

من طاقة أبعد مالبصر ومن البصيرة
شايف سفر في الدم فاتح جبهة الليل المخيم عالجزيرة
يا تعدي بحر من الشرر
يا تبقي طول عمرك أسيرة

الجنيات الشريرات بيولعوا الموج النبيل
والساحرين المكارين بيبدلوا ضحكك عويل
ويبدلوا ضحكك زئير
ويبدلوا ضحكك فحيح
ويحولوكي غابة مالرعب الصريح
صرخ الشجر ف جنون غريب
رفعت سيفي عالهروب
شاب الغروب
ووقفت ابص من الجدار
شفتك حصار
بيضيق على سجني العتيق
وبيتولد فيا الخضار

7 comments:

nour said...

الللله يا استاذ خالد..انت على نفس موجة المود اللى انا بكون فيه و ده بيخلينى مش عارفة اكتب حاجة لانى بحس انى كده بشكر فى نفسى
بس رقيقة اوى
و براح فعلا:)

الخبز و الحرية said...

ربنا يديم المعروف يا ستي:)

Anonymous said...

تحفه فنيه لا متناهية الروعه
سلسه وجميله وتدخل القلب والعقل بسرعه
وفكرتها جميله وصورها أجمل.. بتعيشنى الجو المتناقض الى انت دايما بتكتب من وحيه

^ H@fSS@^ said...

enta betgeeb elkalam dah mineen?
begad 7a2i2i ya3ni, eih elsour elgdeedah di?!!
what kind of images do u write about?? truely i havent seen such a new language before, wallahi, its totally new for me, havent seen something like this so far, u r not great, u r a genius..

regards

albida said...

انا متفقة معاكى يا حفصوصة.... فعلا أكتر حاجة بحبها فى كلام وشعر الأستاذ خالد هى تشبيهاته وصوره... فعلا عبقرية. بيحسسنى أنه متخرج من مدرسة الشعر قسم تشبيهات
:)

manal

^ H@fSS@^ said...

لا والله يا منولة خالد باشا افتتح قسم خاص بيه للشعر اسمه "ما لم يخطر على بال بشر لغاية دلوقتي" صح و لا ايه؟

الخبز و الحرية said...

أخجلتم تواضعنا:)