Thursday, November 30, 2006

حصار


أسد جريح
بيلف جوة المدينة
كلاب تهوهو عليه
يزأر كريح
تموء بعيد القطط
وترفرف العصافير
السد بين السد والثاني
وجنود بتضرب رعد
والناس بتترجاه
سلم مخالبك بقى
لا وعد للمجاريح
طب ليه بقى
في لحظة الموت الحقيقي بنتولد
وازاي ف نفس الرمشة ينقاد الفرح
وتنطفي فينا الحياة

إحكيلي

إحكيلي عن بكرة
إللي حيصبح حقيقة
سمرا وحلوة وبريئة
من بعد ما كان فكرة
جوة الفؤاد الدابل
وابقي ابعتي المرسال
يام العيون ساهية
ويا الحمام الزاجل
إحكيلي عن لون السنابل
يا نفحة هالّة على غيطان الملح
إديني بالفم الدوا
تترد من ثاني الحياة في القمح
إحكيلي يللا
إحكيلي عنك أكثر
طعم الكلام ما بين شفايفك سكر
إحكيلي عن شعرك بحور
إحكيلي عن لون السرور
عن حبنا المولود بيتكلم
حطي على جسمي الشهيد
خطي على عمري أثر
خلليني اخضّر في الحجر
إحكيلي عنك.. عن كلام القمر
عن ملحمة بكرة السعيد
الدنيا يرجع ليها صوت
وان كنت اموت .. يكفاني اموت فيكي
وان كنت اعيش .. أرجع واحبك موت

الكون كده



ضعيف ضعيف
زي الندى زي الحفيف
خفيف خفيف
طاير مدى
واليوم مخيف
مفيش مفيش
غير السباحة في الفضا
تعيش حاجات
وتموت حاجات
والكون كده

لازم اوصل مخبأي

من زمان وجهك غريب
والملامح مُشهرة ف وجه الجنون
والجسد كان أغنيات ليل الخريف
والتفاتك زي موال انفلت من فم عاشق للعيون
وانتباهك سكتة ف جدور العصب
وارتحالك كان حطب
وانتظارك ملتهب
واعترافي كان حريق
وف عيونك مية بريق
انما ودانك خشب

من زمان كتلة مشاعرك قنبلة
وانفجارك مرحلة متأجلة
واحتضانك كان حصار
وانت خافية خندقي
والنهارده نار بنار
لازم اوصل مخبأي
لازم اوصل مخبأي

صحبة ورد

اشفعلي عندك يا صديق
وولع الشمع اللي فاضل وافتكرني
وزيّت المصباح وفكر .. وافتكرلي
واشربلي كاس وياك وولع لي السيجارة
واكتب عن اللي كان شراع أصبح محارة
واحجزلي وياك تذكرة
وحط ورد على مكاني
بلدي وفل وبنفسج
انا كنت لمحة توهج
واتنتورت حبابيها
كلت ف لهفة بنيها
من كثر خَشْيِتْها
الدنيا حلم التملك
قادر وخشّيتها
تحاوزني لجلن أجيها
واما أدوخ وانهج
تديني أجمل ما فيها
بلدي وفل وبنفسج

Sunday, November 26, 2006

الأربعين

الأربعين مش سهلة خالص
مع انها مش خِطرة بالمرة
ديتها تفهم فين حدود المغامرة
وتقول لروحك من هنا ورايح
مابقيتش زيي زي عمن اول
وزي ما دفنت ايديك ورد الطفولة امبارح
استجمع الحبة اللي فاضلة من الشجاعة
وقول ف نن المرايا
قول بعلو الصموت وما يهزكش
سلام شبابي
أهلا بثلثي الأخير

شبه

شبه اكتئاب بعد الولادة
أو بعد سقط
شبه الوجع في الكبد
شبه اختناق النفس
شبه الكابوس الملازم
شيه البكا من غير سبب باين
شبه المهانة في البدن والروح
شبه الوداع الأخير

رومانية

روما حبيبتي رومانية
صدتني بالدرع الدهبي
كان صدرها سمكة وسمكة
نطوا بجنونهم في الشبكة
رشقتني بالحربة الحبشي
روما حبيبتي رومانية
خوذة يا روزا وسيف مرجان
قدمتلك راسي بحنان
أفديكي روما وأشكيكي
قلبي البدائي الإفريكي
أحمر ودائي ف أهوائي
أهواك حربا وسلاما
واسعى ف أرضك هيمانا
واسعة وميادينك مية
روما حبيبتي الرومانية
أم العيون الدحلابة
حرة وقاسية وغلابة
حاصرتني بالنار في الغابة
وولعت شعري سحابة
وسابتني كاهن من طيبة
على ثوبي الابيض مكتوبة
تغريبة تحبل تغريبة
وانا زي إيه ؟ زي القشة
عايمة ف بحيرة رومانية
واسكندرية الغرقانة
حاربت لآخر ضفايرها
قاومت لآخر جوز عشاق
سيف الروماني على الأعناق
والدم حانن فرعوني
غليت عروقي وشاط دمي
سحبت سيفي على روما
بيزقني مينا ورمسيس
كل الفراعنة ورايا تهيص
اثبت يا واد حارب يا عريس
مكتوب عليا أفوت خضرة
وألم ّ لحم كليوباتره
وادّيه بإيدي لأنطونيو
الوحش كان راقد يمّي
زي اليمامة المكسورة
إيه آخرة الحب الملعون ؟
إيه آخرة السفر التعبان ؟
روما حبيبتي ف أراضيكي
أرضيها ولا أرضيكي ؟
وازاي أحنن حواريكي ؟
وتولّفي عالنيل إمتى ؟

دمي ودمك عالمية
والنيل بحيرة رومانية

Wednesday, November 22, 2006

كلام مرسل 2 (متتالية من عدة حركات)

من قد إيه كنا هنا يا هل ترى..
والنيل بتنده ميته نهر الفرات؟
نفس الوشوش، نفس الكلام والمنظرة
نفس النفوس.. نفس الزكام.. نفس الحاجات
من قد ايه كنا هنا؟ أفلا ترى..
إن المظاهرة نصها أغوات؟
--------------

خمسين سنة مروا على سهوة
وكأنها والله ليلة امبارح!
أمة بحالها ملطعة ع القهوة
بتشد بودرة وتتحقن.. وتكافح
خمسين سنة يا مدمنة مش نزوة
آن الأوان يا أُمّة أن نتصارح
--------------
إديني إيدك يا أَمَة واتحملي
البتر واجب والمخدر مش كثير
حديكي سكة وانت وحدك كملي
يا توصلي، يا تموتي بس.. كما البعير
هاتي شفايفك.. غمضي واتأملي..
لحظة ميلادك مهما كان مر وعسير
أنا جاي اغني وبعدها ماشي
حزين كقط بدون ونيس واحد
كان طير وقلّع.. طار ولاجاشي
يا مين يقوللي فين أرى الجاحد
اللي بنيتله الغية والمراجيح
واللي قنيته من الشتا والخوف
أول ما رفرف.. دمعته تماسيح
خاين ولا عمره حيلقى وليف
إسمع كلامي وحطه في الحلمة
الدنيا شر اشترّ في العتمة
إسمع كلامي وقطعه تفاصيل
دون عياني.. دي الحكاية فصول
أول كلامي والحكا كان شيء
والوقت ده بقى شيء طالعله شيء
كتقول ده جسم وده في قلبه الجرح
أو قول جنين عايم في ماء السفح
كتقول رصاصة ماعادش فيها رجوع
كالفاس في راس، والشعر في الممنوع
عالم قذارته تنضرب أمثال
ومالكش فيه غير المناهدة والخناق
اسمع حكايتي وافهم الأشياء
وحدك حتقدر ع الجبال السود
أسلاك وعصي ومحرقة وجنود
واللُغْم حي والاحتمال موجود
موجود لوحده قبل كل وجود
الحق.. سحر العالم المفقود
من أصل نور فايض على الموجود
بيجود وأصله في الأساس الجود
الحق شق في عتمة الأكوان
واما حلم.. خرج الخيال إنسان
حيوان ملايكي وفي طبيعته اثنين
خطيت وشالت بطنها الأخين
والخاطي كان الاوّل أبو الاثنين
اسمع كلامي وقلّب في الكلام واختار
من بعد غيبة قليلة نذكر المختار
أسمع صلاتك معايا ع الحبيب الزين
بالحق مرسل وكام مرسل بآية حق
لو آه تداويني ماقولشي غير اللأ
انا جاي اغني وان لزم أصرخ
الظلم ليّس وشها ولطخ
وخلق تنابلة تحرسه بصواريخ
مالكينها م القلعة إلى المريخ
والحق باصص والفؤاد ممزوع
على نوع بياكل عضم نوع
والنوح بينشر في السما بلواه
والطير بيرجف.. يشتهي مثواه
وعيال جواعى وكل عيل تاه
والأب غايب والعذارى شيوخ
والصلب يومي والطوفان هدار
اسمع حكايتي وصبرك لآخر المشوار
اسمع حكايتك معايا واشحذ المنشار
انا جاي اغني ويدّي فيها سيف بتار
خمسين سنة.. ألفين سنة.. مليون
والظلم غامر وشه وحده الكون
وآياته هي الصبر والمسكنة
مهما احتملنا في القلوب النار
الوعد ينبض في العروق ويفور
والحق ساري في الجنين بيمور
والحمل يكبر والبطون بتثور
ييجي الوليد اجمل.. وبرضه شيطان
من نسل نار وحديد وغاز خنّاق
الدنيا لاينة للي شرعه خناق
للي بيزني بالقمر والروح
واللي بيسرق من جنابنا اللوح
واللي بيقتل في الحنايا الدوح
الأرض لانت للي عاش سفّاح
والظلم ورّث للي جابه سْفاح
لا شرع فيكي ووهمك الأفراح
خمسين سنة جايين على الكوكب
دم وحرايق -يا مغيث- تحجب..
وش الوداعة والغنا والفجر
حتشوف عيالك يابن آدم صخر
ده قلبه حجّر وده اتحجّر ف جثمانه
يأس السجين حيحشّ سجانه
حتى الذليل حيموت وفي اسنانه..
لحم الفتوة.. والعروق شلال
خمسين سنة ماحيسكت الزلزال
واللي علي.. حتنجسه الأوحال
والقتل يبقى عبادة يومية
القتل دون تفكير.. بحرية
القتل دون وجع الضمير والندم
والعدل بدراعك ماهوش بالحكم
خمسين سنة والدنيا تبقى تمام
الظلم يُظلم والقوي ينضام
والحب ييجي لما ييجي الحر
والحر ييجي للحياة في السر
في القلعة يرعى وتوصله العلامات
جبريل يرصع جبهته يآيات
ويمسكه بدل الحسام رشاش
ويمد يده ف صدره بالإنعاش
اصحى يا آدم معايا واذكر الموجود
موجود ف قلبك يا جاهل نور وماله حدود
وعشان يعود خللي الدما فرقان
يفرق ما بين الضبع والإنسان
خمسين سنة جاية راكبها شيطان
حلال جنونك والجموح مغفور
من بعدها تبقى المحبة سرور
انت الخليفة والخلافة غرور
والبطش واجب والعما مسعور
والعقل عاجز والضمير حيران
مالك دليل غير انتقام مبرور
ولا حد يورد جنته من غير دبيح
عهد المسيح راح وانقضى.. ومفيش مسيح
والحق يعلى والدما بتسيح
وحدك يا آدم والرسالة اتيسرت
حش الرقاب القتل شرعك والقانون
سيب الشفاعة ودمر المضمون
عالم بياكل من كرامته حزين
مخصي وطالب من حريمه العون
زمن الولادة يوماتي بيستحيل إجهاض
ييجي الجنين باصم على عمره
البيعة سابقة والشرف مرهون
ابنك من الرحم النزيف غرقان
عايم ف دمه والدنس فياض
متشال لموته اللحم في المرحاض
مستني ايه ياابن الزنا والغصب؟؟
لو كات دي عيشة جنتك أفران
ادبح دراعك لو دراعك خان
واتغصّ وارجع دي الحياة بتفوت
الرملة زاحفة وحول منا سكوت
مليون سنة نبني ف جبال الموت
الشرع غايب والشريعة الغاب
لاشيء سواها في الخليقة كتاب
ولحد إمتى؟؟ لكل عمر كتاب
العمر واحد والشرف أوحد
والقتل لازم والدما أمجد
دجل البراءة والخطأ أخلد
ملعون وضايع والوطن أبعد
والطيبة ذنب ورقتك أنكد
مليون سنة معرفش رايح فين
لو دي الحياة يبقى الدنس أسعد
الطلقة هي قدرتك يا لعين
خمسين سنة جايين عليك بالدم
الدم عهد العالم المخدوع
بالدم نحيا ويبعث التطهير
ومفيش وجود إلا ف بطنه العدم
يا تكون ضحية أو تكون بلطة
اختار وهات من آخر الأشياء
العمر واحد.. والشرف ينداق

Saturday, November 18, 2006

البنت قالت للولد

البنت قالت للولد
الحلم مش بيت من رمال
الحلم بحر وللأبد
قارب وقارب في ارتحال
البنت قالت للولد
الحب مش هو الحنين
الحب عصفر إتولد
لما التقت عصافير حنون
البنت بصت للولد
كان الولد شارد شريد
واما التفت كانت اختفت
واما نداها اتبسمت فوق في السما
واما سعى يوصل لها
همست وكانت في الوريد
نايمة بتحلم.. بالولد

بكرة العيد

كل عام وانتم بخير
كل طير ف حضن طيره
كل طفل ف حضن أهله
كل فرد ف حضن غيره
كل عام وانتم جميعا واللي غايبين والجميع
سعدا وأحرار جميعا لا فيه قهر ولا خضوع
الأعادي تصطلح
والقساوة تنجرح
والبيوت تبعت لبعض ف كل يوم دعوة فرح
كل عام وانتم جميعا معازيم واصحاب فرح
الاسمراني والابيضاني والاصفراني والاحمراني
هندي مسلم أو يهودي أو مسيحي أو ياباني
كل عام وانتم جميعا قلبكم صافي وودود
اللي يتعب يغتني
والغني عالناس يجود
كل عام وانتم جميعا طيبين
أرض واحدة رب واحد أجمعين
كل عام وانتم بخير
كل طير ف حضن طيره
كل طفل ف حضن ناسه
كل فرد ف دار جيرانه
كل شعب ف أرض غيره.. بالمحبة وكل خير
كل عام وانتم بخير

ثوب الحسين

معرفش ليه
حاسس كأني حتة من ثوب الحسين
وغطسوني ف بحر زيف
وادوني سيف
وقالولي حارب في العراء
إكليل وتاج ووسام شهيد
مية معركة
معرفش ليه.. معرفش فين.. معرفش مين
مية ألف إيد
تغزل سجاجيد كربلاء
دمي بساط الريح بيرسى عالبلاط
وامي تبيع الفجل في سنباط
وتكفن الأولاد وتطلع بالقرص
لا نبض لا غنوة مراكبية
على المحطة شاورتلي ياخيّ
شقيت هدوم العسكرية وجيت اطير
رعد القنابل في القلوب كان لسه حيّ
لاشيء هناك لا ضي لا عتمة لا نار
ولا انتظار
الوقت نط ف كِلْوِتي
صرخت والله وحشتني يا بوي
كان هو راخر حتة من ثوب الحسين
وغطسوه ف بحر اليمن
على سد مأرب كسروا دماغه الصعيدي
على المحطة شاورتله بإيدي
عمي الصغير كان يدوب
بيعض في كم الحسين
أما بلغ زفوه بحاله وماله في حطين
وعلى المحطة شاورتله بمنديل
كانوا المغول بيفتشوا بغداد
بيقلّبوها في خريطة النيل

Tuesday, November 14, 2006

ابتهال

يا رب يا ملك الرحمة
إديني من صبرك نفحة
الظلم قادر في العالم
والرحمة مالعالم شاحة
إديني عود أخضر نابت
وزمزمية وفول نابت
واطلقني في أرضك صابر
وعلى المرار افضل ثابت
إديني قوة تدفيني
وتحط لي في قلبي الفرحة
واصفح يا ربي عن ذنبي
لو كان لي ذنب ف غير نفسي
واللي عملته أنا ف نفسي
إشرح لي ليه كنت أسيره
واشرح لي صدري بألحانك
واديني من فنك حبة
واديني عالشّيْطان قدرة
واكسر له سيفه ومناخيره
واوهبني من عندك شابة
تفهم فؤادي وتعبيره
وتخرج الخوف من جسمي
وتملا بيتي بمحبة
طمعان كمان فيك انا أكثر
طمعان كما العود الأخضر
إرويني أكبر ف رحابك
وقلبي يسعى ف ركابك
وأواجه الظلم السافل
بإيدين بتقدر وتقاتل
حدّ الضرورة ما تحوجني
واسترني ورا مليون ساتر
إكشفني بس لأحبابي
واكشف لي خطة أعاديا
واديني بدل السيف مية
وقبلهم هاتلي شبابي
وكمان أنا طمعان ثاني
فيك يا رحيمي يا رحماني
تديني رحمة بمهزومي
واملك فؤاده محبوبي
ويكون لي بيت وسط بلادك
وعيال ما تورثشي عيوبي
وأموت وانا مرتاح جدا
إني بقيت أبّاً جداً
وسبت في الدنيا علامة
ويقولوا كان راجل جداً

فيه حاجة

فيه حاجة حاجز ما بيننا ربما الفستان
أحمر كحزمة ورود بلدي ف ضي الحان
أو ربما بدلتي السودا سواد الجان
فزعت بياض الملايكة عالملاية الروز
فيه حاجة حاجز.. ردائك ليه يا أخت عنيد؟
فيه ألف حاجز.. بهائك ليه يا أم بعيد؟
الكون يحاجز وعاجز يا حبيبتي أكيد
أرفع صوابعي تموت.. أنظر بلا تمييز

باب التاريخ

فتح التاريخ بابه الحديد
دخل صفوف حبة ألوف
وقفل ف وش ألوف الوف
تربس ف بابه ونام سعيد
خبطت لم فتح التاريخ ولا حتى أصحابي القدام
فكرت انام عالبسطة لما الكون يقيد
ويدخل الحراس كلامي للملك
لكنّ كهان الفلك
نصحوني أروّح
واما اقتنعت وجيت اروح
ملقيتشي مطرح
لميت خيوط الحلم بعد ما سبتها تفرد وتتلولو كثير
وطويت جناحي لينكسر فلقيتني في الوجدان كسير
وحبست عصفوري اللي طاير عالمخاطر والأذى
لكن لقيتني وراه بطير
وبحن يوم عن يوم لفم المصيدة
وبمد احلامي مدى
وافرد شراعي وافرضه
واحضن بحرية المصير

دنيا فانيا

أرثيكي يا اختي وأرثي نفسي فيكي
القطر قاشش مهجتي وعينيكي
من بعد ما تملي المكان بالضحك
ييجي الأوان علشان ما نبكي عليكي
آهٍ يا دنيا يا بنت دين الدين
طلعتي ديننا يا قاتلة المساكين
الشر ناشع من حيطان البيت
والوهم طل ف قبضته سكين
مجرم بريء أصل البعيد مجنون
بقى هو برضه ولا كون مكنون؟
مقفول كأنه قوقعة عالبحر
ولا ينفعكش الا السلاح مسنون
بارانويا هو ده زيي عنيف وعدواني
ما الدنيا هي اللي طالبة الزغد والتلطيش
مهما تحنن صدرها انساني
مهما تغندر دي بودرة وسايحة عالورنيش
عشرات قتيلة كل يوم قشاش
تقولشي مشهد فظيع والضرب أمريكي
الحلوة يبكي شبابها ف غرفة الإنعاش
والموت غبي وبيفتري فيكي
أرثيكي ياختي وانا تعبان.. تعبان.. تعبان
شايف كلامك على الترابيزة مع مختار
طارق وعزة وباين كات هناك عيشة
وطبق سوداني وضحكتك عيشة
شايفك بتاخدي الناس بحضن كبير
وبنغزة طعمة وابتسامة حرير
طفلة وأم الشلة في الشدة
تاخد وتدي تقوم خافف ومطمن
من بعد ما كنت خايف يعني تطمن
وف مرة إديتني الحساب قبلين
قلتلها مزنوق قالتلي عيب بقى اطمن
قلت لها اكتب إيصال قالت لي عيب بعدين
تحب شغلك معاها كأنها بلكونة
طالة على النيل النبيل.. تنظر وتطمن
فانيا الجميلة اللي كانت لعبة للأطفال
فانيا الرقيقة اللي كانت تعشق المكرونة
دلوقتي فاضت واختفت في الكون
يمكن تكون دلوقتي شايفانا
بتقول لنا أنا رايحة عدولي
وبكرة اعدي عليكم في باحة الجريون
أو افرد على النادي اليوناني في المسا جناحين
ابقوا اشربوا واضحكوا ومزولي واستنظفوا
ده انا عشت عمري نسمة هيمانة
بحلم معاكم وأكثر بالجمال والحب
ورصاصة في القلب فجأة والنفر بيطب
معلش حزعل اذا عيطتوا وحياتي
مش عاوزة أكثر من كلامكم عني
افتكروا صوتي وضحكي يا صاحباتي
وسلمولي على كل أرمنّي
واما يزغزغ ذكرياتكم فني
زوروني في الفيديو وفي الألبوم
شايفاكو لسه بقولكو اطمنوا
جياتي أكثر برضه من رايحاتي :)

Monday, November 13, 2006

سلام للرقابة

بلدنا ست البلاد عالعلم رافعة الأدب
إسمع غناها وشوف أفلامها تلقى الأدب
ماما الرقابة وبابا تجعل لغانا أدب
عارفة الحرام والعيب حافظة العلوم والأدب
بس الصراحة اللي راحة تنعد قلة أدب
لو حتى كنا صيع برضه الصياعة أدب
أجدع سلام للرقابة ومية مسا عالأدب

القلب ساير وحداني

القلب ساير وحداني
لا كاني خبط ولا ماني
عدت عليا القمورة
وسابتلي في المنديل صورة
يارب كلمة منصورة
وأعدي للبر الثاني
القلب ساير وحداني
لا كاني خبط ولا ماني
واما العدا شافني رماني
نزلت دنيا مخمورة
عدت عليا المطيورة
أم قلب أحمر رماني
فركت فؤادي بضحكتها
وفرقتني على احزاني
القلب ساير وحداني
لا كاني خبط ولا ماني
عدت عليا اللي سابتني
قوت القلوب المهجورة
فرشت حنانها وآوتني
ورمتني عالبر البحري
الموج بيحبي على صدري
وف آخر البحر جزيرة
يحرسها مالجان اتناشر
يلزملهم دقة سوداني
القلب ساير وحداني
لا كاني خبط ولا ماني
عدت عليا ام ضوافر
شدت فؤادي من الحافر
وكل ما تعافر اعافر
لما اتعصرنا ف بعضينا
واترد روحي لجثماني
القلب ساير وحداني
لا كاني خبط ولا ماني
عدت عليا المسحورة
بعتت رياحها الشريرة
قريت عليها ميت سورة
من البيان القرآني
فتحت عينيها المغرورة
صابني الكلام الشيطاني
القلب ساير وحداني
لا كاني خبط ولا ماني
القلب ساير وحداني
لا كاني خبط ولا ماني
عدت عليا الفلاحة
ولاقتني في الزمن الراحة
غدتني ضحكة مرتاحة
ونيمتني ف أحضاني
صحاني خولي بجريدة
وداني على أرض بعيدة
القلب ساير قدامي
مطاطي راسه أيتامي
يابا العدا خطفوا يمامي
وجيت ازورك ردوني
وادوني كحكة وزمارة
عدت عليا ام أمارة
والنفس حلوة وأمّارة
حليت ف عيني الغندورة
إديتها كحكة وزمارة
شدتني عالأوضة الضلما
ورتني عالم مملوكي
قامت ادنت كل ديوكي
حطت صباعها على الوحمة
قام انفتح باب الرحمة
وسامحني قلبه الرباني

للعمر

وانا برضه بحلم شملنا يتلم
وعد الضوافر عرشها في اللحم
وعروق إيديا اليابسين صارخة
اللابسين بردة ضنا وبهتان
المحبوسين بين كبرياء العضم
متسلسلين من وجدهم عطشان
مليون وريد في الإيد غنا وهذيان
السلسبيل حِبي ونقطة دم
تسري ف سري تنكشف أسرار
والبور حينطق يسمعه الصبار
ويعود تجلي العقل في الأشياء
لون الفواكه زهزه البستان
والدم لم المدبحة واتلم
أصبح جسد عائد من الميدان
راجع بظهره وراجعة دمعة بنت
تدخل عينيها تقول أنا ما نزلت
عصافير ف قلبي يا أمة الراجعين
لو كان لقلبي أجنحة ما يطير
يفضل يرفرف يمسح الطباشير
وتعود وشوش الناس على الأعناق
مرفوعة قول مليون علم ف عناق
أحلف بقلبي اللي ف حجم الكف
إني حصافح يومها كف العمر
واكتب بعيش علشان بميل ليها
وعشان ف قلبي ألف سر وسر

أسد جريح

أسد جريح ملهوش في الكون
غير الضوافر والأنياب
أشباله هربت من طوعه
ومقفلة ف وشه الأبواب
ماشي في غابة دحلابة
قرودها تقدر عالأفيال
شجرها حيات وأفاعي
وميّها فخ وأغلال
أسد جريح مضروب بالسهم
أسد جريح في الروح والجسم
الأنثى خانت والأشبال
شغالة في السيرك المنصوب
والنمر أنبل أعداؤه
بقى نجم سيما ف فيلم سكوب
ومن الزرافة للخرتيت
يتسولوا اللقمة ف إعلان
أسد جريح ملك الغابة
وماعادش ملكه في الإمكان
جريح جريح يزأر يزأر
تضحك عليه كلاب الغابة
والوحل ينفض تماسيحه
تعض ديله وتتغابى
وتحاصره خنازير وحشية
والكثرة شاطرة وغلابة
مايخلصوش من وسطيهم
إلا فؤاده الضرغامي
جريح جريح بس غضنفر
حامي على الكون المايع
أنا ليث ف جلدي ومسامي
مهما تجوني بأسامي
فأنا الأسامة المتكبر
أموت ولا أهرب مالساح
أنا الوغى وأنا الرمّاح
لبيك يا أمسي المشبوب
يا كبريائي المسلوبة
جريح جريح يزأر يزأر
الغابة تخفي خنازيرها
وتلم بومها وثعابينها
وكلابها تنده أسيادها
بمصفحاتها وجنازيرها
جايين على السبع المجروح
إكمنه بيسلم في الروح
أسد جريح مايحسوهشي
غير صقر زاهد في الصحرا
لما الأصيل حس حصاره
حس بشجن شعلل ناره
نزل بضوفره ومنقاره
وانضم للسبع المجروح
انضم شهم لشهم صحيح
بقى مش مهم الجيش والريح
وقف المناضل والقناص
والغابة ولعت ضرب رصاص
لكن وسبحان العاطي
سبعين لوا خيل برية
هوجة كرامة وحرية
لبيك يا ملك الأحرار
سبعين لوا سمعوا زئيرك
ومع وزيرك ذو المنقار
سبعين لوا سبعين إعصار
لبيك يا تاج القبة
ملعون أبو الخوف والرهبة
بص الأسد للخيل والصقر
وقالهم ميت ميت
ميت ومش عشمان في النصر
قالوله مين سمعك يا كبير
الموت بقى أحلى من العمر
الكون بقى شيء مايسرش
أتفه ما فيه بقى يتحرش
والموت جوارك بيشرف
نموت لكن مانعيشّي ف عش
نموت لكن ما نتحرفش
وقف الجيشين برة الغابة
في الناحية دي كل الغابة
ومعاها ناس ثانية ديابة
برصاص وألفين دبابة
والناحية دي وقفوا الأصحاب
سنوا المخالب والأنياب
لحس الأسد شق جراحه
زأر ورد عليه الخيل
والصقر قام زاعق في الليل
يا مرحبا بالموت واقف
زي الشجر زي النخلات
هجموا على جيش البهوات
جريوا الكلاب من قدامهم
سابوا البطولة لأسيادهم
جريوا الديابة والخنازير
والدبابات داست في الوحل
والدم يطبع عالجنازير
مافضلش إلا صهيل وزئير
حتى الرصاص ماعادشي خطير
والمعركة دارت دارت
بقت الوحوش في الوحل عجين
والناس من الدهشة اتدارت
ومن الذهول على أناملها
وقف الزناد وسط الحلقة
خرست نيرانها وقنابلها
العركة حطت أهوالها
والفجر داخل على مهله
الغابة خليت من ناسها
ومن الشجر كشفت راسها
وطلت الشمس الجاية
لقت المكان غرقان في الدم
وعبير جديد في الغابة اتشم
نسيم من الطينة والدم
ريحة كرامة وحرية

ملاحظة عابرة



الوجوه تزيد تضاؤل
والعيون تزيد انكسارا
الأنوف محطمة تتوارى
والقلوب تقاتل

الخيول الجريحة

أنا لا أسلم سيفي
لأن الذي سلم السيف قبلي تعرى بهِ
ولا أطلب الحكم العدل بيني وبين معاويةٍ
من سيغسل قلبه من ذنبهِ؟
فإن ترفعوا مصحفا فوق حربة
سأصرخ لعبة
وأضرب أضرب حتى يطير الكلام الجميل إلى ربهِ
معاويةٌ أم عليٌ؟؟ أجيبُ
أحب الخيول التي تتكاثر فيها الندوبُ
أحب الطريق التي ليس منها هروبُ
أنا لا أسلم سيفي
ولو كان في كبريائي الصليبُ
أحب الخيول التي استشهدت في الغروبِ
وأهوى النساء التي حاصرتها الحروبُ

إنشاد

هذي أناشيدي الأخيرة ربما
أنجو بها أو ربما سأموتُ
هذا خلاص الروح أكشف مهجتي
كي لا يحس الغربة التابوتُ
الباب ثقب والعناكب في دمي
بيني وبيني وحشة وسكوتُ
الآن أشدو كي أطل على فمي
يرتج في زبد الردى ويفوتُ
فلقد يمر من النشيد يمامةً
ولقد يموت بصمته .. وأموتُ

هامش



من هذا الهامش من أعلى لحظات الضعف
يزحف شعري جيشا من نمل في عرش الأمس
من هذا الهمس
تتولد إيقاعات الزمن القادم
من هذا الركن الناعم
أشحذ نصل السيف
وأبايع نفسي

رؤيا (من ديوان نبي بلا أتباع 1995)

أحلم أني لم آت بعد
أحلم أني بعد جنين في رحم الفكرة
أحلم أن هنالك موسيقات تعزف لحن الخلد
وإلهي يمنحني صدره
لم أكفر بك
إذ أنك لم تؤمن بي يوماً
أبداَ أبداً
لم أكفر بك
إذ أنك تستعبدني حتى آخر قطرة كفر فيا
لم أكفر بك
إذ أنك لا تأبه بي
أبداً أبداَ
إطلاقا !!
لست شقيا أو مسرورا
إطلاقا.. إطلاقا
مشكلتي أكبر من هذين
مشكلتي أني لست هناك
إطلاقا..إطلاقا
من عينيك نزلت
فلماذا لا تبصرني الآن؟
من شفتيك نُطِقت
فلماذا لا تسمعني اليوم؟
(ولماذا لا تنقذني الآن من الصمم المعتم؟)
من قلبك كنت فكان الحب وفاضت أنهار الأحزان
فلماذا تقتلني الآن؟؟
أحلم أني لم آت بعد
أحلم أني بعد جنين في رحم الفكرة
أحلم أن هنالك موسيقات تعزف لحن الخلد
وإلهي يمنحني صدره

هي الروح

هي الروح من أمر روح سواها
كل روح لها بهجة في سنابل أخرى
حصادهما النبض والاشتهاء
هي وردة إذ تحنّ
هي شمعة في سريرتك المطمئنة..فيض من العري والجوع والاكتفاء
فالتحف بالتي هي أدفأ واشبع إذا شبع الفقراء
إنهم أنت.. فانظر إليك بهم.. وانفرج صوبهم
كما يفتح الزهر مهجته للهواء
علهم يغسلونك من موتك الشبحيّ ومن خوفك الهمجيّ
ومن ضعفك الشبقيّ ومن وهمك الأزليّ ومن بصمات الدماء

Sunday, November 05, 2006

افتتاحية


بالخط الاخضر بفتتح كراسي
ورق الشجر زاده وزوادي
وارسم عيونك ترتفع راسي
كما نخلة وارفة ف حضنك النادي

الحب آه قاتله الله!

"الحب آه قاتله الله"
في الحي كان راجل مهووس
ف إيد علم والتانية فانوس
داير يدق على الأبواب
وفي الحيطان ينطح راسه
كام باب عليه دمه العناب؟
مين ينسى شكله وأجراسه؟
"الحب آه قاتله الله"
رجعت حبيبتي من البستان
رجعت حبيبتي كراميللا
ف شعرها وردة وفلة
وف إيدها روحي وأشجاني
وقعدنا فين ريح الشجرة
اديتني لقمة وسقاية
وحكيتلي عن جوة البستان
سبحان من اللي من بذرة
بينبّت النخل الوارف
زي ابن آدم ما هو عارف
الحي من حي بيخرج
حتى السمك ساب المية
ايه الحياة؟ سألت هي
الأرض والبطن الحبلى
شجر شجر على بحر النيل
وعيال بترمح عالسكة
موسم حصاد لبست طرحة
ولبست أبيض وشبيكة
شبعت بلدنا بأفراحها
عاوزين نعيش مع بعضينا
ولا نفترق عن بعضينا
ويكون لنا من بعضينا
بنت وولد شبهي وشبهك
مدي ف حياتي أوصالك
مالك مابترديش مالك؟؟
حاضنك لكن باردة ف حضني
لا حاضنة بنتي ولا إبني
الحب آه آه آه
الحب آه قاتله الله !!

عشر حاجات

عشر زهور راحت مني
وفي البوكيه فاضل واحدة
دبلانة تبكي من الوحدة
عشر طيور طارت مني
وفي الفرنده فاضل واحدة
بردانة مالخوف والوحدة
عشر سنين عدت مني
عشر سنين خمرة وحريم
لما الحرملك ضاق مني
سن الجنون ده من سني
والقصر من جند لوزرا
واقفين على بابي الفيروز
وعجوز أرسطو بيسقيني
الحكمة مالدنيا بالكوز
وف حضني مهرة يونانية
بديها من لحمي الجملي
وقاعد لنا مايكل أنجلو
على السرير يرسم فينا
كندوز بيطحن ف بتلو
ناكل صوابعه ونحتله
وموزار على الكنبة التركي
بيشد في اللاي السحري
ويقوللي كونشرتو الأحزان
عشر جياد هربت مني
عربي وحرة ومختومة
بالنار وبلجامي الدهبي
ونزار بينزف أشعاره
على المخدة يسيل دمي
وسمعت موتي من الشباك
شعبي بيصرخ آه يا سبعي
وصحيت لقيت جثة ف حضني
عشر سيوف رشقت فيها
ومؤامرة في القصر بتعوي
حتى الجواري بالسكاكين
طالعين على العرش المسكين
عشر سنين شايلين أعلام
بونابرت نط ورا سريري
الثورة قايمة من الحمام
والدم كان ماشي لقدام
ثعبان ومتثبت طيري
وتتار بتكسر مناخيري
وتشد بغداد من تحتي
حتى الجواري الأندلسي
سرقتني ف سلاحي وفرسي
وسقطوا الداية اليمني
بيقولوا كات حامل مني
فين الأمين فين المأمون؟؟
فين هم أولادي الملاعين؟
عشر عيال ماتت مني
اللي اتطحن تحت بلاطي
واللي خنقته بملاياتي
واللي دفنته ف لحم امه
عشر عيال شردت مني
والغابة واسعة وغريبة
وان جزتها ألقى الصحرا
وان دستها بحر هيولي
وقراصنة حمر يبصولي
عشر حروب كسرت صيتي
كل الشعوب دخلت بيتي
تشرب وتزني على موتي
وحاولت اقوم مالقيت جسمي
نايم عجوز بين الشبان
عريان ومتقادة الحفلة
عشر شموع تضوي ضلوعي
وتحرق الشعر الشايب
واما المسيح حاول ينطق
صلبوه على باب الأوضة
مفيش نبي يتشفعلي
إلا ويدوله بالكوع
سحبوني من تاجي وشعري
ورموني قدام المأمور
يوناني طمعان ف هدومي
وروماني يورث ف حريمي
غجري ويهودي وأعرابي
بيسنوا نابهم على بابي
بارمين شنابهم عثمانلي
ووقفت احارب في العالم
وحدي كسبع ملوش صاحب
عشر جيوش حاصرت جسمي
وجابوني من ديلي المعقود
آسف على السم الهاري
آسف على بحر الأحزان
القلب صار حتة لحمة
مصلوبة على فرعين من زان
انا مش أنا وانا زي زمان
مستنظر الحب التايه
وبحب شيء مش في الإمكان

ونفسي اضمك سنة عالمئذنة الميري
واذيع بيان الهوى عالشعب يا طيري
ولما يطلع لنا الدراويش اقول طيري
يصلبني شيخ البلد عالمئذنة..وأطير:)

رسالة

مالكش حق تعيش يا واد
لو كنت محروم مالألم
وان لم يمس الحزن قلبك لم تكون إلا عدم
وان رق قلبك ولا لان ولا انقسم
تبقى صحيح يا واد بشر
وان هشّ عودك وانكسر
تبقى بديت تحبي وتحب
ده الكون ده كله كان محب بدون حبيب..حتى انفجر
وجريت يا واد في الأرض سابقت الشجر
وحاربت كل الموجودات
وحاربت كل الموجودين
الحزن دين
وانت اللي لازم تحمله
ومالكش حق انك تقدم الاستقالة
ومالكش قلب تعود ماوصلتش رسالة
الكون غرام..وانت اللي هايم في الألم
إن دق قلبك وابتسم
تبقى بقيت يا واد رجال
قادر قدارة على الفرس وعلى العيال
الكون غرام
والنفس لانت للجام
وانت اللي لازم يا ولد تضرب جرس
وتصحي كل الموجودات
وتصحي كل الموجودين
ماتخافش من لحظة فرح
ماتخافش من هفوة أنين
وان زقزقت أمة كناريا ف مهجتك ولا بكت
تبقى بقيت يا واد عجوز
تبقى استويت زي النخيل
زي العنب..زي السنين
ويبقى يابني حلال عليك
ترجع وتحلم باللعَب:)

براح

من طاقة أضيق مالألم
شايف كناريا ضحكتك
شايف ملَك
شايف علم وردي تحييه السكك
ويدقله الطبل الشجر
وتنفخ البوق الرياح

من طاقة أوسع مالعجب
شايف جمالك ملتهب
شايف لهب
شايف دهب مصهور على كتفك غدير
شايف بيوت مالياها ضحكات الصغار
شايفك بتحكي للولاد عن القمر
شايف قمر عدا وسلم في الصباح

من طاقة أبعد مالبصر ومن البصيرة
شايف سفر في الدم فاتح جبهة الليل المخيم عالجزيرة
يا تعدي بحر من الشرر
يا تبقي طول عمرك أسيرة

الجنيات الشريرات بيولعوا الموج النبيل
والساحرين المكارين بيبدلوا ضحكك عويل
ويبدلوا ضحكك زئير
ويبدلوا ضحكك فحيح
ويحولوكي غابة مالرعب الصريح
صرخ الشجر ف جنون غريب
رفعت سيفي عالهروب
شاب الغروب
ووقفت ابص من الجدار
شفتك حصار
بيضيق على سجني العتيق
وبيتولد فيا الخضار

كلام النفس


الكدب قال للصدق انا سلمت
آدي رايتي اهه سامح منيش كداب
ومد إيده ما مدهاش الصدق
قام باس صباعه وابتسم بعتاب
وهز كتفه وحب فوق راسه
والصدق كان ساكت كأنه كتاب
بلسان غريب كتبوه زمان الناس
وسابوه غريب ف بلاد بلا أحباب
ومين يا عين يقرا كلام النفس
ان كانش يفتح للمحبة الباب؟؟

الجزارين

الجزارين.. لهم برضه قلب
وبيعيشوا برضه ف قلب القطيع
وبينادوا برضه لو اتقيدوا
وبرضه بياكلهم سواهم من الكائنات
وبيقولوا لما يضيع الدبيح..عليه العوض
وبيموتوا لما يجيلهم أوان
الجزارين..لهم برضه قلب
ويبدو ان كل اللي في الكون بينبض وبيدق قلبه
عدا الكون لوحده..مالوش أي قلب

Wednesday, November 01, 2006

كل هؤلاء


حين أرى أولئك الذين يحبونني بحق
أفكر أحيانا أني تجاوزت الحدود كلها
وأنني قفزت سور الغرور إلى أرض الكراهية

حين أرى أولئك الذين لم يزالوا طيبين
أنظر للدنس الذي يحيطني من يسار ويمين
وأشعر أنني أريد البكاء كطفل في الرابعة
كل هؤلاء طاهرون مثل أمي
وصادقون مثلما أرادني أبي
ليس لهم مثل أختي غير وجه واحد لا غير
كل هؤلاء لم يوقعوا في دفتر الشيطان
يواجهون الله كل يوم ببساطة وعشم
كل هؤلاء ليس لهم كوابيس ولا وساوس
ليس لهم غل أو أحقاد أو هلاوس
كل هؤلاء يعبرون نفس الجسر المتآكل كل يوم
ويمشون في ثقة غامضة في اتجاه الحياة

النهوض الذي أحلم به

النهوض الذي أحلم الآن به
ليس مثله في الوجود شيء ما
ليس مثله تفتح البراعم الضاحكة
ولا الحمام في زرقة الفجر يرفرف
ليس مثله احتراق البحر في الظهيرة
ولا الزلزال في انتفاضه المكابر
النهوض الذي صرت أحلم به
ليس كأيام الخلق الستة أو يوم يبعثون
النهوض الذي أحلم الآن به
كون يزيح كونا طائشا بلا هدى
متمددا على أنقاضه المنكسة الحزينة

لست سعيدا هكذا

لا لست سعيدا هكذا
بعيدا ووحيدا في سعادة كاذبة
حرية وهمية وقصور في الفراغ
جبال من لا شيء وفضاء من عدم
نساء بلا وجوه وفرص هامشية
ثقوب معتمة في كبد السماء
وعكس خطوتي تمضي أعذب الأشياء

لا لست سعيدا هكذا
وليس هذا من أردت أن أكون
هائما على وجهه الهمجي يرحل في أراض شتائية
يحدها مربع الجنون
ليس هذا الصراخ ولا هذا الغموض في العيون
ليس هذا –طبعا- من أردت أن أكون

الشعر هاجرني كأنني معشوقة خائنة
والفن ينفضني كأنني جرب على جسمه المطهر
المال ينفر من وجودي
والأغنياء لا يهوون سلعتي
يستنكفون عطرها الدنس
وهؤلاء الذين كانوا أعظم تضحياتي
هؤلاء الفقراء الأنبياء والرسالة
هؤلاء الذين أحببتهم –ربما وحدهم- بحق
لا يفهمون ماذا يفعل الغبي بحياته المهدرة

النساء البديعة يأخذهن العتاة
والنساء المريضة هن نصيبي
كأنما العالم قسموه مرة وللأبد
كأن المجد كله محجوز لسواي
كأنني الوحيد الذي تجرأ وتخطى
وتمطى فتنبا
وامتلأ فأدلى
وارتحل فأقصى
وتملى فاستعلى
كأنني الوحيد الذي شذ هكذا
لا لست سعيدا قطعا هكذا

هل أنام الآن نومة الأبد؟
هل أصير ذاكرة أم لا أحد؟
ربما يبكيني أحد ما وربما لا أحد
أحدٌ أحد
مستوحد أنا في المولد واللحد
على وحدتي أبعث وعلى حزني الغائر
بئري التي جفت وصراخي فيها عبث
معطلة أعضائي.. مؤقت موتي أم حياتي المؤقتة؟
مؤرقة صامتة
مورقة كانت أصبحت يابسة
أكل البحر حدود اليابسة
يغرق الصفصاف والنخل تباعا
وحين يمسي العالم فخا والحقيقة عطنة
يصبح الرجال قنافذ والنساء عناكب

من هو؟

من هو الشيطان؟
إنه استبداد الجسد
شهوة الجنس التي لا تعرف كلا
النهم الحر المتوحش
وعبادة العضلات

من هو الجحيم؟
إنه وهن المرض
فاتورة الحساب التي يقدمها اللحم
من مصرف الأخلاق المفلس
إنه الندم المتدفق كالنزيف
كنتوء همجي في جبين الحضارة

من هو النعيم؟
هو اللذة التي لا تنقضي
والتي لا يتبعها الألم دائما
كظلال غامضة مرعبة

لابد من


لابد من حركة مباغتة
أراوغ الجميع بها
آخذهم في اتجاه ما
ثم كسهم ناري أطير
في اتجاه معاكس تماما

لابد من حركة مباغتة خطيرة
أكاد أكسر فيها عنقي
أكاد أخسر فيها حياتي القصيرة

لابد من حركة مباغتة بارعة
ألم بها كرامتي المنثورة
وأرد بها للحياة الصفعة

من أين يأكل الشعراء؟

من أين يأكل الشعراء يا ترى؟
من ذا الذي يدفع ثمن القهوة والسجائر
والتجارب الماجنة؟
من ذا يمول القصائد الفصيحة والتجارب الساخنة؟
ومن الذي يتبنى امتلاء البوق بالطنطنة؟
من أين يأكل الشعراء ويحتسون الخمر؟
ومن يا ترى يستهلك البضاعة الكاسدة؟
يتحدثون عن جموع لا تعرفهم
يخوضون في قصص لا تندمل
يكسرون الإيقاع ولا يأتون بالبديل
يرفضون أنفسهم كالكلاب الخارجة من النهر
يذوبون في فصام جماعي رائع
كانتحار الغزلان في بحيرة التماسيح
يمارسون الكلمات كأنها العادة السرية الأبدية
يجرحون أنفسهم ويستعذبون الحمى والسهر
يحررون روشتة العلاج دون أن يشخصوا المرض
يتحدثون للقتيل في اعتراف الآثم للقس
أو الاكتئابي للمعالج النفسي
ويدخلون في معارك وهمية طاحنة
يفقدون فيها الكرامة الباقية والرؤى الملونة
يغافلون الممرضين ويقطعون شرايينهم
متطهرين في غيبوبة داكنة

من أين يأكل الشعراء يا ترى؟
ومن المسكين الذي يدفع الثمن؟؟

ضلالة

ضلالة من بطن ضلالة
يومياتي تنسجها الأيام
أحلام ليس لها أب شرعيّ
ورؤى جميلة محتالة

كأنما الوجود كله ما كان يكفيني
سعيت في الحياة طائشا جسورا
بنيت للجسم محارة وللروح سورا
وانكببت على شيء واحد يعنيني

لذتي ألعقها من جير الحوائط
ذكراي مشوهة مشوشة أشعاري
جثتي أحمل.. كفني باهت

ضلالة من بطن ضلالة
تنمو أشجار البلوط والزان
غابة من الصمغ تبتلعني
تكفيرا عن ذنب.. لم أعد أذكره

حلم



أريد جسما خارقا
وروحا لا نهائية
أريد حبا غاضبا
يدك في جوانحي السلبية
أريد طفلا وبحرا صغيرا
وانتشارا في الكون
وسحر الأبدية
أريد شيئا طاهرا
فيه رائحة الرضيع
فيه هلوسة تتحقق
وتمدد في الأبجدية
كنت في البداية أكتب شعرا ساذجا
ولكنني كنت سعيدا بطفولتهِ
ثم صرت أكتب شعرا مكررا
ولكنني كنت سعيدا ببداوتهِ
ثم أصبحت أكتب شعرا رديئا
ولكنني كنت سعيدا ببساطته
ثم تعلمت أن أكتب شعرا مقعرا
ووقتها كنت سعيدا بسخافته
ثم فجأة توقفت ونظرت للوراء
ثم تلفت مليا شاخصا بالأمام
لم أجد نفسي سعيدا ولم أجد
ورقة واحدة من كتاب الشعر
على الإنسان دائما أن يفعل شيئا
كي يطرد البرودة من أوصاله الضعيفة
عليه أن يحرك أعضاءه دائما
ويجرب العضلات التي خدرها الزمن
على الإنسان أن يحاول الخروج من بحره الطينيّ
وأن يقاوم الخضوع للرمال الناعمة

ليس كافيا أن يكون المرء طيبا وعطوفا
ليس كافيا
أن يكون المرء امرءا لطيفا
لا ليس كافيا مطلقا
أن يعيش المرء في سلام مع الحياة
لابد من أن يفعل شيئا ولو صغيرا
كي تقدر الحياة بعدها بأسه العظيم
وكي يرحل الشر بعيدا عن شره المقيم

على الإنسان منا أن يفعل شيئا دائما
كي يثبّت في الأرض حقه ورايته
وكي يرفع في الأرض صوته وقبضته
عليه أن يضرب الحليب بذراعيه بقوة
كي يصنع القشدة التي يستريح عليها