Saturday, November 18, 2006

بكرة العيد

كل عام وانتم بخير
كل طير ف حضن طيره
كل طفل ف حضن أهله
كل فرد ف حضن غيره
كل عام وانتم جميعا واللي غايبين والجميع
سعدا وأحرار جميعا لا فيه قهر ولا خضوع
الأعادي تصطلح
والقساوة تنجرح
والبيوت تبعت لبعض ف كل يوم دعوة فرح
كل عام وانتم جميعا معازيم واصحاب فرح
الاسمراني والابيضاني والاصفراني والاحمراني
هندي مسلم أو يهودي أو مسيحي أو ياباني
كل عام وانتم جميعا قلبكم صافي وودود
اللي يتعب يغتني
والغني عالناس يجود
كل عام وانتم جميعا طيبين
أرض واحدة رب واحد أجمعين
كل عام وانتم بخير
كل طير ف حضن طيره
كل طفل ف حضن ناسه
كل فرد ف دار جيرانه
كل شعب ف أرض غيره.. بالمحبة وكل خير
كل عام وانتم بخير

20 comments:

Lily said...

Emta yeegy el3eed dah:)

Fe3lan ya ostaz khaled , yom ma nensa elfor2 elly bena fel loon wel deen wel asl...howa da fe3lan yoom el3eed el7a2ee2y

وينكى said...

الله
كل لحظه وحضرتك طيب
فى الأول كنت فاكره ان القصيده هاتقلب بنكد فى الآخر.. سورى
لأنى اتعودت على المود دا فى القصايد
بس بجد حلوه الصور دى قوى
كل طير فى حضن طيره
وتنوع البشر وأديانهم.. وحلم السلام المطلق
حتى لو اليوم دا ماجاش.. فالأمل فى تحققه حلو

Rana K S A said...

wow.. i like that faithful pure side of humans.. it makes them closer to angels :)

Anonymous said...

وحضرتك بصحة وسلامة... ياريت والله يا أستاذ خالد كل ده يتحقق

أكيد هيجى العيد ده أن شاء الله

وينكى عندها حق... أنا مع كل سطر بقرأه كنت مستنية الوقت اللى العيد هيقلب فيه لنكد... بس الحمدلله مطلعش فى حاجة كده
:)

manal

Mariam Mekiwi said...

I can't wait to witness that day when we go beyond tolerance and there are no limits anymore. This day would certainly be a feast. But do you really a day like that could ever come? it's a more or less utopian thought, because if you think about it, you see that all the classifications are seperating the human beings like moslem messei7i yahoudi yabany almani roussi.... if we just forget all that and think of ourselves as humans!!!! Utopia right :-) ?

Anonymous said...

تفتكر بقى يا أستاذ خالد ده عيد ايه ؟
أكيد عيد التحرير
بس عارف أنا خايفة من ايه
احسن ساعتها الحكومة تعمله أجازة رسمى
أصل احنا شعب بيهيص

الاحساس حلو قوى و بيعبر عن معانى بسيطة جدا و طبيعية جدا مع وخزة ألم لاننا رغم سلاستها مفتقدينها

أكتر جزء عجبنى اللى فيه
الغنى و الفقير
و الجزء اللى فيه
كل طير فى حضن غيره


بس عندى تعليق أدبى سيادتك

كل عام وانتم جميعا واللي غايبين والجميع
سعدا وأحرار جميعا لا فيه قهر ولا خضوع

الموسيقى هنا مش مظبوطة خالص
والوزن مكسور
انا عارفة ان ممكن تكون بتكتب تعبيرا عن احساس مش أكتر بس حبيت أقول اللى حسيته

عندى ملحوظة كمان

كل شعب ف أرض غيره.. بالمحبة وكل خير

علشان انت بس عارف الناس هنا وحشين و أشرار هتلاقيهم سابو مقطع بالمحبة و كل خير و تلاقيهم قالولك ده بيقول كل شعب فى أرض غيره ده مع الاحتلال
بس عموما انت لحقت نفسك واحنا شهود معاك فى أى وقت


يادى الخيبة برضة برغى
سورى هى عادتى و للا هشتريها


عموما احنا فى انتظار العيد
اللى مش هييجى غير بايدينا و اصرارنا مع توفيق ربنا قبل كل شئ طبعا


yasmin

Anonymous said...

حسستني يا خالد اني بقرا امنية من غير كلمته "اتمني" او "نفسي في..." . وفي نفس الوقت حاسه بسخرية و زفرة الم. فكرتني باغنية ايمن بهجت قمر" دي لا باظت ولا خربت". امنيه ساخرة لوضع رائع للاسف هو نقيض الموجود حاليا.

khalakhelo said...

بكرة ؟
العيد ده مش هييجي أشاساً

عشان محبطكوش أحدد فترة زمنية
مش خلال وجود البشر على الأرض

Anonymous said...

So hopeful, may be (too) hopeful!!!

KHALED-ELSAWY said...

ليلي حييجي اليوم ده اكيد لا تقلقي:)
وينكي ضحكت جدا لما قلتي انك خفت الموود يقلب نكد كما عودتك:) طب اعمل ايه يا جماعة الدنيا دخلت معايا ماتش طويل وعنيف.. بس الحمد لله شفت لحظات جميلة قوي برضه:)
رنا ما احنا برضه والله جوانا ملايكة كمان مش شياطين بس:)
انت كمان يا منال قلقتي لتقلب نكد ؟:) ده انا معكنن عليكم بقى :)

مريم مش يوتوبيا خالص مش مدينة فاضلة من صنع الخيال فقط.. لما بسرح في تاريخ البشر بلاقي لحظات كنا بنقتل بعض عالمكشوف..وقنناه بعد كده.. كنا بنشتري ونبيع بعض حرفيا ولغيناه بعدها وهكذا .. الشر اللي في الارض دلوقتي من وجهة نظري مصدره واضح وممكن تجنبه بازالة جذوره.. الطمع والأنانية والقسوة ليهم في تقديري سبب بيكرسهم زي ما بيكرس الجريمة والمجاعة وتدمير البيئة.. نظام عالمي كامل بيأكد القذارة لأنه مبني على ان الاقلية هي اللي يملك وتحكم بالتالي.. يوم ما نشيل النظام ده ونحل محله نظام انساني بجد.. نظام عادل وحر وقايم تعمله الاغلبية بايدها وعبر سلسلة من الكفاحات المستمرة.. حيتغير العالم زي ما اتغير قبل كده من العبودية للاقطاع ومن الاقطاع للرأسمالية.. 3 نظم قايمة على تسلط الاقلية.. نشيل طريقة بناء المجتمعات دي حنشيل اسس الشر المعاصرة.. ده رأيي وده طبعا حيشوفه البعض يوتوبيا:) بس لا والله انا مش شايف كده.. انا متفائل جدا رغم ازدياد التوحش عارفة ليه؟ لأنه توحش الاقلية اساسا واي توحش مضاد من الجماهير بييجي كرد فعل.. وده معناه اننا لو صنعنا شروط افضل حنحصد دنيا افضل.. نقضي على امكانية الفعل فمش حنشوف رد الفعل.
انا حرة انت مركزة قوي مع الموسيقى الظاهرية ده انا لاحظته في تعليقات سابقة.. حقك طبعا.. بس مش واجب عليا.. بمعنى ان حقك تدوري على الموسيقى الظاهرية وحقي اكسرها احيانا.. ومع ذلك المثال اللي ضربتيه محتاج تراجعيه تاني وتوزني على "فاعلاتن".. فيه تخفف في "سعدا" وفيه اضغام في "لا فيه" ده لو عاوزة تقريها بالمللي بس حتبقي جريتيني لموضوع مش بحبه قوي يعني انما ماشي انت برضه صاحبة بلوج واي خدمة:)
ايمي مش مشكلة الحقايق بتبدأ بأحلام.. البللورة السحرية بقت الديش والنت.. القمر رحناه.. الفيروس بنقاتله رغم انه مش مرئي اصلا.. يعني.. فيه امل.

خلاخيلو كلام غير علمي لأنه مصادرة على المستقبل مع ان خط التقدم البشري لأعلى.. المشكلة اننا بنعاير الجماهير اللي هي الاغلبية بدنس الاقلية الظالمة الجشعة.. مثال.. ممكن تقول البشرية بتنهار عشان بنخرب البيئة.. مين بيخرب البيئة؟ انا وانت ولا شركات السلاح والتفجيرات النووية وقطع الاخشاب بهدف الربح؟؟ ممكن نتشاءم عشان القتل بيزيد.. مين بيقتل؟ منال ووينكي وايمي وليلي ولا جيوش العولمة الرأسمالية القذرة واجهزة امن النظم لا الشعوب؟؟ من زاويتي شايف امل عظيم في البشر بشرط وحيد هو القضاء اولا على مصدر شرور الارض.. العولمة الرأسمالية.. واقتراح وتنفيذ مشروع بديل هو الأممية الاشتراكية مش على طريقة اوروبا الشرقية والصين أكيد.. لا بطريقة تخللي المواليد ييجوا لعالم حنين تتجاور فيه اذواق وانماط ومعتقدات البشر بشكل هارموني مش متنافر وده ممكن يحصل طبعا مش بتشوف توحد مجموعة من البشر احيانا على شيء نزيه ونبيل؟ لما الصراع يبقى تنافس حر وشريف في صالح المجموع حتختفي امراض البشرية الحالية ويبدأ التاريخ الانساني الحقيقي. انا بشوف البشرية يدوب بتخرج من مرحلة المراهقة.. حتهبل شوية وبعدين حتركز لأن البديل التاني مخيف او على الاصح بديلان كلاهما كارثي.. العيش في عالم موحد على الظلم او الانفجار الهمجي وربما تدمير الكوكب.
ريمي اعتقد في كلامي السابق رد على تعليقك.

Anonymous said...
This comment has been removed by a blog administrator.
Khaled Khalil said...

ماشي, قول 4% من البش هما السبب في تخريب البيئة, و زيهم السبب في الحروب الكبيرة, لكن طول ما هما دول اللي حاكمين البشرية, أو نقول مالكين العالم يبقى الدنيا بايظة
موضوع الأممية الاشتراكية ده مش قادر أحطه في شكل مظبوط في دماغي, يعني مبدأياً نقدر نقول ان مش ممكن تحصل ثورة شاملة في كل البلاد في نفس الوقت, يعني لو عملنا دولة العالم العادل الحر, و طبيعي جداً تبقى دولة اشتراكية تحترم الليبرالية عشان تبقى عادلة و تدي لمواطنيها الحرية, طب انتا في دولة اشتراكية هتدعم كل حاجة عشان كل الناس يقدروا يتمتعوا بنفس الحظ من السلع و الخدمات, و ده طبعاً هيجذب مواطنين من بقية دول العالم, طب نسمحلهم ييجوا ولا لأ, لو سمحنالهم و ادنالهم نفس الدعم أي تنمية هتواجه زيادة مطردة في الاستهلاك, زيادة غير متوقعة, ده غير ان سكان البلاد الأصليين (اللي قامت فيها الدولة الجديدة) هيحسوا إن الباقيين متطفلين جايين ياكلو أكلهم, زي غير الروس في الاتحاد السوفيتي(رغم إنهم مواطنين في دول من الإتحاد) أو المهاجرين المصريين في العراق سنة 90 لما خلصت الحرب و العراقيين لقوا المصريين أخدو شغلهم و حصلت فيها مجازر
لو الدولة قفلت الباب في وش المهاجرين, زي الستار الحديدي, أو اقتصرت الدعم على المواطنين زي الصين و كوبا, هيبقى عمل غير أخلاقي لأنهم بشر زيهم زي المواطنين الأصليين و لهم نفس الحق في حياة عادلة
أنا شايف إنها متجيش غير ثورة شاملة في العالم كله و ده طبعاً مش هيحصل لأن ربع البشر مدجنين و ربع مرهوبين و ربع مدجنين و مرهوبين في نفس الوقت
يعني في النهاية أنا للأسف بتفق مع خلاخلو لأول و آخر مرة, العيد مش بكرة

KHALED-ELSAWY said...

عزيزي الثورة العالمية لا تعني انها ستحدث في نفس التوقيت.. مش الاقطاع كان نظام عالمي؟ مش الثورة الفرنسية حطت المسمار الاكبر في نعشه؟ مش البكرة بتتكر بعد كده وتنتشر الثورة؟ العولمة الرأسمالية نظام اممي لا يمكن مواجهته "باشتراكية في بلد واحد" -راجع كتاب تروتسكي بهذا العنوان- وايضا الاتحاد السوفييتي كان بعد عشر سنين من الثورة عبارة عن ثورة مضادة -راجع توني كليف رأسمالية الدولة في روسيا- الموضوع لا يمكن تغطيته بالبوست.. على ايميلات بقى:)

Samir Siam said...

كل عام وانت بخير وتقبل الله منا ومنك الطاعات

جيهان احمد said...

كل سنة وحضرتك طيب يا استاذ خالد كل سنة وانت موجود دايما معانا وبتمتعنا بكل الفنون ... سلمت الايادى ودائما قلمك متميز ..خلتنا نحلم حلم جميل نتمنى ان ربنا يحققه ليك ولكل الدنيا فى القريب العاجل

aidy said...

كل عام وحضرتك بخير وطيب
ودائماً مبدع
كلماتك رائعة تنفذ إلى القلب
ببساطة

Anonymous said...

الكلام بجد جميل جدا . وكون ان احنا احساسنا قادنا إلى ان القصيده سوف تقودنا إلى مود حزن وده لأننا تعودنا على المود ده فى القصايد فعلا كما قالت
وينكى وده لاننا فعلا رأينا بك الوطنية وكالعاده اى شخص وطنى كنت اجد فى تعبيرة نزعة الحزن هذا هو السبب ليس إلا اما بالنسبة إلى العيد الذى تنتظرونة فمن رأيى ومع إحترامى لكل وجه نظر قيلت ان هذا العيد لن يأتى إلا عندما نقضى على بعض السياسات الفاشلة التى تسود المجتمع المصرى واظن
ان البعض يعرف هذه السياسات جيدا .
واخيرا كل عام وانتم بخير ...

loleta said...

طبعا بالتأكيد الكلام كله جميل جدا
بس إللي عجبني أكتر
(كل فرد في دار جيرانه
كل شعب في أرض غيره..بالمحبه وكل خير)
الجمله دي أثرت فيا
بس يارب كل فرد في دار جيرانه يكون بيهنيهم بالعيد ومبسوطين مع بعض مايكونش داخل يسرقهم ولا حاجه هههههه....
وبردو كل شعب في أرض غيره بالمحبه زي ما حضرتك قولت يا مستر خالد....

كل سنة وحضارتكم طيبين

حنان الزيتوني said...

يا أستاذ خالد من الواضح أنك تؤمن جداً بالنظريات الإشتراكية, و هذا ليس عيباً فهي كانت أرحم من الرأسمالية بكثير.. و لكني أستغرب أن شخصاً ذو تفكير إبداعي مثلك لا تكون لديه نظريته الخاصة التى تخرج من رحم بيئتنا العربية. أنا شخصياً لا أؤمن لا بالرأسمالية و لا بالأشتراكية لأنهما يتناقضان مع الكثير من طبائع الأشياء التى تشكل أسس الطبيعة الأنسانية و الحياتية..

القصيدة حلوة و متفائلة.. و يا ريت نشوف المزيد من القصائد الغاضبة و أن نسمع قصائدك مسجلة صوتياً من إلقائك..

تحياتي..

Rana said...

كل سنة وحضرتك طيب يا مستر خالد وكل اخواتى المسلميين طيبيين انا من اعز اصدقائى فعلاً منكم .
ثانياً شابووو ليك يا خالد ولكل فريق العمل بجد جديتكم فى مسلسل " أهل كايرو " وراء الكاميرا ظهرت بوضوح امام الكاميرا الفكرة فعلاً وصلت بوضوح و هدفكم واضح جداً .
كان انا عندى سؤال لحضرتك تفتكر فعلاً ان معظم الناس وليس الكل دماغها هتفضل دايماً ساطحية لدرجت انها لغاية الحلقة 29 تفضل تسأل مين اللى قتل صافى سليم .
وسورى انى طولت عليك
مرسى خالص