Saturday, November 18, 2006

ثوب الحسين

معرفش ليه
حاسس كأني حتة من ثوب الحسين
وغطسوني ف بحر زيف
وادوني سيف
وقالولي حارب في العراء
إكليل وتاج ووسام شهيد
مية معركة
معرفش ليه.. معرفش فين.. معرفش مين
مية ألف إيد
تغزل سجاجيد كربلاء
دمي بساط الريح بيرسى عالبلاط
وامي تبيع الفجل في سنباط
وتكفن الأولاد وتطلع بالقرص
لا نبض لا غنوة مراكبية
على المحطة شاورتلي ياخيّ
شقيت هدوم العسكرية وجيت اطير
رعد القنابل في القلوب كان لسه حيّ
لاشيء هناك لا ضي لا عتمة لا نار
ولا انتظار
الوقت نط ف كِلْوِتي
صرخت والله وحشتني يا بوي
كان هو راخر حتة من ثوب الحسين
وغطسوه ف بحر اليمن
على سد مأرب كسروا دماغه الصعيدي
على المحطة شاورتله بإيدي
عمي الصغير كان يدوب
بيعض في كم الحسين
أما بلغ زفوه بحاله وماله في حطين
وعلى المحطة شاورتله بمنديل
كانوا المغول بيفتشوا بغداد
بيقلّبوها في خريطة النيل

17 comments:

Anonymous said...

ماشاء الله
كلامك جميل مالوش حل

يا رب احفظ خريطة النيل من أي تتار أو مغول

KHALED-ELSAWY said...

شكرا عروسة النيل ويا رب آمين:)

BaTaBeeT said...

ماشاء الله

الافكار مختلفه
ودخله الكلام تشد
"حاسس كأني حتة من ثوب الحسين
وغطسوني ف بحر زيف
وادوني سيف"

KHALED-ELSAWY said...

بطابيط ازيك فينك؟ متشكر:)

Lily said...

ana me7taga eny a2ra el post dah kaza mara la2eny 2areto le7ad delwa2ty yeegy 20 mara we kol mara afhamo be shakl tany...ma3lesh fahmy 3ala 2ady:)

elmhem e7na bas bensalem we ben2ol
saba7ak Fol :)

وينكى said...

كل مره أقرا القصيده دى أكتشف فيها معنى جديد
اللوحه على بعضها وكأنها مجموعة صور بين الزمان والمكان وبتدور حوالين محور واحد
أتمنالك مزيد من الابداع

schlau_oyoo said...

رائعة و قو ية المعني و الايحاء

Anonymous said...

القصيدة بتعكس الألم العربى كله.. من مشرقه لمغربه... من حاضره الى ماضيه

كلنا جزء من ثوب الحسين.. كلنا حاربنا معارك مش عارفين مع مين ولا سببها ايه
كلنا كفنا أولادنا بأيدنا وطلعنا عليهم بقرص
كلنا على عنينا هذا الثوب من الزيف والخداع


manal

وينكى said...

يسلم فمك يا منوله يا أوختشى
هو دا الكلام الموزون المقفع وإلا فلا
انا اديتك نمرتى يا هانم. ماكلمتنيش لييييييه؟؟

Anonymous said...

بسم الله ما شاء الله
أول القصيدة يسحر

حاسس كأني حتة من ثوب الحسين
وغطسوني ف بحر زيف
وادوني سيف

واضح انها مش بس موهبة و انها مثقلة بقرايات و مشاعر كبيرة قوى
أجمل حاجة التشبيهات جديدة بمعنى انها ليها خصوصية ماتحسش انك قريتها قبل كده


اما بخصوص النزف العربى فانا متفقة مع منال فى كلامها

yasmin

KHALED-ELSAWY said...

ليلي صباحك ياسمين:) فهمك مش على قدك ولا حاجة.. الموضوع مكلكع سنة.. عارفة كتبت ده امتى؟ في حرب الخليج وانا شايف جنودنا رايحين العراق يدخلوا حلف عجيب ويموتوا منعرفش ولا يعرفوا دفاعا عن ايه؟ نفط الخليج؟ ولصالح مين؟ عارفة لو نموت دفاعا عن ثروة تنتقل لاولاد فقرائنا اهه يبقى مبرر معقول لكن نموت عشان تنمية ارباح العدو سواء كان العدو ده خارجي او داخلي فشيء محزن محزن قوي.
شكرا يا وينكي وشكرا يا شلاو.
منال اصبحت من المعجبين باسلوبك النقدي:)
ياسمين اشكرك:)

Anonymous said...

......................
speechless, really cant comment or critsize
marvellous as usual

KHALED-ELSAWY said...

متشكر يا حفصوص:)
يا جماعة انا مخللي تعليق ايف بتاع اني كلي زيف عشان لو حد موافقها يتفضل يؤكد كلامها:)ده الهيافة دي مملكة يا جدع:)

mony said...

خالد انت استعنت فىالقصيده دى بأشرف الخلق ربنا يجعلك من اتباع سيدنا محمد صلى الله عليه و سلم و آل بيت سيدنا محمد صلى الله عليه وسلم إلى يوم الدين إن شاء الله

Jessy said...

أحسنت ياحر .. اعطيت و اجزلت..كتبت واجدت ..لكم من الاحرار في روح ذكرى الحسين تحية.. تقديري دائما

baby said...

يسلموا الايادى
زادك الله من روعه الكلمات والافكار تحياتى لماااااااا ابدعت

new dawn said...

حلوة اوى ذى كل اعمالك