Wednesday, November 01, 2006

من أين يأكل الشعراء؟

من أين يأكل الشعراء يا ترى؟
من ذا الذي يدفع ثمن القهوة والسجائر
والتجارب الماجنة؟
من ذا يمول القصائد الفصيحة والتجارب الساخنة؟
ومن الذي يتبنى امتلاء البوق بالطنطنة؟
من أين يأكل الشعراء ويحتسون الخمر؟
ومن يا ترى يستهلك البضاعة الكاسدة؟
يتحدثون عن جموع لا تعرفهم
يخوضون في قصص لا تندمل
يكسرون الإيقاع ولا يأتون بالبديل
يرفضون أنفسهم كالكلاب الخارجة من النهر
يذوبون في فصام جماعي رائع
كانتحار الغزلان في بحيرة التماسيح
يمارسون الكلمات كأنها العادة السرية الأبدية
يجرحون أنفسهم ويستعذبون الحمى والسهر
يحررون روشتة العلاج دون أن يشخصوا المرض
يتحدثون للقتيل في اعتراف الآثم للقس
أو الاكتئابي للمعالج النفسي
ويدخلون في معارك وهمية طاحنة
يفقدون فيها الكرامة الباقية والرؤى الملونة
يغافلون الممرضين ويقطعون شرايينهم
متطهرين في غيبوبة داكنة

من أين يأكل الشعراء يا ترى؟
ومن المسكين الذي يدفع الثمن؟؟

14 comments:

Hafsa said...

يا اما بياكلوا من نظام بيدفعلهم او بيفضلوا متمسكين بمدا معين ليهم مغاير لقوة السلطة فبيموتوا من الجوع
اخر اختيار انهم عايشين ببركة دعا الوالدين

:)
اه صحيح ممكن كمان نوع
بيكتبوا شعر اقرب ما يكون للغثاء فمش فارقة مع حد هما بيعملوا ايه

تحياتي

Khaled Khalil said...

ممكن يشتغلوا زي الناس المحترمين, و أنا أقصد بيشتغل يعني بيعمل حاجة, مش بيشتغل يني بيبعت شعره لجرنال بيأكله
و ممكن بدل الجرنال, الحاكم اللي يأكله, بس ده مظنش موجود عندنا, مش لقلة الفساد, لكن لغباء الحاكم رغم شبقه بالفساد

المشكلة إن ناس كتير مش قادرة تفهم ان الفن ده مش سلعة, مش من حقه يبيعها و يقبض تمنها,
و الشاعر مش شغلته انه يشعرر, هو انسان عادي بيحس بكل اللي الانسان بيحس بيه, بس يقدر يعبر بأسلوب أكتر من بليغ, و ده الحال مع الرسام و الملحن إلخ
أعذرني لأني مش بستخدم كلمة "فنان" الغبية, لو كان فيه معيار لل"فن" هيبقى سلعه زيه زي البطاطس, بس البطاطس هتفضل طول عمرها بطاطس باعتراف كل الناس أو من غيره
لكن الفن تذوق شخصي
لو هتقارنه بالبطاطس, يبقى بلذتها, مش حتى بطعمها, بطعمها تقدر تقول مالحة مسكرة, أدب المهجر, مدرسة الوحشييين, موسيقى عصر الباروك...
لكن متقدرش تقول ان كل الناس مجتمعة على استلذاذ البطاطس المقلية أو قصيدة فلان الفلاني أو مسرحية كذا

عشان كده أرفض تسمية أمير الشعراء, رغم حبي لشوقي, لكن الاسم ده كلام فارغ,
و الدليل ان اللي لقبوه شعراء برضه, المفروض ان الشعر مكتوب لكل الناس

KHALED-ELSAWY said...

حفصة، خالد، مرة كنت قاعد على زهرة البستان زمان ونشبت معركة ثقافية حامية الوطيس بين شعراء وسط البلد ساعتها.. وفجأة حسيت بغربة رهيبة، كنت ببص من عيون القهوجي.. وفكرت.. احنا باللوغاريتم بتاعنا ده سواء في الشعر او في النقاش حنفيده هو واللي زيه ازاي؟ وفكرت ان فيه ناس طافحة الكوتة في الدنيا ، الناس دي بتدفع ضرايب، الضرايب دي جزء منها بيبقى أجور ومكافآت في الوزارات ومنها وزارة الثقافة، والشعراء دول بياخدوا المكافأة أو المرتب عشان يقولوا اللي مش فاهمه دافع الضريبة الغلبان.. افتكر اني مشيت ومادخلتش زهرة البستان من يوميها:)قلت لغاية ما احل موضوع حلقية الشعر انا حسكن في المسرح والشعر اللي حكتبه حيبقى عامية للغناء بالمعاني البسيطة اللي تمس الناس وقد كانت محاولاتي بعدها في هذا الاتجاه.

khalakhelo said...

مادخلتش زهرة البستان من يوميها ؟
و ده هيفيد القهوجي ازاي يعني ؟
مش لازم تقعد و تطلب
أيوة اللي هيقعد راح يطلب واللي مايطلبش يبعد
تلاقيك كنت بتدفعله بالعملة الصعبة, تديله قصيدتين في العضم من نوع
إن قهوتي يا قهوجي قهوة سادة
انتا بغلاستك عملتها سكر زيادة
و كنت أفضلها محوجة و أتيتني بها قهوة عادة
فاسمع مني اليوم و اتعظ
فاني لن آتيك بعده, و لنرى من منا أشد عناداً
فالآن بيننا -و من يومنا هذا- ما يصنع في دور الحدادة

Khaled Khalil said...

بس بيتهيألي مش لازم الشعر يكون عامي عشان يتفهم, يعني ممكن يبقى فصحى بسيط
بس ده صعب جداً على أي حال, لأننا أشاساً بنفكر بالعامية
و ممكن برضه تمزج ما بينهم زي شعر بيرم كده
شوف انتا, انتا أدرى باللي بتشعرر بيه

وينكى said...

على فكره فيه قهوجيه كتير بيفهموا اللى الشعرا بيقولوه والله
تصور انت لما أقعد مع واحد بيصلح ساعات, وفاهم فى القانون أكتر من أى خريج حقوق جديد
اقليدس نفسه كان بيخدم فى معهد طيبه لعشر سنين
ومن كلام الكهنه المتنطور هنا وهناك.. كتب نظرياته وبقى اقليدس
أى نعم حرامى ونسب الموضوع لنفسه.. بس برضه عمل حاجه
بالنسبه للقهاوى .. فهما مستفيدين فى كل الحالات
طبعا دا غير الاستفاده الماديه من الطلبيات المتنوعه
وصداع الزباين دا بقى متعودين عليه من زمان
أمال قهاوى الدش وماتشات الكوره تعمل ايه؟؟

nour said...

عايزة اقول الاول انى معجبة بكلام خلاخيلو...بنمسى يا استاذ:)
تانى حاجة..هو الحقيقة انا دايما بسأل نفسى السؤال ده الفنانين بياكلوا منين..يعنى طلبة كليتى لما نتخرج هنعمل ايه اقسام نحت و تصوير..هيقفوا فى الشارع ينحتوا تماثيل للناس يعنى؟ اهو ربنا بيرزق
بالنسبة للقهوجى انا متأكدة انه كان سامع الحوار ده..و بيترق على الكلام فى سره..و بيقول الناس المساكين المجانين دى بتقول ايه..ده كان احتمال يعملكوا خصم فى الحساب اشفاق عليكوا..ليه لانه واحد متفق مع نفسه..مش شاغل نفسه بالكلام ده..ده بقى مش هتفيده بحاجة ده هو اللى ممكن يفيدك..

khalakhelo said...

سؤال غريب والله
يعني هيكونو بياكلو من ودانهم ؟
يجوز برضه

بصي بقى يا وينكي
كله إلا التريقة على أبو الأقاليد
انتي يلاقيكي قهراوية و شمتانة بس

كلام ايه يا نور, أنا ساكت اهه
بس بنصبح يا مزمزيل
انتي قسم ايه ؟
مش مشكلة, حتى لو كنتي قسم باب شرقي
أنا هتكلم بصراحة
أنا رأيي في كليتكو دي مش هيعجبك
أنا شايف ان الكلية هدفها تخرج ناس تشتغل (لأ يعني تعمل, مش تشتغلنا) يعني أي مجتمع هيحتاج لمهندسين و محاميين و دكاترة و صحفيين و الذي منه, خصوصاً الذي منه
بس لو حد عايز يدرس فن أو تاريخ أو فلسفة, أو الذي مش منه يبقى شيء عظيم جداً بس أهميته بعد أهمية العمل المهني, اللي هوه نفسه أهميته أقل من العمل الحرفي
اللي أقصده ان كليات الفنون و آداب ملهاش داعي كنظام تعليمي بعد الثانوي
أنا شايف انها تبقى معاهد شغالة على طول لأي سن زي الكونزرفتوار بتاع الموسيقى, أنا هنا بتكلم عن الفنون تحديداً, لأن الفن عمل انساني من الدرجة الأولى, و أعتقد الأطفال بيبقوا أكتر انسانية منا, مش موضوعنا
لو حد عايز يتعلم تاريخ أو فلسفة أو فن (أو الذي مش منه), يدرسه بعد الكلية, أو معاها, بس دراسة منفصلة

آدي كل كلامي
مستعد لتلقي البيض و الطماطم
هعمل بيهم عجة

nour said...

لا خالص و لا بيض و لا عجة..انا اصلا متفقة معاك جدا..اصلا الهواية لما بتقلب على دراسة و غم بتبقى مسخرة انا بقيت اكره الرسم و اللى عايزينه..بس الكلام ده مش منطبق على كل اقسام الكلية لان فى قسم ديكور اللى هو القسم بتاعى عمارة داخلية يعنى و القسم ده بدعة من بدعات العصور..معمول للناس الاغنيا اللى عايزين يصرفوا مليون جنيه على الشاليه بتاعهم اللى فى شاطىء الفيروز ده كلام الدكتور بتاعى اللى هو اكتر دكتور محترم بس يعنى اسمنا مهندسين ديكور..حتى بيعلمونا نتعامل مع الزباين ازاى لانهم من صفوة المجتمع و كمان بيقولولنا منتعاملش مع عملاء اقل من المستوى لانهم هيطلعوا عنينا..القسم ده معظمه بنات..و بيبقوا داخلينه علشان يطلعوا ستايلست و يتعاملوا مع فنانين..و الله العظيم مش الكل يعنى :)فى بقى قسم عمارة و ده زى هندسة عمارة احسن كمان هو عملى اكتر مش رسم بس يعنى..و فى جرافيك و ده يعنى بكار و د.منى ابو النصر الله يرحمها..اما بقى قسم نحت و تصوير معرفش الحقيقة هيعملوا ايه فى الحياة..معارض ممكن..مبقللش و الله من قيمة الرسم و النحت..بس فى مصر هيعملوا ايه؟

Khaled Khalil said...

منورة يا نور

أنا على فكرة أخويا خريج فنون عمارة و بنت خالتي ديكور زيك, بس جامعة اسكندرية بقى
هي على أي حال اشتغلت بعيد عن ديكور للأسف

بس انتي ايه رأيك في موضوع ان شغلك موجه لطبقة معينة
يعني أنا متناقشتش في الموضوع ده قبل كده
يعني عادي و يبقى أحسن كل ما تاخدي منهم فلوس أكتر, على الأقل فلوسهم تقل في حاجة (معلش أنا حقود) ولا شايفة العكس انك كنتي تحبي مثلاً تعملي حاجة تفيد الطبقات الدنيا في المجتمع, و في الحالة دي في ايه ممكن يتعمل ؟
على فكرة أنا برضه عندي نفس المشكلة, أنا طالب هندسة كمبيوطر, بخجل جداً لما البواب أو المكوجي أو أي حد يسألني عن اللي بشتغله, طب و ده بيفيد في ايه, بحاول أهرب من السؤال, لكن في الحقيقة مقدرش أهرب من نفسي, مش لاقي أي شغل ممكن يخدم اللي أقصدهم

Khaled Khalil said...

بالمناسبة انتي كنتي طيبة جداً مع خلاخلو
لو مش هترميه بالبيض و الطماطم أنا هرميه بالخرشوف, نشوف بقى هيعمل بيه ايه

KHALED-ELSAWY said...

خلاخيلو اللي بتضربه ده حيضيعك يا بني:) بهزر معاك:)
خالد خليل مش مهم فصحى او عامية المهم خارج من القلب ولا.. ووصل للناس ازاي؟ لفته حلوة ولا رخمة مثلا.. الناس سمعت ولد الهدى وسمعت الاطلال وسمعت مدائح نبوية فصيحة وسمعت نزار.. ولا ايه؟
طيب خلاخيلو ونور هو الاقتراح ده ممكن ازاي يبقى مفيد عاوز تشرحولي.. ساعات فيه حاجات مش مهم قوي تتعمل زي اني اقول تعالوا نهد كوبري اكتوبر ونعمل مكانه كوبري نوفمبر.. مش عارف مفهوم ولا غامض:)
وقبل بقى معركة البيض والطماطم والخرشوف ما تستعر حقول حاجة واخلع.. احساسنا اننا بنعمل حاجة مش مهمة نابع من طبيعة النظام اللب بيحكم حياتنا سواء السلطة بكل اقسامها او اصحاب الاعمال او النقابات .. كله بيخدم على فكرة واحدة وهي انك مش مفيد الا لو بتجيب للطبقة الحاكمة ارباح.. يوما ما حتنتصر البشرية على تحكم رأس المال والقوة المسلحة على ارزاق الناس وكرامتهم وحريتهم، يوميها حيسترد الفن والعلم اعتبارهم وكل المهن حتكون مفيدة وحيكون فيه عدالة حقيقية مش الوزير ياخد ميت ضعف العامل رغم ان العامل هو اللي بيدفع مرتب الوزير.. ولا حيبقى الزبال موضع احتقار لأن من غيره نموت ولا حيبقى الفلاح جعان ومتبهدل امراض مع انه هو اللي بيأكلنا كلنا.. البشرية كلها محتاجة عقد اجتماعي جديد في رايي.. نتعب سوا ونجني سوا.. مش انا اسفأناكم يبقى هو النظام الشرعي واللي يقول غير كده يشرف في المعتقل!!!!

khalakhelo said...

"يوما ما حتنتصر البشرية على تحكم رأس المال والقوة المسلحة على ارزاق الناس وكرامتهم وحريتهم"
يسمع من بقك ربنا

nour said...

بالضبط كده اى شغل لازم يكون بيصب فى مصلحة الطبقة الحاكمة..يعنى مثلا فى عيلة عادية هتجيب مهندسة ديكور تعملها شقتها اللى هى كلها تلات اود و صالة رخام مثلا و كرانيش سقف و حركات و تاخد الشىء الفلانى لا طبعا ست البيت هى اللى بتشرف على الديكور مع النقاشين اللى مينفعش يشتغلوا من غير اشراف مهندس..بس هى ذوقها و احساسها ببيتها احلى من اى مهندس..
احنا اصلا فى بلد مبتحترمش الفن و الفنانين..يا فندم ده العربيات بتبقى واقفة على باب كليتنا مستنية الفنانين بقى يطلعوا لان فى دماغهم الفنانات دول ممكن يركبوا مع اى حد..اتقالتلى كده..ايه انتوا مش فنانين
على العموم اللى احنا ممكن نعمله دلوقت ان احنا نحاول نرقى احساس الناس..ونعملهم حاجة ليهم حاسة بيهم و ده معظم الشغل على قسم الكاريكاتور لانه اكتر حاجة بتعرف تعبر..طالع من عندنا صلاح جاهين و وليد طاهر و باسم جعيصة اللى راعبين الدنيا بالكاريكاتور بتاعهم