Monday, November 13, 2006

أسد جريح

أسد جريح ملهوش في الكون
غير الضوافر والأنياب
أشباله هربت من طوعه
ومقفلة ف وشه الأبواب
ماشي في غابة دحلابة
قرودها تقدر عالأفيال
شجرها حيات وأفاعي
وميّها فخ وأغلال
أسد جريح مضروب بالسهم
أسد جريح في الروح والجسم
الأنثى خانت والأشبال
شغالة في السيرك المنصوب
والنمر أنبل أعداؤه
بقى نجم سيما ف فيلم سكوب
ومن الزرافة للخرتيت
يتسولوا اللقمة ف إعلان
أسد جريح ملك الغابة
وماعادش ملكه في الإمكان
جريح جريح يزأر يزأر
تضحك عليه كلاب الغابة
والوحل ينفض تماسيحه
تعض ديله وتتغابى
وتحاصره خنازير وحشية
والكثرة شاطرة وغلابة
مايخلصوش من وسطيهم
إلا فؤاده الضرغامي
جريح جريح بس غضنفر
حامي على الكون المايع
أنا ليث ف جلدي ومسامي
مهما تجوني بأسامي
فأنا الأسامة المتكبر
أموت ولا أهرب مالساح
أنا الوغى وأنا الرمّاح
لبيك يا أمسي المشبوب
يا كبريائي المسلوبة
جريح جريح يزأر يزأر
الغابة تخفي خنازيرها
وتلم بومها وثعابينها
وكلابها تنده أسيادها
بمصفحاتها وجنازيرها
جايين على السبع المجروح
إكمنه بيسلم في الروح
أسد جريح مايحسوهشي
غير صقر زاهد في الصحرا
لما الأصيل حس حصاره
حس بشجن شعلل ناره
نزل بضوفره ومنقاره
وانضم للسبع المجروح
انضم شهم لشهم صحيح
بقى مش مهم الجيش والريح
وقف المناضل والقناص
والغابة ولعت ضرب رصاص
لكن وسبحان العاطي
سبعين لوا خيل برية
هوجة كرامة وحرية
لبيك يا ملك الأحرار
سبعين لوا سمعوا زئيرك
ومع وزيرك ذو المنقار
سبعين لوا سبعين إعصار
لبيك يا تاج القبة
ملعون أبو الخوف والرهبة
بص الأسد للخيل والصقر
وقالهم ميت ميت
ميت ومش عشمان في النصر
قالوله مين سمعك يا كبير
الموت بقى أحلى من العمر
الكون بقى شيء مايسرش
أتفه ما فيه بقى يتحرش
والموت جوارك بيشرف
نموت لكن مانعيشّي ف عش
نموت لكن ما نتحرفش
وقف الجيشين برة الغابة
في الناحية دي كل الغابة
ومعاها ناس ثانية ديابة
برصاص وألفين دبابة
والناحية دي وقفوا الأصحاب
سنوا المخالب والأنياب
لحس الأسد شق جراحه
زأر ورد عليه الخيل
والصقر قام زاعق في الليل
يا مرحبا بالموت واقف
زي الشجر زي النخلات
هجموا على جيش البهوات
جريوا الكلاب من قدامهم
سابوا البطولة لأسيادهم
جريوا الديابة والخنازير
والدبابات داست في الوحل
والدم يطبع عالجنازير
مافضلش إلا صهيل وزئير
حتى الرصاص ماعادشي خطير
والمعركة دارت دارت
بقت الوحوش في الوحل عجين
والناس من الدهشة اتدارت
ومن الذهول على أناملها
وقف الزناد وسط الحلقة
خرست نيرانها وقنابلها
العركة حطت أهوالها
والفجر داخل على مهله
الغابة خليت من ناسها
ومن الشجر كشفت راسها
وطلت الشمس الجاية
لقت المكان غرقان في الدم
وعبير جديد في الغابة اتشم
نسيم من الطينة والدم
ريحة كرامة وحرية

24 comments:

وينكى said...

أسد جريح والكل استغل ضعفه
اللى استغنى عنه.. واللى باعه
واللى عاث فى الأرض فسادا
أسد جريح لكن عنده كرامه
ايمانه هو اللى قواه , وهو اللى خللى الصقر يقف معاه.. وجنود من حيث لا يحتسب
وتنتهى الصوره بانتصار الحق على الباطل رغم اختلاف القوى
تحيا الحريه.. ولو كان تمنها الدم
ببساطه.. صوره حيه

fadwa said...

thats a very attractive poem
i salutes you for those senses you're exrpressing,,
i liked so much your usage for names of lions(ضرغام,ليث,,,,,,-
you are areal poet ,,and for sorrow we are in areal forest,that we have to accept,,a strang one, in it the strong one and the one who must have the freedom to talk have to be silent forever ,,and the persons who have to respect him and listen to him are the controlers and hitters,,
its like a nightmere for me but when i wake,i find that its an exsisting world we are already living in it,,
i've a poetry compition tomorrow,,
(ادعولي بقي(

Khaled Khalil said...

وصل الخيالة لفرس النهر
لقوه قاعد يشم الزهر
قالوله قوم فز الباشا عايزك
قالهم مالكوش عليا كلام ولا أمر
جم بدباباتهم و عتادهم و عسكرو حولين النهر
قالو هيباتو لحد الفجر
طلعت عليهم شمس جديدة
تبحلق في الغابة في حالتها الغريبة
سمعت أول طلقة نار, استخبت تاني قال مكسوفة
خاف العساكر من فرس النهر
قالو اهربو لاياخدكو السحر
زاح بالليل نهار النصر
رجع فرس النهر يشم الزهر
رجعت الغابة تلم صحابها
رجعت الحياة تداري القبر
رجع الأسد الجريح و الصقر
أسد جديد و صقر جديد
لا حد شافهم ولا يعرفهم
و الكل عارف بوجودهم
قال هي دي روح النصر

KHALED-ELSAWY said...

وينكي شكرا اهو كده بلاش الاحباطاية اللي بتشد لورا ساعات دي:)
فدوى مبروك مقدما عاوزينك توريلهم قد ايه انت عضو اصيل في نادي الشعر:)كيل ذم:)
خلود انت عارف ان فيه مدرسة في النقد بتقول انك لازم تعمل ابداع مصاحب للنص؟ السكة دي حلوة وكأنك بتفرد جسر بين العمل والناس من نفس جنس العمل ومن خلالك انت .. مش عارف.. على فكرة رحت البلوج عندك وعجبني موضوع كريم وكتبت تعليق وما نزلش معرفش ليه وحاولت 3 مرات.. نفسي بس في المواضيع الشائكة تاخد الناس بالراحة قوي عشان ماتتصدمش الصدمة العدوانية وده غير صدمة الافاقة اللي هي حاجة ايجابية مش عارف انا واضح ولا؟

Khaled Khalil said...

لأ, مش واضح كفاية, معلش أنا غبي شوية
زي البلوج الغبي بتاعي, مش عارف ازاي مينزلش تعليقك, دانتا كنت تنورنا
تصدق أنا نفسي مكنتش عارف أنشر الموضوع, كل ما أعمله بابلش أو سيف آز درافت يقف زي الأهبل و ميعملش حاجة تاني, جربته على أوبرا و فاير شوكس و انترنت اكسبلودر و بيعمل نفس الحوار, في الآخر بعته بالإيميل
مش بتحصل مع حد حاجة زي كده ؟

fadwa said...

hi mr khaled, hi guys,,
i won but its not finaly,,
اتصعدت للدور قبل النهائي
the compition was in a certain school,,we were three ,one for 1st secondary she didnt win,,and another for 3rd she won among 15 with another 3,,,and me i won for 2nd among 17 with another 3 from another school,,
any way we are having another compition on sunday,,تصفيات
thanx khaled ,,

KHALED-ELSAWY said...

فدوى ألف مبروك.. بصي حقترح عليكي اقتراحين وفكري فيهم.. الأولاني خليكي عربي لما انت قادرة تكتبي عربي عشان ما تنعزليش شوية كده، والثاني انضمي للبنات في بلوج صوتها.. ومبروك دايما انشاءالله..
يا جماعة لو قلتولي خالد مش حبقى حاسس انكم مش بتحترموني:) يعني خلونا صون فا صون كده احنا مش في مجمع التحرير:)

وينكى said...

ألف ألف مبروك ليكى يا فدوى وعقبال ما تكتسحي وتغلبي كل منافسينك
قدها وقدود يا بنت
عشان خاطرى اسمعى كلام بابا واكتبى بالعربى عشان بجد مش طالبه معايا ترجمه هنا وفى الكليه
ميرسى
(",)

Anonymous said...

ألف مبروك يا فدوى
وعقبال النهائيات
:)


manal

Anonymous said...

Sebah el Khaire Ostaz khalid,I'm sorry I' m sending my comment in english ,coz I don't have an arabic window,so forgive me.
yesterday, I sent a comment about Asad Jerre7.still is not there. there might be en error?
kindly of you explining to me what it might happened?

fadwa said...

شكرا قوي يا جماعه
شكرا يا خالد
شكرا يا وينكي-albida
يا جماعه اخجلتم تواضعنا والله
you are my small family who cares for me and i care for
من عينيا الاتنين يا خالد هاكتب بالعربي رغم ان ده هيطلع عيني
بس كله يهون عشانكم
بخصوص بلوج صوتها انشاء الله هانضم
i dont know what to say ,,but i love you all,,

fadwa said...

sorry every one can you gimme the name of blog-sotha-i found a completely another one

Anonymous said...

فدوى... عنوان بلوج صوتها هو
sotaha.blogspot.com
تعالى شرفينا بزيارتك وخدى فكرة


manal

Romahali said...

for Fadwa really alf alf alf mabrok wish u bst of luck next sunday isa. hope that u will be the first.

Mr. Khaled ..great peom.
i think it describe the life now the forest is the same .... people two categories liones and the other are cowards and when the lion fight they run away and when he die they start to appear to take his place and kill to take more ...the lion alwayes fight alone no one in his side to defence of the people rights with him ....fighting alone is what happen now ..see ur life ... it is the same.. i guess fighting alone is like betray 4 me .

I hope that we can defence together

Romah

Romahali said...

i beleive in
"ارحموا عزيز قوم ذل"

Romah

khalakhelo said...

جوسن إلبان !
arabic window
ايه ده ؟ مشربية أرابسك يعني
الموضوع مش مستاهل شبابيك عربي
هتلاقي رجيونال أند لانجودج قوبشن في الكنترول بانل, بعدين اتصرفي انتي مع نفشك

Anonymous said...

thank you khalakhelo.

khalakhelo said...

العفو
كنت أفضل طظ فيك بالعربي على الثانك يو

Anonymous said...

khalakhelo...I cant write in Arabic because I ‘ve not got an Arabic keyboard

Anonymous said...

جميلة قوى

KHALED-ELSAWY said...

غصن ولا يهمك اكتبي زي ما تحبي.. خلاخيلو يا جدع انت بتخش شمال هزار في الناس بيتخضوا زمر الاول:)
انجي متشكر واهلا بيكي

Anonymous said...

الله عليك
الله عليك
الله عليك
الله عليك

انت باشا و الله العظيم

الأســـد المصـــري said...

انا شدني الاسم لاني من المهتمين "بالاسود " برضه ومكنتش مصدق ان الابداع ده يطلع من الاستاذ خالد الصاوي .. صحيح الفن والادب لا يتجزئا .. اتمنى تشريف مدونتى المتواضعة "العب مع الاسد " ..

الأســـد المصــري said...

عفوا .. المدونة بتاعتى هنا