Sunday, November 05, 2006

كلام النفس


الكدب قال للصدق انا سلمت
آدي رايتي اهه سامح منيش كداب
ومد إيده ما مدهاش الصدق
قام باس صباعه وابتسم بعتاب
وهز كتفه وحب فوق راسه
والصدق كان ساكت كأنه كتاب
بلسان غريب كتبوه زمان الناس
وسابوه غريب ف بلاد بلا أحباب
ومين يا عين يقرا كلام النفس
ان كانش يفتح للمحبة الباب؟؟

16 comments:

Albida said...

والصدق كان ساكت كأنه كتاب
بلسان غريب كتبوه زمان الناس
وسابوه غريب ف بلاد بلا أحباب

ال3 سطور دول عاجبنى جدا... مش بقولك تشبيهاتك رائعة!! بس ليا ملحوظة صغيرة.. تكرار كلمة غريب فى سطرين ورا بعض أضعف المعنى شويه

على فكرة كتاب الصدق هيفضل على طول مش مفهوم ولاحد هيعرف يفك رموزه


manal

Lily said...

Ana Molhtalefa ma3aky ya Manal law tesma7eely fe mawdo3 en elsed2 3omro ma beytefehem
Elsed2 wade7 we ysed 3een elshams, e7na elly ben3mel ro7na mesh fahmeen aw mesh shayfeen, laken dayman elsed2 kawy we sate3...we mafeesh 7aga fel donya momken tedareeh

Fetret elensan eltabe3eya betkhaellh yekon sade2, men ghir deen aw kwaneen, e7na elly bentghayar ma3c elseneen we nedy ll kedb asamy shakla 7elw laken fel akher bardo kedb

Ya Ostaz khaled elsed2 mesh ghareeb wala wa7eed, wel daleel kalamak we 2asaydak, we ta3lekat kol elnas elly betdkhol elbolg dah...bey7asesoony en fe ama kebeer fe bokra bas nesbor 7aba kaman

Albida said...

أنت عندك حق يا ليلى فى أن الصدق واضح... لكن مش فى كل الحالات! أنا فى رأيى مفهوم الصدق-تمام زى الكدب- مراوغ جدا! ماتقدريش تمسكيه فى ايدك

يعنى ممكن أنتى تقولى على شخص انه صادق وتيجى واحدة تانية تقولك لا ده كداب.. وانتوا الاتنين تكونوا صح, أنتى فهمانى؟
نفس المنطق بيسرى على حاجات كتير فى حايتنا

manal

Hafsa said...

عمر ما الكدب حيبطل كدب و لا عمر الصدق يبطل يبقي صدق
هما اتخلقوا كده و زيهم الخير و الشر و الحق و الباطل و و حاجات كتيرة اوي

فمن حق الصدق انه ميقبلش صلح الكدب يا اما ساعتها نفس وجود الصدق حينتهي
و اذا حبيتواتقولوا انها انانية من الصدق فده عادي لانه لو حصل العكس عمر ما الكدب حيحب يقعد فاضي من غير ما يناغش في الصدق

و كلامك يا منولة صح
حتي الصدق مراوغ في بعض الاحيان و لكن في النهاية يبقي ما هو صادقا صادقا و لا يحتاج لديل لاثباته

KHALED-ELSAWY said...

ساعات التفعيص في الشعر وعقلنته زيادة عن اللازم بتبوظه.. يعني الشعر كذب جميل وصادق.. ماهو لما يقوللها انت البحر هي مش بحر لكن هي في القصيدة دي بحر.. لو خدناها برة القصيدة حنبقى بنتكلم في موضوع تاني لا في حبيبته ولا في البحر اللي في القصيدة.. , لو ما استطعمناش الحقيقة النسبية في القصيدة تبقى قصيدة وحشة وخلاص.

nour said...

انا متفقة مع الاستاذ خالد..معلش يا منوله مختلفه معاكى لاول مرة بشكل ما..فى الفن بالذات لازم نعديها..و زى ما بيقول استاذنا د.احمد خالد توفيق
دعونى اخدعكم..دعونى انخدع

Albida said...

أنا مش بتكلم على الصدق والكذب فى الفن لكن عن مفهومهم فى الحياة عامة
مفيش انسان ابدا هيقدر يفهمهم

manal

AYDA said...

لا اعلم لماذا استحضرت صوتك وانا اقرا كلماتك!!
تخيلتك تقرأها باسلوبك وحضورك المميز ..
بساطة الكلمات ممزوجة بقوة المعانى ..رائعه..

الدرويش المرووش said...

يا محترم يا جميل
ف الشعر و التمثيل
الكدب ملك الكون
و الصدق حظه قليل

KHALED-ELSAWY said...

عايدة شفتيني بقرا شعر في اي حتة؟ عارفة في ثانوية عامة اتكرمت في الالقاء الشعري ودي أول حاجة أتكرم فيها في حياتي بعد بطولة جودو وانا عندي 10 سنين:) غير كده بقى يا بشيل مواد يا بترفد للمشاغبة:)

nour said...

جودو؟؟؟!!!غريبة دى..اكيد لازم تاخدجوايز فى الالقاء الشعرى يا استاذنا طبعا يعنى

AYDA said...

فناننا الحبيب خالد اشكرك لتعليقاتك وردودك التى تدل على نقاء قلبك وتواضعك الذى زاد من اعجابي بشخصك..
صدقنى انى استحضرت صوتك حين قرات كلماتك هنا ربما لانى كنت متعايشه مع صوتك من خلال المسلسل الذى كنت انتظره بشغف دائم ( نور الصباح ) ولمشاهدتى فيلمك الاخير وايضا لصدق الكلمات هنا والتى تتماشي مع شخصية برجك الصادقة

وينكى said...

جوانب جديده ماكناش نعرفها عنك يا سيدى
جودو.. وإلقاء شعر
أنا باعشق الانسان الشامل الموسوعى
علما وعملا
وبالنسبه للقصيده الحلوه دى
فأنا رأيي فعلا اننا لازم نعيش اللحظه الشعريه زى ماهى
احنا عارفين انها مش حقيقيه , لكن متعايشين مع الجو وحابينها
وعلى رأى حبيبى د. أحمد خالد توفيق
دعنى أخدعك .. دعنى أنخدع
مين فيكوا يا حبايبى يا حلوين اللى بيقراله؟

Albida said...

أنا طبعا ياوينكى... أنا مدمنة حاجة اسمها أحمد خالد توفيق

فعلا مبدع


manal

nour said...

انا بموووت فى د.احمد خالد ..ملاحظين طبعا..الراجل ده اللى يقعد معاه مرة واحدة يكلمه..ينبهر بيه..و انا كان ليا الشرف انى اقابله اصله بلدياتى من طنطا:)

Lily said...

Ana kaman bammot fe Dr A7mad Khaled tawfik, 3ando esloob sakher fel ketaba mesh ay 7ad yefhamo, bas elly beyfhamo ma bey2darsh yetsatghna 3ano:)

3ala fekra ISA ma wara2 eltabe3a hatet3mel mosalsal, wa7ed zemeely men ayam elgam3a mashy fel mawdo3 dah we 2abel DR a7mad we almost etaf2o 3ala eltafaseel