Tuesday, November 14, 2006

باب التاريخ

فتح التاريخ بابه الحديد
دخل صفوف حبة ألوف
وقفل ف وش ألوف الوف
تربس ف بابه ونام سعيد
خبطت لم فتح التاريخ ولا حتى أصحابي القدام
فكرت انام عالبسطة لما الكون يقيد
ويدخل الحراس كلامي للملك
لكنّ كهان الفلك
نصحوني أروّح
واما اقتنعت وجيت اروح
ملقيتشي مطرح
لميت خيوط الحلم بعد ما سبتها تفرد وتتلولو كثير
وطويت جناحي لينكسر فلقيتني في الوجدان كسير
وحبست عصفوري اللي طاير عالمخاطر والأذى
لكن لقيتني وراه بطير
وبحن يوم عن يوم لفم المصيدة
وبمد احلامي مدى
وافرد شراعي وافرضه
واحضن بحرية المصير

9 comments:

وينكى said...

معلش
لحظه من لحظات الغباء اللى بتعدى على الواحد ومش فهمت القصيده دى
هو أكيد امتحان بكره دا ابن اللذينه هو اللى متربسلى عقلى

Anonymous said...

مين قال ان حضرتك بره بوابة التاريخ
ايه يا راجل الكلام ده؟؟
هو احنا مش عاجبينك و لا ايه؟؟
داحنا متفرجين ذوي مزاج عالي جدا و سواء كنت بتشعر و لا بتمثل و لا بتخرج فأحنا جمهورك
يا سيدي قلتهالك
انت حفرت اسمك جوه عقولنا و قلوبنا بالنور
فلن تمحى ابدا
هو ده التاريخ

اسمحلي

تحياتي

KHALED-ELSAWY said...

ايه اللي مش فاهماه يا وينكي؟ انت مالك فيه ايه؟ اللي واخد عقلك بقى واوعي تقوليلنا الامتحانات ما كلنا كنا طلبة لا مؤاخذة:)
حفصة انا حسيت ان السلام الوطني لازم ينزل في خلفية كلامك:) حسيت فجأة اني رأفت الهجان:) ربنا يخليكم ليا وترفعوا معنوياتي كمان وكمان.. على فكرة باب التاريخ مكتوبة سنة 83 :)

Anonymous said...

على فكرة حضرتك مش لازم تدخل بنفسك من بوابة التاريخ... ممكن تسيب عصفورك يطير ويرتفع لحد مايعدى منها, وهو ده المهم


manal

Anonymous said...

ههههههههههههه
ضحكتني و انا مكنش نفسي

ممكن كمان نقولك
"
يا خالد يا حبيب الملايين
"
تحياتي

والله لسه بضحك على الخلفية

khalakhelo said...

أنا برضه جيت أدخل من باب التاريخ قفل على مناخيري
آه يا مناخيري
كده يا تاريخ تقفل في وشي

KHALED-ELSAWY said...

يبدو انك دخلت مناخيرك في لحظة غلط..التوقيت مهم وممكن تفرق مناخير :)

Anonymous said...

حلوة قوى الروح اللى فى الكلام
بس لو جينا نتلكم من منظور أدبى فهى مكسورة " النص يعنى مش البوابة "
فى حاجة فى الموسيقى واقعة
لكن المعنى جميل طبعا

عموما احنا فى بلدنا دى محدش بيدخل من بوابة التاريخ غير لو معاه واسطة
بس دى البوابه بتاعتهم
لكن بوابتنا احنا انت دخلتها من زمان بس ياريت تبقى تسحبنا معاك بقى

KHALED-ELSAWY said...

انا حرة ربنا يخليكي متشكر لذوقك:)