Monday, November 13, 2006

القلب ساير وحداني

القلب ساير وحداني
لا كاني خبط ولا ماني
عدت عليا القمورة
وسابتلي في المنديل صورة
يارب كلمة منصورة
وأعدي للبر الثاني
القلب ساير وحداني
لا كاني خبط ولا ماني
واما العدا شافني رماني
نزلت دنيا مخمورة
عدت عليا المطيورة
أم قلب أحمر رماني
فركت فؤادي بضحكتها
وفرقتني على احزاني
القلب ساير وحداني
لا كاني خبط ولا ماني
عدت عليا اللي سابتني
قوت القلوب المهجورة
فرشت حنانها وآوتني
ورمتني عالبر البحري
الموج بيحبي على صدري
وف آخر البحر جزيرة
يحرسها مالجان اتناشر
يلزملهم دقة سوداني
القلب ساير وحداني
لا كاني خبط ولا ماني
عدت عليا ام ضوافر
شدت فؤادي من الحافر
وكل ما تعافر اعافر
لما اتعصرنا ف بعضينا
واترد روحي لجثماني
القلب ساير وحداني
لا كاني خبط ولا ماني
عدت عليا المسحورة
بعتت رياحها الشريرة
قريت عليها ميت سورة
من البيان القرآني
فتحت عينيها المغرورة
صابني الكلام الشيطاني
القلب ساير وحداني
لا كاني خبط ولا ماني
القلب ساير وحداني
لا كاني خبط ولا ماني
عدت عليا الفلاحة
ولاقتني في الزمن الراحة
غدتني ضحكة مرتاحة
ونيمتني ف أحضاني
صحاني خولي بجريدة
وداني على أرض بعيدة
القلب ساير قدامي
مطاطي راسه أيتامي
يابا العدا خطفوا يمامي
وجيت ازورك ردوني
وادوني كحكة وزمارة
عدت عليا ام أمارة
والنفس حلوة وأمّارة
حليت ف عيني الغندورة
إديتها كحكة وزمارة
شدتني عالأوضة الضلما
ورتني عالم مملوكي
قامت ادنت كل ديوكي
حطت صباعها على الوحمة
قام انفتح باب الرحمة
وسامحني قلبه الرباني

15 comments:

Anonymous said...

القصيدة دى عايزلها قاعدة
:)

لو بصينا على المعنى السطحى للقصيدة هنلاقى أن حضرتك بتوصف انواع مختلفة من النساء.. كل واحدة وليها جاذبيتها الخاصة

أما عن المعنى المتعمق, فانا حسيت أن النساء دول بيرموزوا لأفكار ومشاعر مختلفة حضرتك مريت بيها... لكل فكرة أو احساس تجربة فريدة خاصة به. يعنى احساس يودى حضرتك البحر وواحد تانى بيجول بك فى العوالم المسحورة وواحد تالت يغرقك ببساطته, وواحد رابع يهزك بعنفوانه
أخر واحدة هى فعلا اللى قدرت تتوافق معاك ودخلتك الى مملكة نفسك اللى كانت ضلمة قبل كده

شدت فؤادى من الحافر
صورة جميلة جدا... انا لسه معجبة بطريقة حضرتك فى مزج مشاعر الحب بالعنف... الرقة بالقوة, من غير من حس بأى تنافر

من الاخر القصيدة دى عجبانى جدا
فيها حاجة تخليك تقرأها اكتر من مرة


manal

وينكى said...

حبيت القصيده دى قوى
حبيت أسلوبها اللى شبه الأغانى التراثيه وحبيت صورها ومعانيها
وحبيتك أكتر يا منوله فى طريقه كلامك ونقدك

KHALED-ELSAWY said...

يا جماعة نحن نشهد مولد حركة نقدية عملاقة في هذا البلوج المتواضع.. وحتشوفوا:) بجد ممتاز تفاعلك مع الشعر.. انت وحفصة عشان اكون أمين.. وكمان وينكي بتفاجئني ساعات بالتقاطات رائعة.. شكرا:)

Anonymous said...

مرسى يا وينكى.... بجد وحشتينا أوى
:)

شكرا يا أستاذ خالد يا رافع من معنوياتى
:)
بجد والله شعر حضرتك الرائع هو اللى بيغرينى أنى أعلق عليه

حركة نقدية مرة واحدة! يسمع من بقك ربنا يا أستاذ حالد

manal

وينكى said...

انا معترفه انى ماليش فى النقد خالص
بس على الأقل باحب أقول رأيي
وباعرف أقول ايه اللى بيعجبنى وايه اللى مش حسيته
هو دا كويس ولا وحش؟؟

Anonymous said...

ونكوك
ده كويس اوي انك تقولي رايك و تعرفي
تقوليه و كمان تعبري عنه

استاذ خالد الكلام منك في حقي انا و منولة كبيييير يصعب على امثالي من صغار النفوس تحمله
لحسن نتغر بجد و نبطل نيجي هنا و نقعد في بلوجاتنا زي الديك الشركسي في اغنية يونس شلبي ربنا يشفيه على قد ما ضحك الملايين

KHALED-ELSAWY said...

وينكي رجاء من اخوكي العجوز .. بلاش والنبي صيغة مش عملت مش حسيت لأنها ركيكة وبتستخدمها بنات ثقلة ومش مناسبة ليكي:) قل ماعملتش ولا تقل مش عملت الله يخليكي:)
ربنا يشفيه ويشفي كل محتاج. هات يا بني علبة الكلينكس دي :(

KHALED-ELSAWY said...

ربنا يشفيه دي عائدة على الفنان يونس شلبي ربنا يشفيع فعلا

وينكى said...

والله انا كنت كويسه زمان.. مش عارفه ايه اللى عوج لسانى كده..
الواحد بقى بيلقط حاجات غريبه من اللى حواليه
وانت مش عجوز ولا حاجه.. دانت فى أشدك دلوقتى لأنك فى الأربعينات ودا اللى مكتوب فى القرآن.. هاتعترض بقى؟؟
(",)

khalakhelo said...

وينكي إنتي كيبوردك اللي اتعوج مش لسانك
موضوع العجز ده علاقته بالسن مش كل حاجة, بالعند فيكو انتو اللتنين
يعني انتا يا عم خالد ليك مجتمعك, بتعرف تشعرر, أظنك حاضر الذهن, لسه أول امبارح طالب 6 كتب كل منها يوزن بطيختين كبار
اللي عجز فعلاً هو واحد زيي مالوش هدف في حياته, فقد كل قدراته العقلية و بعض قدراته الجسدية, معادش يعرف حتى يتكلم, يمكن انتو متعرفوش عني كده لأنكم تعرفوني بالكتابة و في الحالة دي أقدر آخد وقتي في التفكير و التدوير, بس في الحقيقة أنا أكتر واحد أعرفه معجز, ده مش فخر لكن اعتراف بحقيقة

KHALED-ELSAWY said...

بس يا جدع انت مش عاوز اسمعك تقول الكلام ده تاني.. والأهم انك ماتقولوش لنفسك لأنك بترسخه.. قوم العب رياضة وانت نظرتك للدنيا حتتغير صدقني

Anonymous said...

please khalakhelo, try to think posetively and be optimestic all the time,even if u are going through obsticals and very difficult time,it is a test from God and beleave me,if u smile to the life and be optimistic ,you will be lucky and every thing will be chearfull in your life.

KHALED-ELSAWY said...

غصن البان ازيك؟ زعلت لما عرفت ان الصورة اتحرقت.. معلش خيرها في غيرها انشاءالله:)

Anonymous said...

Rebena Yekhelik ya Ostaz Khaled, ana kweyesa, Alhamdulluallah.
Thank God fe sura wahda.All my family send a very warm greeting to u Ostaz Khalid.

KHALED-ELSAWY said...

غصن البان اعتيلي ايميلك عشان عملت غباوة فمسحت ايميلات غلط وحبعتلك 2 صورة بدل اللي اتحرقوا:)