Wednesday, November 22, 2006

عالم قذارته تنضرب أمثال
ومالكش فيه غير المناهدة والخناق
اسمع حكايتي وافهم الأشياء
وحدك حتقدر ع الجبال السود
أسلاك وعصي ومحرقة وجنود
واللُغْم حي والاحتمال موجود
موجود لوحده قبل كل وجود
الحق.. سحر العالم المفقود
من أصل نور فايض على الموجود
بيجود وأصله في الأساس الجود
الحق شق في عتمة الأكوان
واما حلم.. خرج الخيال إنسان
حيوان ملايكي وفي طبيعته اثنين
خطيت وشالت بطنها الأخين
والخاطي كان الاوّل أبو الاثنين
اسمع كلامي وقلّب في الكلام واختار
من بعد غيبة قليلة نذكر المختار
أسمع صلاتك معايا ع الحبيب الزين
بالحق مرسل وكام مرسل بآية حق
لو آه تداويني ماقولشي غير اللأ
انا جاي اغني وان لزم أصرخ
الظلم ليّس وشها ولطخ
وخلق تنابلة تحرسه بصواريخ
مالكينها م القلعة إلى المريخ
والحق باصص والفؤاد ممزوع
على نوع بياكل عضم نوع
والنوح بينشر في السما بلواه
والطير بيرجف.. يشتهي مثواه
وعيال جواعى وكل عيل تاه
والأب غايب والعذارى شيوخ
والصلب يومي والطوفان هدار
اسمع حكايتي وصبرك لآخر المشوار
اسمع حكايتك معايا واشحذ المنشار
انا جاي اغني ويدّي فيها سيف بتار

4 comments:

Anonymous said...

اول حاجة ارد عليك و اقول
اللهم صلي عالنبي
اللهم صلي على سيدنا محمد النور و اله الطيبين الطاهرين

انا جاي اغني و في ايدي سيف بتار

قمة الفروسية
و مش عارفة ليه بالذات افتكرت الحر بن يزيد الرياحي و هو جاي مع جيش يزيد و ماشي مع جيش سدنا الحسين
تخيلته كانه هو اللي بيغنيها
يمكن اغنية الموت؟

مش عارفة ايه علاقة كل اللي بقولوه باللي انت كاتبه
لكن هي دي ميزة الشعر

بينقل كل واحد لحالة هو بيعيشها حتى لو كانت بعيدة عن المحتوى الاصلي للكلمات المكتوبة

دمت رائعا

KHALED-ELSAWY said...

طبعا فيه علاقة لأني عمال اتنطط جوة نفس المساحة بس على اتساعها.. دمت رائعة انت كمان:)

Anonymous said...

لو آه تداويني ماقولشي غير اللأ
انا جاي اغني وان لزم أصرخ
الظلم ليّس وشها ولطخ
وخلق تنابلة تحرسه بصواريخ
مالكينها م القلعة إلى المريخ
والحق باصص والفؤاد ممزوع
على نوع بياكل عضم نوع
والنوح بينشر في السما بلواه
والطير بيرجف.. يشتهي مثواه
وعيال جواعى وكل عيل تاه
والأب غايب والعذارى شيوخ



الله عليك
الله عليك بجد
لو بس كل اللى زيك كده يتجمعوا مع بعض و نعمل وقفة حقيقية هنوصل
مسيرنا هنوصل و نكيد العزال

KHALED-ELSAWY said...

ماهو الناس اللي زيي هنا اهم:) وانت معانا.. وحنوصل باذن الله.. تفاءلي