Friday, October 27, 2006

الحرب

الحرب بتهد البيبان
واحنا ف مكاننا مسمّرين
غلمان ف قصر الخليفة
خصيان أمير المؤمنين
مكتوب لنا دعك البلاط
وغسيل كعوب الجواري
وف حُق ضيق في الحرملك
عايشينها لت وعجين

الحرب هاجمة عالمكان
بتحش ما في وشها
واحنا ما فينا نخشها
متلطعين عالبيبان
زي الجراد بعد المطر
بنبص عالموت اللي طايح بالهبل
ونبص في الأرض بهوان

الحرب هايجة عالبيوت
غزلان بتجري من الخطر
وخيول تموت
واحنا ف قلب المعمعة
معششين في الصومعة
ندعي جيوش الموت تفوت

الحرب بتصحي الحياة
وبتخلق الناس من عدم
من بعد ما الحلم اتعدم
نرجع ونحلم بالحياة
الموت أهه! على بعد خطوة
الذل موت.. والدنيا شهوة
حارب عشان توصل لبرّ
وثور عشان تفضل نبي
من غير ما تدخل غمارها
وتدوق حلاوة مرارها
لا كنت وارث ديارها
ولا كنت أصلا بشر
أحلى ما فيها الخطر
ولا انعدام النخوة

7 comments:

Polka Dotted said...

يااااااه

ليه الكآبة دى

الكلام حلو اوى بس فعلا كئيب
ايه الى خلاك فى مود الحرب ده؟

عالعموم
كا سنة وحضرتك طيب

الخبز و الحرية said...

وانت طيبة
لو حاسة ان مود الحرب بعيد قوي اتفرجي عالأخبار شوية

albida said...

أولا... نورت البلوج يا أستاذ خالد
على فكرة وصل الكهرباء بتاع البلوج جه وانا دفعته
:) :)

عندك حق فعلا.... القصيدة دى بالنسبة للى بنشوف كل يوم فى الأخبار فيلم كارتون

بس ازاى نكون جزء منها؟ الموضوع مش بالسهولة دى

manal

Anonymous said...

بجد احنا لازم نفوق شويه ونحس انا احنا على أعتاب مصيبه كبيره قوى
احنا ملهيين عن اللى بيحصل حوالينا ودى مشكله
أما اذا كنا عارفين ومطنشين , فدى مصيبه
حمد لله على سلامتك يا سيدى ويارب ما يرجع الغيبه دى تانى
بس على فكره انا شكلى اتعديت منك لأنى ابتديت فى دور كحه سخيف
واتعديت منك لأنى ابتديت لأول مره فى حياتى أكتب شعر.. ودا من ساعه ما ابتديت اقرالك
وأنا موافقه على الاتنين ماداموا منك
(",)

^ H@fSS@^ said...

ما اروعه من تصوير
بالذات تصوير الرعب اللي بيعم علي كل مخلوقات ربنا
زي الغزال و الخيل اللي هما بيمثلوا كل حلو و جميل

كله كوم و تصويرك لحالتنا احنا
صور كتير كتير
عدت و العود احمد
الف حمد لله علي السلامة

في عليك شوية مستحقات ليا و لي منال عشان جبنا بلالين كتير و عصير و جاتوه علي امل انك تطب علينا في اي لحظة لكن مجيتش فخسرنا كتير
تحياتي

الخبز و الحرية said...

والله يا جماعة معنديش حاجة اقولها غير ان اتذكر قول السيدة وردة :وحشتوني وحشتوني وحشتووووووني":)
أهلا.. أهلا.. الخ الخ

Anonymous said...

انت خلتنى احب الحرب هو ده الاحساس الى وصلنى و على فكره الكلام ده مش كئيب بالمره