Friday, October 27, 2006

موال عشان الأحبة

شجرة عيلتنا مفيش فيها ورق رسمي
خالتي فصول البكا أما الألم عمي
وجدي ثورة صِغار لما تُثار ترمي
ف وش أتخن تخان المدرسة الكراريس
وولاد عمومتي دموع حافية تشيل فوانيس
وتمد كف الأسى بالشعوذة ف رمضان
وابويا لمحة براءة ف سالف الأزمان
هزمت أمير المطر واتقدمت لامي

8 comments:

الخبز و الحرية said...

شكرا فدوى
ابعتيلي اللي انتي كاتباه على الميل
ربنا يوفقك:)

Anonymous said...

حلوه جدا جدا جدا
عاجبنى الأسلوب والتشبيهات اللى فيها

^ H@fSS@^ said...

الله الله علي دي عيله
لكن اعتقد انها عيله كتير مننا هنا
لكن فكرة جديدة
اسلوب بليغ
عجبتني حكاية رمي الكراريس دي اوي لان ده اللي كنت بعمله و انا صغيرة لما محبش اذاكر و مكنتش اذاكر فعلا
و ده سبب براعتي في المدرسة
في حد بيحب الكحك؟؟
تحياتي

albida said...

تانى كحك يا حفصة
:)

طب عملتى حسابى فى ساندويتش البسطرمة ولا لا؟
:) :)


manal

albida said...

معلش يا جماعة فى كلمتين صغيرين أنا مزنوقة فيهم ولازم أقولهم

بمناسبة الموال الحلو ده, أحب انتهز الفرصة وأقول أن البلوج ده من أجمل الحاجات اللى حصلت فى حياتى
ربنا يخليلنا الأستاذ خالد اللى أدانا الفرصة أننا نشاركه أفكاره ونتكلم بصراحة ونتعرف على بعض! بجد التجربة دى حسستنى أن أنا جزء من شئ... وشئ مهم كمان

والله يا جماعة بجد ماتتخيلوش أنا حبتكم قد ايه... وياريت مانبوظش الشئ الجميل ده بسبب أى سوء تفاهم بينا... احنا أخوات وعلى راى
الأستاذ خالد البلوجرية ملهمش غير بعض
:)

يعنى لو فى أى حد سابنا هنبقى عملين زى الازازة اللى من غير غطا أو زى الباب من غي أكرة... حاجة زى كده ياعنى
:) :)

وأحب أهدى الموال ده ليكوا كلكم وخصوصا الأستاذ خالد ويارب البلوج بتاعه يفضل مفتوح بوجوده معانا و.... بس خلاص

معلش طولت عليكم زى الاعلانات الرغمة اللى بين المسلسلات
:)

manal

الخبز و الحرية said...

فدوى الكلام اللي قلته عن 11 سبتمبر هو التحليل اللي انا مقتنع بيه وهو ان الطبقة الحاكمة في امريكا قامت باستثمار 11 سبتمبر لتحقيق اهدافها الحيوية من سيطرة على بترول العالم وبسط نفوذ كامل على كل البؤر غير المتوافقة معها..الخ
واله يا منال مشاعر جميلة والحمد لله ان كثير منها حاسينها:)

^ H@fSS@^ said...

منولة حبيبتي الكحك اللي انا اقصده هو كحك من اللي بيجي في الشهادات اجارك الله بيبقي احمر و ملعلع
هههه
تحياتي

nour said...

حلوة اوى على فكرة يعنى سمعتنى عزف الناى كأنه جنبى
منولة يا حبيبتى انت بتفكرى زييى بالضبط و على فكرة انا مدمنة رفعت اسماعيل
حفصة وحشتينى جداااااا