Tuesday, May 22, 2007

الوداع يا جمال

كأني حفار قبور مخمور ومسطول موت
بكتب ف نعي الأحبا خليل ورا الثاني
واشرب ف نخب جمال سي العربي الحياة والموت
وأعزّي فيه البشر.. ولا حد عزّاني

كثر المراثي يقسّي ويلكم الإنسان
حنقول ونرغي ف إيه والحبل عالرقبة؟
من مية سنة بعرفه واسأل جبال وهران
جمال جبل في الجزاير.. والسفح في العتبة

المرء صيته شعاع ليزر يجوب الكون
واسم ابن آدم حمام زاجل يعرّف بيه
عرفته قبل امّا اقابله سمعت جدعنته
ورأيت عينيه الجريئة ولحيته الرزّي
جمال حبيب الغلابة وجنة المطاريد
مطرود وهربان تمللي كالرسل تِمّاً
ماحلفش ياخد بحقه حلفا مالدنيا
ولا حلف عالردى ولا خرّ قدامه
يوم ما الكئيب دق بابه هب يفتحله
ولم حاجته ورحل بكرامته صباحي
آه.. الوداع يا جمال يا عاشق الملايين
سفر مفيش درجة أولى فيه ولا سياحي
والله ما اعرف حنصحى بكرة نرثي مين!
مافضلش من جيلنا أي ملايكة بترفرف
بهائي سافر وصالح والسفر طوّل
منصور.. عمر نجم.. حسن عبده ومصيلحي
ومجدي أحمد وفانيا وشادي ويماني

كأني حفار قبور مخمور ومسطول موت
بكتب ف نعي الأحبا خليل ورا الثاني
واشرب ف نخب جمال سي العربي الحياة والموت
وأعزي فيه البشر.. ولا حد عزاني