أقولك إيه؟؟

أقولك إيه؟
لساني زمبلك ضاعت مفاتيحه على أعتاب بيبان الليل
ومخي مرتخي الأعصاب حمل كفنه على كفيه
ودمي الحامي متجمد، كسرته ف كاس ورجيته
قلبته وريقي كان ناشف وكان بدني قميص محني على كُمّيه
وشديته ما كلمني وجريته وجرجرني
ونمنا عالرصيف ساعة كوانا البرد كان البرد زي النار بيلسعني
أقوم ألقف على بدني
ألاقي الرغبة في نهديكي كيس من دم متحني بُه المقتول وكان بدني
وكان الدم متسرسب ما بين رجليه
أقولك إيه؟

غسلت البنطلون مني لقيت لوني ماعادلوش لون
حلقت الدقن حتى شفت شرخ الحيطة في ضهري
وسرحت البياض في الشعر قام واقع جدار البيت
رأيتني في المرايا بقيت دواير مالصابون والدم جيت أضحك
لقيت خطين من المعجون
سحبت البدلة والمنديل
شعرت بإيد على الرقبة بتخنقني .. كانت إيدي
ف ناحية زرار يبرقلي وناحية بتربط البابيون
لبست الجزمة كات أضيق
وحطيت الحزام عالكرش واتفتّق
ووردة ف عروتي تنطق بلون الجنس في ابريل
وحطيت الطبنجة فوق على قلبي وجيت أنزل
لا كان فيه باب ولا شباك ولا طاقة ولا طرقة
ولا إيدي بقت تطرق وانا بطرق
ولا رجليا شايلاني ولا سامع صراخي بكيت وجيت ألمس مكان فمي
لقيت كمي مفيهش إيدين حاولت انظر لقيت وشي بيتاكل
وراح واكل حبابي عينيه
أقولك إيه؟

أنا شايفك غسلت جسمك الكوكب بلون الزيت
وصار يلمع ويتبخر عليه الميّ
كجسم حصان بيرمح والعرق فضة
وفيه نجمين من الشباك بيختلسوا الدخول بالضيّ
وانا عارف بأن البطة بعد ما تنفض المية حتتمدد على البشكير وتتأمل ضوافرها
وانا حاسّك دهنت القشطة عالخدين ولون أحمر صبغ كتاكيتك العشرين
وبتراهني حتتربى على صدري وبكرة تطير
وشعرك ناعس النظرة على كتفك عشان يسهر
ويسبح في ربوع الليل ويصبح شال على دمي أحن إليه
أقولك إيه؟

صحيت اليوم لقيت اللذة مبتزّة من الضل اللي كان شاهر ف قلبي بلطته ووشه مفيش تقاطيع
مهوش ناسك ولا شيطان ولا ساحر وقام ماسك بطرف القلب واتشمر وراح نازل عليه تقطيع
سكبت السائل البني وفاجئني بملمس نار وريحته بارود
سقط لحمي حتت خضرا لقيت وشك بيتجمع على قدمي يبوس دمي
ويضحك وجهك الدامي بكا ويضيع وانا محني بلملم فيه
أقولك إيه؟

حنتقابل .. إذا يعني حنتقابل
حنشرب؟ إفرضي مثلا
حبوسك؟ ثم إيه يعني؟؟ مهوش فمي ولا خدّك
وحاخدك بين جناحيني واطير فيكي؟
على عيني.. مليش جناحين
وف إيديكي حيطلع لحمي ف إيديكي حيطلع لحمي مش عارف أقول إزاي
بحبك؟ مش أكيد أبدا
يجوز معرفش أقربلك سوا في الضلمة فيه زحمة على سريرنا مابيننا فيه ميتين ميت وألف جريح
ونفسي أبوح بسر الكون أنا عارفه ودافنه بين ركام الكبت والتصريح
وروحي تحوم على جسمك
(بحبك إنهضي يللا وحاوطيني بثوب الوجد فرد حمام على صدري وبيت عالقد نكبر فيه)
أقولك إيه؟؟؟
ضفيرة في الخيال محلولة في شعرك
شريطة حمرا مخمورة على خصرك
قلم أحمر كتبنا بيه على الشجرة .. على شفتيكي يتطوح صباع الروج
(صباع مقطوع! على شفتيكي يتطوح صباع مقطوع!!)
شاورنا بيه وقام طاير
خيالي فين مفاتيحه؟
وفستان روز
وكورة في الشراب الابيض وميت أراجوز
(بحبك إنهضي يللا)
ونضحك كي يعود لحمي
(بحبك إنهضي يللا وحاوطيني)
وابوس أمي .. تودعني بضحكتها على السلم
واقابلك كفي في كفك ونتحنجل
نروح لبعيد بعيد خالص ونفتح قبر أجسامنا
نلاقينا بنتمدد ف سن اليأس امسّ إيديكي لا تخافي وانا جنبك ولا تبكي
(أنا صاحبك وانا حِبِّك)
وازيحنا .. ألقى سر الكون
أنا عارفه .. ودافنه .. من زمان خالص بروحله لما احن إليه
أقولك إيه ؟
أقولك إيه ؟؟