Friday, October 27, 2006

على الصليب

أنا عالصليب وف كِلْوتي المسامير
وانا بس واحد من ضحايا كتير
متشعلقين إخواني حواليا
لافّانا نسمة هوا حرة.. ومرثية
وعلى دماغاتنا تشمشم العصافير

أنا عالصليب بنزف وبتألم
أنا مش يسوع.. أنا عبد واتكلم
بتحدى روما بكل أساطيلها
بالإف 16..
وبكل قنابلها
وبالجحافل دايرة تتسمم
من قوت عيالي.. من ضيا عيني
بيني وبينك.. مش أموت أرحم؟
انا ليه أعيش لو كنت مش بحلم؟
لو مش ف حضني حلم أفرح به..
يكبر كأنه حبو الضي عالحيطة
ملعون أبوه اللي وطى..
ملعون ولاعن عياله
مختوم وخاتم عليهم..
بالذل والانتظار

أنا عالصليب زي القمر بضوي
أعيش شهيد.. تمثال مفيش مانع..
ولا اكونشي يوم للمظلومين عبرة
أنا عالصليب وانت ف إيديك الفاس
إضرب عدوك دي الحكاية خلاص
الشر حاكم في البلاد والناس
والظلم واحد لو وشوشه كتير
إقتل بقى من مبدأ التغيير
مش كل مرة تتقتل وتقوم
مظلوم تعيش وبتتقتل مظلوم
طب ما تسايسها زي ما هي سايسة
إضرب جدورها.. هزّها واقسى
خليها تفتح باب جناينها
وتغرقك بالعطر والأسرار
هو السؤال وجوابه في المكتوب..
عاوز تموت غالب؟
ولا تعيش مغلوب؟

16 comments:

الخبز و الحرية said...

جدا يا صوفية..
اشكرك على العين اللماحة:) انا فعلا حسيت اني لقيت لحظتها اللي يبرر القصيدة نفسها.. هو ده مربط الفرس:)

Anonymous said...

أشارك صوفيا مشاعرها 100% وانحنى لك احتراما سيدى

Unknown said...

اقتل بقى من مبدأ التغيير
مش كل مرة تتقتل وتقوم

جميل اوى البيت ده لأنه بيشجع على الفعل و لو لمره واحده و من غير تفكير كتيرو ولو من غير مبرر الا مبرر التغيير نفسه و الى فى حد ذاته مبرر قوى جداً و مهم جداً

karakib said...

ما يمكن تموت مغلوب ...
انتوك

^ H@fSS@^ said...
This comment has been removed by a blog administrator.
Nohaz said...

حلوة قوي قوي قوي قوي قويييييي

Nohaz said...

حلوة قوي قوي قوي قوي قويييييي

Nohaz said...

تعبيراتها حلوة قوي كل شوية اجي ابص عليها و تعبيراتك الموحية بشدة الألم جميلة جدا
كل ما اتخيل كلية فيها مسامير و انسن مصلوب مش بأيده يحوش أذي عن نفسه
صعبه و جميلة قوي

بتدعي لي ولا لا...؟؟؟؟

^ H@fSS@^ said...

...
وقفت كتير قدامها
مش عارفة اشكرك فيها علي ايه و لا ايه
"
اكون عالصليب
اعيش شهيد
و لا اكونشي يوم للمظلومين عبرة
بتفكرني بدنقل لما بيقول

معلّق أنا على مشانق الصباح

و جبهتي – بالموت – محنيّة

لأنّني لم أحنها .. حيّه

و كمان لما بيقول
لا تخجلوا ..و لترفعوا عيونكم إليّ

لأنّكم معلقون جانبي .. على مشانق القيصر

فلترفعوا عيونكم إليّ

لربّما .. إذا التقت عيونكم بالموت في عبنيّ

يبتسم الفناء داخلي .. لأنّكم رفعتم رأسكم .. مرّه !

معلش لاطالتي
لكن الصور عندك معبرة جدا
و يمكن ده يكون الرد على سؤالينك الرائعين

و يا انتوك لو فكرت في كل اللي ماتوا عشان كان ليهم قضية او مبدا بتلاقي انهم عمرهم ماتوا معنويا عند اتباعهم
من اول سيدنا عيسي
مرورا بالحسن والحسين
بجيفارا و مالكوم اكس و غيرهم كتير

تحياتي

الخبز و الحرية said...

شكرا آنسة وينكي:) وايم هو انا بس احب اؤكد حاجة ممكن تبقى اهم من القصيدة نفسها..انا مش بقول اقتل من مبدأ التغيير بمعنى اقتل من باب التغيير ..لا طبعا.. قصدي من باب تغيير تلك النهاية العقيمة التي تتكرر معك دائما .. يعني خد حقك مش ايه رأيك تجرب حاجة جديدة..امم اقولك.. اقتل مثلا! معلش كان لازم اؤكد بس:)
يا انتوك خنقتني بهذه الجملة بصراحة:) يعني اموت مغلوب ليه طيب؟ ما هو انا عاوز الانسان ينتصر لمبادئه ولو مات دونها لأن ده موت اشرف من حياة عبد ذليل.. تقوم تفسخلي الحلم النبيل ده يا اخي.. روح منك لله:)
والله يا نهى بدعيلك من كل قلبي .. يا رب يا نهى يا بنتي يديكي على قد نيتك.. حلوة الدعوة دي ولا ايه النظام؟؟
شكرا يا حفصة بس لما حطيتي كلام العظيم امل دنقل جنب كلامي حسيت انك بترشي عليا جردل مية بصراحة:) حسستيني بضآلة كلامي جنب كلامه :(
عموما يا جماعة اسمحولي اقول لكم انا منفوووووووووووووووووخ وحطق من الغيظ والغل من ساعة ما عرفت باحداث السعار الجنسي في العيد وبصراحة الوش بيضحك والقلب معبي..
صباح الفل عليكم وربنا يدينا على قد نيتنا

^ H@fSS@^ said...

لا يا سيدي ضآله كلامك ايه بس صلي عاللي حيشفعلك يا خالد بيه
انت لما تفكرني بكلام عظيم تبقي انت كمان عظيم
و البلاغة كلها انك جبت صورة حلوة جدا ومعبرة اوي و برسمة ريشة خطيرة و ادت لنفس المعني و لعلمك ده معني مش كتير يقدره يوصلولوا او حتي يفهموه
حقلك ايه
تنقطع ايدي اذا رشيت عليك ميه او خليتك تحس بكده
يا نهار ابيض
هو انا اقدر برضة
تحياتي

Nohaz said...

لالالالالالالالالالالا بلاش نيتي .. انت ناسي مسلسل ونيس وجدي و حريصة اما ام وجدي قالت روح يا ابني يديك علي قد نيتك
يا خبر يا خبر
لا لا لا لا

Nohaz said...

صحيح موضوع احداث العيد ده عايز روقان بس في نقطة عايزة اقولها ان التخطيط العمراني الفاشل احد اسباب الي حصل ده و لو تحب اثبت لك كلامي علميا
مقلتش رأيك في موضوع chaos theory
لو كنت فقدتها قل لي ارسلها تاني

الخبز و الحرية said...

نهى مش لاقي موضوع الفوضى من فضلك ابعتيه

nour said...

المفروض اول ما حد يتسأل السؤال ده يرد على طول اموت غالب بس معرفش ليه مش عارفة ارد..ممكن لانى حتى لو عايزة اموت غالبة مش هقدر و فى الاخر هموت برضه بس مغلوبة..
انتوك بيكتبنى و الله يا جماعة
حفصة انت كاتبة مختارات من شعر امل دنقل المفضلة عندى اللى كتباها على الحيطة فى الاودة بتاعتى

Anonymous said...

I have been away from Egypt for a while, but when I read about the downtown incident, I could not help but cry, and i imagined myself in that situation and felt my whole body tremble and I started crying out loud without knowing it, till a co-worker of mine walked over to see what was wrong with me...I had to make something up coz I couldn't tell him the truth..I was ashamed!

I couldn't tell him That Egypt that I talk about night and day is no longer baheya elsabeya, and that it's a monster that eats up even its own kids

Feinek ya mar....begad feinek...de mesh balady we dool mesh ahly...dol nas tanya ana 3omry ma 3ereftohom...wala 3ayza a3rafhom

Walaa
Canada Nov the 2nd