Thursday, October 19, 2006

البنت دي

البنت دي أنا حبيتها
لله كده .. إستحليتها
وعينيها إيه يخرب بيتها
كاشفاني فشر السي آي إيه
لا حقول دليلة ولا عبلة
صحيتني على ضربة نبلة
بعتالي كيوبيد بنت الإيه
يديني على قد النية
أتاريه معاها وعليا
يرشقني سهم ابن الحية
ويسيبها سارحة في الملكوت
وغيرها واخد طلقة موت
وانِس معاها ابن القاسية
وهي أقسى خلق الله ..
يدوبه نني عينيها
مش بس صايداني وماشية
قال إيه كمان حاكمة عليا
إني أعيش ملك يمينها
معرفش ليه أنا حبيتها
مع إنها مش مع قلبي
لا وافقتها ولا وافقتني
لكني متشعبط فيها
من دي حجيب بنتي وإبني
وأقضّي عمري تناقرني
وادوق معاها حلاوة الروح
البنت دي غير السابقين
ويشهدوا كل السامعين
مفيش حاجات تجمع بيننا
لكن أشوفها معدية
ألقاها بتعدي ف بيتنا
مالسفرة جاية على الصالة
لابسة قصيرّ حرانة
بتغني مش حافظة الغنوة
وتبصلي كده حيرانة
ماسكة في طرف جونلتها
أموت انا على ضحكتها
وأسكّ على نشرة الاخبار
نلعب ونلعب لعب صغار
بعدين بيقلب لعب كبار
ونخش دنيا بدون أبواب
آدم وحوا ف أوضة نوم
عاملينها على ذوقهم همّا
لا فيه شيطان ولا فيه غمة
لا كدب لا فرقة ولا لوم
ولا بخل في الزاد الروحي
ولا روح سوى روحها لروحي
تقول منايا أقول روحي
على شرط من غير ولا كلمة
من بعد ما الإنسان كافح
وكتب رسالته ف صدر الكون
وبَدَر ف دنيا كان عابها
وكان يخاف من أنيابها
دنيا يوماتي بتمتحنك
واما تغالبها تفتحلك
وتدخلك عالم علوي
لا تقولي صوفي ولا علَوَي
بدراعك الكون ده بتاعك
ويابخته ياللي يبات غالب
وانا في الحياة دي لسه يادوب
مغلوب لكني بحدّف طوب
مستنظر اليوم المكتوب
إن ينصرك مين الغالب ؟
ارمي السلام وده شيء لله
واللي يقدم شوق بيداه
يلقاه كما كان يتمناه
من قلبي ده إتمنيتك
عاوز أنا عنوان بيتك
وحجيب انا بن محوج
وان كان ابوكي حيتشنج
حجيله ساهي ومتبنج
وان كانت امك مش راضية
حاوي وجيوبي مهيش فاضية
خليكي حد بيشفعلي
وكفاية غربة ف أراضيكي
على سنة الله ببغيكي
على سني ده ميت فيكي
وان كان ده كدب يا رب اهلك
قوليلي طيب هات أهلك
خللي امي تفرح يوم تاني
من بعد ما جابتني الدنيا
ماشافتش يوم ينصف فيا
آخر الكلام انا حبيتك
حبايبنا حابة تجاملنا
أهالينا عاوزة واد قمور
والحي ضلمة وطالب نور
جبت المزاهر والحنطور
وطلعت أجري على بيتك

71 comments:

albida said...

بجد بجد بجد رائعة... دى عجبانى موت يا أستاذ خالد
و الله العظيم مش عارفة أعلق عليها أقول ايه! بس هى تجنن
مش عارفة... خلتنى أفكر و أضحك و أعيط و أحلم فى وقت واحد

اذا كان ده حلمك و هو منقول على الورق امال فى دماغك عامل ازاى؟


manal

^ H@fSS@^ said...

روعه
حلوة و شقيه و المكر بينط منها
بسم الله ما شاء الله المود عالي اليومين دول
الحمد لله مش بحسد

لا بجد كتير
كده حتي حرام
براحة علي قلوب العذاري يا خالد باشا
تحياتي و بجد يا بختها
ههههههههه

Unknown said...

حلوة
موسقاها خفيفة الظل
أول مرة اشوفك بتحرص على الموسيقى الخارجية وعلى كد ماهى خفيفة الظل على كد ماهى على قدر عالى من الزخم
بس برضه ادى فرصة للناس تعلق عليها
وكفاية تدوينات لمدة يومين
وإديها لفة ع الجيران
المدونين
شوفهم بيكتبوا إيه
وجاملهم
بكيس جوفة تحت باطك
ولا شوية كعك جاهز
لزوم اليومين المفترجين
ويجعله عامر
يا خالد بيه

^ H@fSS@^ said...

اضم صوتي لصوت ابو امل
يا ريت تعيد علينا بكيس بمب يبقي اخر تمام

eshteraky said...

بجد صناعه فنية جيدة جدا - كشعر - أما الموضوع مش عارف وصلني معاني غريبة زي مثلا " واسك علي نشرة الاخبار " انت اكيد هاتفهمني.... بس بجد عمل لطيف جدا و جديد

albida said...

لا بجد يا جماعة القصيدة دى جامدة جدا.... متتخيلوش هيا منخششة فى دماغى اد ايه
عايزين ندى الأستاذ خالد عليها جايزة... ولا أقولكم.. خليها كيس جوافة أحسن علشان "الأنفلونزا الحقيرة" اللى عنده دى
:)

أنا أتفق معاكى يا حفصة) :)

manal

^ H@fSS@^ said...

تتفقي معايا علي ايه بس يا منال؟؟
كيس البمب و لا الرحمة بينا
هههههه

albida said...

بتفق معاكى على البمب طبعا
:) :)
و لو فى صواريخ مفيش مانع

و على أن القصيدة دى حلوة و شقية


manal

ام العيال said...

جميله
شقيه
معبره
بس يالله اعملها بجد و اتجوز بقه
ماتنساس تعزمنا
:-)
مش حاجي من غير العيال

Anonymous said...

اممممممممم
كويسة
مش بطالة يعنى ككاتب مبتدىء



ههههههههه

واللة باهزر
حلوة اوى فكرتنى بحاجة زمان قريتها لبيرم التونسى اللة يرحمه بنفس الاسلوب المحبب للنفس
ممتزج بلمسة من تراث سيد درويش


يعنى مقطوعتك دى عاوزة لحن زى الحان سيد درويش اللى بتتسمع للكادحين من الشعب وكلاماتها توصل للقلوب قبل العقول


الة الامام يا خالد جاهين

شهروزة التونسى

Anonymous said...

U know wht Khaled, this piece 7asesetny b kessa ma3roofa awy, dayman bashofha, el bent wel walad aw el sett wel ragel, el ertebathom mosta7il, or i mean estemrarhom ma3 b3d mosta7il, el sefat beta3ethom heya di bzbt, engezab faziiii3, e7'telaf kbir 3adatan fel sha7'seya mslan wel meyool, w 7agat ktir, bas fih benhom engezab Qatel, howa da may b el bey7'alihom ye7awlo yebno 3aleh 7aga, ay 7aga, laken lel asaf betkoon nehaya msh sa3ida, la2en zay ma dayman ben2ool el 7ob msh koll 7aga, laken hatfdal el kessa di tetkarar tool ma el ensan 3ayesh, ay 7ad sa3at bey7es na7yet 7ad b engezab fazi3, le daraget en el sha7's momken ye7es en el tany da sakno! lama el denia btb2a over kda byb2a f3lan msh 7ob 7a2i2y, byb2a engezab bas, natiget b2a "physical appearance" aw el"aura" aw el effect bta3 el sha7's, aw natiget el e7'telaf, y3ni "opposites attract" sa3at, bas mahma el ensan we2e3 f 7alat zay kda w et3alem enaha msh sa7, brdo el mawdoo3 byrga3 yetkarar m3ah la2eno msh beyfakar b 3a2lo sa3at..masha3erna aslaha 7'ayba sa3at ktir betgorena le tari2 masdood, bas BENESTA7LAH :))
sorry tawelt..

الخبز و الحرية said...

اولا شكرا للجميع وشكر خاص لكل من قال لي الف سلامة:)
ثانيا القصيدة دي من كذا سنة وصاحبتها راحت لحالها (وراحت لصاحب النصيب بعد كده:)
ابو امل حتلاقي عندي حاجات كثير بشتغل فيها على الموسيقى الظاهرة وحاجات كثير على الموسيقى الكامنة، وعاوز اشرحلك حاجة مخلياني منكب على التدوين وخاطفني عن اي نشاط ثاني، لسبب ما حاسس اني في صراع مع الوقت، عاوز الحق احط كتاباتي على البلوج، شوية وحتهدى الحكاية أكيد:)
اشتراكي انت عارف طبعا اني اشتراكي جدا ومش شايف اي مشكلة اني لما الاقي حبيبتي بتتحرك حواليا وهي شهية كده ما أسكش على الأخبار لحظتها:) وده مش معناه اني بسك عالقضية اكيد.
والله يا ام العيال ايدي على كتفك:) حكم انا حظي في الموضوع ده قليل او يمكن مش قلة حظ لكن قلة عقل:)
بويتيك فيرس موافقك وانا شخصيا بعد التجربة دي اختلفت معاييري تماما.

Anonymous said...

يا بختها، ربنا يهنيكوا يا سيدي :)

bluestone said...

الموسيقى فيها مختلفة وحية جدا
الصور معبرة وخفيفة قوي ..
وأحلى ما فيها ان طعمها مصري قوي ... ميقدرش حد تاني يستطعمه
تحياتي يا استاذ

من القلب said...

انت سمتها ضربة نبلة
و انا باسمها دقة شقية
بتفط و تنط جوه القلب فجاة
و بتخطف روحك معها
و تنعس العين وايها
و مش بتشوف ولا تحس الا بعشقها و هواها

كلاماتك رقيقة و من القلب

من القلب said...

انت سمتها ضربة نبلة
و انا باسمها دقة شقية
بتفط و تنط جوه القلب فجاة
و بتخطف روحك معها
و تنعس العين وايها
و مش بتشوف ولا تحس الا بعشقها و هواها

كلماتك رقيقة و من القلب

nour said...

البلوج بتاعك وحشنى جدا يا استاذ خالد بقالى فترة مختفية و كنت هموت و اشوف الجديد بتاعك اقوم اول ما اجى كده اتكعبل فى الكلام الرائع ده؟مفاجأة بس جامدة جدا يا استاذ خالد..كل اللى على البلوج وحشونى جدا كمان منال و حفصة و انتوك ازيكوا..

nour said...

نسيت اقول حاجة..ولا روح سوى روحها لروحى..
حلوة اوى الجملة دى حلوة جدااااا

albida said...

وحشتينا أوى يا بينتى

بعد أذن الأستاذ خالد أنا هاروح أجيب حاجة ساقعة و جاتوه علشان نحتفل برجوعك
:)

manal

Polka Dotted said...

Gamda MOoooooOOott:)
begad it made me laugh alot

great rhyme... light funny words

الخبز و الحرية said...

يا جماعة والله القصيدة دي قديمة:) كده بتحسدوا واحد عنده انفلونزا مش اكثر:)
مبروك يا رجازة بس اللي في الصورة ايه بالضبط؟ حاسس انها كده من اعمال الفنان الشاب فاروق حسني:)
سيزر بص.. مفيش حركة بعينها مقدسة، المقدس في رأيي هو الأهداف، لما الحركة تفيّص -لا مؤاخذة- مانفقدش حماسنا لكن نعمل حركة ثانية وهكذا.. زي الحب، حتبطل تحب عشان علاقة او اثنين ريحوا منك؟:) ولا يهمك..المستقبل لنا باذن الله.

شكرا بلوستون، لو عاجبك الجو ده يبقى بصي على الارشيف حتلاقي حاجة مصرية قوي انت حتلقطيها لوحدك، شوفيها وقوليلي رأيك:)
نولافنلف ساعات بيبقى النقد ارق من الشعر نفسه زب ما في حالتك:) شكرا.
ايه يا نور؟ فينك؟ اهلا اهلا:)
يا منال سبق وقلت انكم هنا اصحاب بلوج مش ضيوف:)
شكرا بطابيط:)

eshteraky said...

استاذي الجميل اكيد طبعا انا فاهمك كويس جدا و ماقصدتش الادب مش لازم يكون بيوصل معاني بشكل مباشر بس يمكن انا احساسي غلط او مشوش بس انا لما قريتها تاني احساسي الاول اتغير
بجد موضوعاتك موفقة

أم أحمد said...

ياسلام علي الحب طب ليه ماكملتش للآخر وألا انت من الناس اللي بتخاف من الجواز ومشاكله ؟

Anonymous said...

حلوه طحن
بس انا ليا تعليق مش عازفه صح ولا احساسى غلط
انا حاسه انك عندك روح رومانسيه عاليه قوى بس بتيجى فى لحظه ترشق خنجر فيها يخرجك من الجو الرومانسى على روح قتاليه غالبه و مسيطره عليك
يا ترى احساسى صح؟

أحمــــــــدبــــــــــلال said...

تحفة جميلة الاغنية
بجد أنا حاسس بيها أغنية

لازم تعمل حقوق للنسخ و الطبع من الموقع لأنه ممكن يستغل أستغلال سئ

أحمــــــــدبــــــــــلال said...

معلش الاغنية نسيتنى أقولك سلامتك
شفتك فى ندوة مع رفيق الصبان و أنت بتتكلم عن فيلمك الجديد و تحفتك السابقة عمارة يعقوبيان

بس على العموم سلامتك العيال دى حسدوك

Anonymous said...

Hey Khaled, it's my first visit to your blogspot.. what you're writing here is amazing.. and so heart-breaking.. if this is a true story yeb2a ya ba7'taha:-)

Anonymous said...

يا لهوى يالهوى يا خراشى
ايه الكلام اللى يدوب القلب دا؟
انا مش قادره أفكر حاليا

بجد انت خساره يابنى فى العزاب
إزاى ما اتجوزتش لحد دلوقتى وسبتها محرومه من كل المشاعر دى
لازم تلحق نفسك وتدور عليها

الخوف الوحيد هو انك بعد الجواز تتحول لواحد من إياهم
من بتوع البدله الصيفى والصلعه اللى بتلمع من العرق والنظاره الكعب كوبايه
والبطيخه تحت باطك اليمين والجورنال تحت باطك الشمال
سواء بقى فى الحقيقه , أو على المستوى الفكرى والإبداعى
أنا مش قصدى حاجه
آدينى باقول آهوه م الأول لحسن أكون لبخت
معلش.. أثر التنفيض والاستعداد للعيد
وكل سنه وانتوا طيبين
ماتيجوا نصلى العيد مع بعض ياولاد؟

Unknown said...

برضه ما جيتش
شكلى هنفض لك
هزورك ومش هاعلق
تانى
الا قولى ممكن تعمل تدوينة تشرح فيها بعض الأيديولوجيات
كتبتها بالعافية والله
السياسية
زى الناصرية والإشتراكية
والشيوعية
واليمين والوسط
واليسار
واللى فى النص
واللى برة الحسبة
ولك جزيل الشكر
من قاريء
صحف معارضة
لا يفهم شيئاً من كل هذا

Unknown said...

إلى امى
يرحمك الله
فى جنات النعيم

أُكتب بالرصاص said...

خالد باشا
انا لسه لم اقرأ القصيدة
لكن حبيت اقول لك
كل عام وانت بخير
وألف سلامة
سلامات سلامات
إن شاء الله ماتشوف شر

شفاك الله وعفاك

:)

يا مصر اكتب إليكي رسائلي said...

سلام عليكم
الاول :
الف سلامة من الأنفلونزا يارب تم الشفا يا رب
التاني :
يشرفني ان اتقدم بخالص التهاني وأطيب التمنيات القلبية بمناسبة عيد الفطر المبارك اعادة الله علينا وعليكم وعلى مصرنا الحبيبة بكل خير .. مع خالص تحياتي وكل عام وانتم والأسرة الكريمة في أسعد حال.
التالت :
وعشان جيت متأخر ، تأخيرة بتأخيرة ، اقرا بقا تاني وتالت وعاشر اتمتع الاول ، وارجع احاول يعني اقول ولو جزء من احساسي بالكلام دا ربنا يوفقك. وكل سنة والحبايب كلهم طيبين.

شيمـــــاء said...

عجبتنتى موت
واحد ابن بلد بجد بيقولها
تحس فيها اوى بواحد مصرى ابن بلد

تفاصيل الحدوتة كلها حلوة اوى

حسيت فيها كده تلقائية غريبة
فكرتنى بفؤاد حداد

فكرتنى كمان
جملة وعنينيها ايه يخرب بيتها
بكوبليه فى اغنية لوجيه عزيز
اغنية زعلان شوية

بجد قصيدة حلوة

وبعدين انت زعلان كده ليه
اللى انت قلته ده كله
اى راجل بيتمناه فى نصه التانى
راحت لصاحب نصيبها
بكره تيجى اللى من نصيبك

تحياتى على القصيدة و الجدعنه والشقاوة اللى بتنط منها

^ H@fSS@^ said...

يا جماعة احنا شكلنا فعلا ضربنا الراجل عين
بعد كده قبل ما نعلق علي حاجة نصلي عالنبي و كل من له نبي يصلي عليه
و نخش برجلينا اليمين عالبلوج
و نخمس كده في وش بعض
و يا ريت لو منعلقش غير يوم خميس
او يوم اتنين و تلات مع بعض عشان مجمعوهم خمسة برضة
و اللعنه الله علي فيرس الانفلونزا
تحياتي

nour said...

ربنا يخليكى ليا يا منال..يا استاذ خالد والله واحشنى ووحشانى كتاباتك مش حايشنى عنها غير الشديد القوى وكمان انا اخر واحدة تقولك الف سلامه..!فلا نزل القطر يعنى:)

m_elsewedy said...

اولا انا اول مرة ادخل عندك هنا
ثانيا انا لسة أمى إمبارح بتقولى لما شافتك فى التلفزيون مين ده
قلتلها ده احسن واحد بحب اشوف تمثيله رااااائع
:D
ابص النهاردة الاقى مدونة ليك
اكيد امى دعيالى

بجد انت مالكش حل

والف سلامة عليك يا ماااان على رأى فادى فى ظرف طارق
:P

albida said...

عندك حق يا حفصة
احنا مش هنجيب للأستاذ خالد كيس جوافة وبس... لا, عايزيين نجيبله خرزة زرقة كمان
:)


manal

أم أحمد said...

انت كدة قلقتنا عليك بجد لو دخلت المدونة تاني لازم تطمنا مش متعودين منك الغيبة دي
صحيح البنت اللي طالعة بنتك في المسلسل رقيقة اوي اهو انا نفسي يبقي عندي بنت بالرقة دي
ألف ألف سلامة ان شاء الله اللي يكرهك
أم أحمد

Anonymous said...

والله يا خالد الف سلامة عليك متأخرا شوية بس ان شاء الله تكون احسن دلوقتي

....

ويا رب تلاقي البنت الي بجد حتحبها وتحبك
الي من نظرة عين تفهمك
الي عقلك وقلبك يقولو هي دي مافيش غيرها

والمرة دي تكون الرؤيا اوضح ويكون القدر
كاتب قصتكم على الحجر

ليثبت للابد

وكل سنة وانت طيب يا احلى فنان وانسان

^ H@fSS@^ said...

طيب يمكن سافر بيعيد؟؟ ما هو بشر برضة
لكن لو لسه عيان يبقي حد فينا عينه كانت مش و لا بد
هههههههه
ربنا يرجعه لينا بالسلامة
قولوا امين

albida said...

اااااااااامين يا حفصوصه

عندك حق, ماهو برضه بنى ادم ولازم يعيش حياته
كويس أنه سايبلنا البلوج بتاعه مفتوح
ادينا قاعدين نلاغى بعض عقبال ما يرجع بالسلامة
:)


manal

Anonymous said...

ايه الشغل الجامد ده
انت لازم تكون شاعر غنائي

nour said...

فينك يا استاذ خالد..لا بجد ربنا يكون فى عونك اكيد مطحون فى الشغل و فى الانفلونزا الف سلامة ..حفصة و منال ازيكوا وحشتنى مشاغباتنا جدا

albida said...

وأنتى كمان وحشتينا

يارب الأستاذ خالد يرجع بسرعة علشان بجد البلوج من غيره وحش جدا

عايزيين انا وانتى وحفصوصة نعلق بلالين فى البلوج علشان لما الأستاذ خالد يرجع
:)

manal

^ H@fSS@^ said...

حاضر يا منولة و ماله
نعلق بلالين بس هو يقول هو جاي امتي
و كمان نعمل كيكة و عصير
تحياتي

Anonymous said...

أستاذ خالد
كل عام و أنت بخير
البارحة شاهدت فيلم عمارة يعقوبيان
لقد بكيت و أنا أشاهد أدائك، لأنه يذكرني بنفسي، و كيف تركني حبيبي
بصراحة كل الذين كانوا في السينما يضحكون على شخصية الرجل المثلي أو الشاذ الذي كنت تؤديه، لكن صدقا، عندما بكيت و قتلك ذلك الشاب كما في الفيلم حزن الجميع
لقد قرأت القصة من سنتان و كنت أطوق لمشاهدتها فيلم، فقط من أجل حاتم رشيد و أنت جسدت الشخصية و العذاب عينه
لا أعرف ماذا أقول لك و لكني أحبك كصديق
أه نسيت أن أعرفك بنفسي أنا رجل مثلي
و هذا هو عنوان مدونتي، أرجوك شرفني بزيارتك و أمنحني تعليقا لأفتخر دوما بك
www.gayofsun.blogspot.com
تحياتي

علي الالفي said...

بجد تسلم
الكلام جديد قوي باقوله في الشارع بس عمرى ما قريته
تسلم كمان مرة
بس انا عايز اقولك حاجة انا نفسي اعرفك !!!!!بجد

Anonymous said...

Dear Gayofsun,
The character of Hatem Rashuid in the film and in the novel was presented as the evil man or the bad guy. despite of his sexual desire, who was not the main idea, of course it's a very important one. But he is a man, who hated his desires and at the same time couldn't get rid of them. But he was not couregous enough to talk about his desires like you do. he's ashamed of them and he tries to hide them. In order to satisy them he abused some poor guy, he abused his need of money to satisy himself. I hope not that Hatem Rashuid remind you of yourself. The concept itself that homosexuals are not welcomed in our society and are arrested is very sad. That's the only sad part about Hatem Rashuid

albida said...

مريم.... أنتى عندك حق
لكن الموضوع مايتوقفش على أنه مقبول فى مجتمعنا ولا لا (يعنى مثلا هو يسافر بره ويبقى كده هو صح؟!) الموضوع اساسا لاتقبله أى ديانة

جاى اوف سن... تسمحلى أقلك أن الشذوذ الجنسى بيعتبر فى مجتمعنا جريمة لكن بالنسبة لى أنا بعتبره شبه مرض نفسى... وده مش معناه أنك مجنون .. كلنا مرضى ولكن فى نواحى مختلفة من شخصيتنا وبدرجات متفاوتة
نصيحتى لك أنك تلجأ للدين- سواء كنت مسلم أو مسيحى- لأنى أعتقد انك عارف كويس عقوبة الله لقوم لوط كانت عاملة ازاى
على فكرة اللى أنت فيه ده اختبار من ربنا... حاول تكون اقوى من كده
وربنا بيختبرنا كلنا فى حاجات مختلفة
وارجوك ماتحولش تبرر موقفك لأنك كده هتبقى بتناقض نفسك.. منين بتطلب الرحمة من ربنا ومنين أنت بترتكب معصية كبيرة

وربنا معاك أن شاء الله
:)


manal

albida said...

انا عندى كمان اضافة صغيرة يمكن تقنعك
تقدر تقولى أحنا ليه مش بنسيب الناس اللى عندهم مرض اشتهاء القتل يقتلوا فى الناس فى الشوارع ونقول ده حقهم؟
بص.. أنا مش بقارنك بيهم.. أنا بس باديك مثل وعايزاك تفكر فيه كويس

مش كون الأنسان عنده رغبة فى شئ معين يبقى له الحق أن هو يعملها... والا يبقى الدين والقانون ملهومش لازمة فى حياة الأنسان

انا عارفة ان الناس فى مجتمعنا بتبص للشواذ على أنهم افات فى المجتمع... أنا مش عايزاك تبص لنفسك على انك كده... حاول تعتبر نفسك فى أزمة وهتعدى أن
شاء الله

manal

Anonymous said...

Dear albida,
i think you missunderstood my point of view, i don't see homosexuals as patients and i'm not against them by any mean. I don't care about anyone's sexual oriantation, i care about the person itself. you can't blame someone for being homosexual. and i'm not here advise him, everyone is free to do whatever he likes and don't ever compare killing to sexual orientation because they're two diffrent things. it's sad that people in our society think the same as people in europe used to think in the middle ages.They used to compare homosexuals to mentally retarded and both were to be condemned to death, which is inhuman and sad. i think it shouldn't be an issue in the first place. we should just leave it and don't make it a big problem. we should learn how to go far beyond tolerance and far beyond just accepting the others. We are in the eye of the "others" also OTHERS!!!

albida said...
This comment has been removed by a blog administrator.
albida said...

dear Mariam,

You're right about everything you've said, but I can't totally agree with you.... I'm not comparing killing to homosexuality.. and I think I've mentioned that.. I'm just giving him an example to think of.
and why not advising him?!... this my role as a human being; to advise another human being for her\his own good.... I didn't compell him to do anything.... and he's free to take it or leave it!
I'm sure he's a good person... otherwise, I wouldn't have advised him in the first place, right?!
If u understood from my words that I consider homosexuals as "mentally retarded" as you say.... then we're all mentally retarded!
:)

thanks Marioma... we don't wanna end up fighting here, right?! we just have two different points of view..


with regards,
manal

^ H@fSS@^ said...

منولة حبيبتي
اياك و اسداء النصح للاخرين
ليه يا منال؟
هل انت احسن منه من ناحية اي موقع عشان تنصحية؟
هل عرفنا احنا بالظبط اللي خلي جاي يبقي علي ما هو عليه؟
و حتي اذا
ايه اللي ممكن نعمله
بالنسبة ليا انا احية علي شجاعته لدرجة اني خايفة عليه من بطش ظالم مالوش عيون رحيمة
حرجع و اقول
" من كان منكم بلا خطيئة فليرمها بحجر"
اللواط ملعون في كل الديانات لكن ميدينيش الحق اني اقله اعمل كذا و متعملش كذا
حسابه عند ربنا زي ما حسابي عند ربنا
كل واحد فينا ربنا اداه الارادة الحرة انه يقرر في معتقداته و امور تانية كتيرة

ارجو انك تفهمي القصد من كلامي و ان اعارفة انك مش حتزعلي مني
الموضوع الشرح فيه يطول
المهم تحياتي

Nohaz said...

حفصة مريم منال
في رأي الشخصي الي بيشيل قربة مخرومة بتنز علي دماغه
الموضوع ده من الاف السنيين من ايام سيدنا لوط
فمش هنيجي احنا الي نغيره
خلينا في المصايب الكبيرة الي احنا فيها
زي ان مثلا مش هقول كلنا بس نسبة كبيرة ليلة العيد مستنيناش لحد حتي ما نصوم الستة البيض كنا رجعنا لعادتنا القديمة وكلامنا ان هنتعدل و هنيل طار في الهوا
زي مثلا لو حد بيقرا صفحات الحوادث ان بقي الام تقتل جوزها عشان عشيق و ابنائها يساعدوها ظواهر غريبة بشعة ظهرت
ظهرت نتيجة لعوامل كتيرة منها سوء التخطيط العمراني منها الفقر المدقع للاحياء الشعبية و في نفس الحين بيلاقي الحجر اهم منه و الدولة بتصرف ملايين عشان حجر فبيكون نتيجة ان بيتكون عنده حق بيطلعه في صور منها تشوية الاثار و حاجات كتير
اما الاقي شاب بينصح شاب جنب البيت عندي و يقول له الحشيش مش بسبب إدمان و اية ده واحد 23 او 24 سنة بينصح واحد 16 او 17 سنة
من كان منكم بلا خطيئة فليرميه بحجر ده اولا ... ثانيا ده من الاف السنيين مش ظاهرة حديثة هنعالجها ... نصلح نفسنا الاول ... و نبص للمصايب الي احنا فيها

albida said...

طب هى دى مش من ظواهر المجتمع اللى احنا لازم نعالجها؟
كمان دينا بيأمرنا أن أحنا نأمر بالمعروف وننهى عن المنكر مش نقف نتفرج كده
عندك حق يا حفصة أن أنا مش الشخص المناسب اللى يدى نصايح.... لأنى مليانة عيوب زى أى حد, ولكن ده مايمنعش أنى أسمع نصياحكم, وفى الأخر ليا متلق الحرية أنى أقبلها ولا لا
يا جماعة ده فيه حديث عن الرسول بيقول فيه: "الدين نصيحة" كمان أنا ماممسكتلوش الجرباج وقلتله روح أعمل كذا... أنا بقوله يتوجه لربنا وهو أرحم بيه منا كلنا لأنه يهدى من يشاء... مش كده برضه؟

وعلى فكرة يا جماعة أنا مؤمنة جدا بفكرة أن الأنسان طيب وكويس بطبيعته وأن الظروف التربوية والنفسية اللى بيتعرضلها هى اللى بتشكله... وده ما يلغيش قوة ارادتنا فى اننا نقاوم العوامل دى

وربنا يرحمنا كلنا
:)

أنا لا يمكن أزعل منك يا حفصوصة

manal

Nohaz said...

صديقتي منال
انا والله ما اقصد حاجة ساعات كثيرة كلنا نحتاج النصيحة بس احيانا بتكون النصيحة مش في وقتها
مثلا يعني
في عربية خبطتني في ميدان رمسيس لاني سرحت ثانية
اتنطرت مترين او اكتر
واحدة منقبة و ابوها تخيلي عملوا اية
اخدوا ورقة واحد كان ادهالي فيها رقم العربية
حتي و ان كنت انا سرحت انا كنت ماشية وسط ناس بنعدي سوا
اخدوا من ايدي الورقة .. طيب افرضي كان حصل لي نزيف داخلي .... او اي مصيبة و فطست كنت هروح فطيس
المهم في عز المي واحدة خبطتها عربية و حدفتها علي الارض علي ضهري
الم بشع
تخيلي دي تقولي اية
اذكري الله
سبحي الله
كنت علي لساني اسب لها الدين
تخيلي؟
وصلتني لقمة النرفزة
انا بتنيل اتألم و دي اذكري الله
بجد متتخيليش كان نفسي اعمل فيها اية ساعتها وعشان اخلص منها و من ابوها سيبت لها الورقة الي فيها النمرة
و انقذني منها ان اتصلت باصحابي جم اخدوني
الي اقصده قد يكون مطلوب منك تدي النصيحة لكن معلش تختاري مين تديها له و امتي
هل هو صغير لسه مش بيتحاسب و يتكتب غلط في اية و عمل اية صح؟؟ ولا خلاص كبر و بيتحاسب علي افعاله؟؟
هل هو مش عارف العقاب وكده
مش بقولك اني ملاك من السماء عشان احاسبه او غيره لكن فقط أري ان النصيحة في غير وقتها ولا مكانها بالعكس قد تزيده عنادا
صدقيني ان مكانش الإنسان من جواه يرغب في التغيير لن يغيره احد
علي رأي بابا
الي ياكل علي ضرسه ينفع نفسه
يعني هتاكلي خير ليكي اتدلعتي في الاكل هتضعفي و مش هتقدري تقومي بعملك ولا تقاومي المرض
ده مجرد مثال
علي فكرة انا اهلي محدش فيهم قالي صلي ولا اقري قرأن ولا اتحجبي
انا من نفسي
و بغلط و محدش بيعرف
و بصلح نفسي
و برضة من غير ما حد يحس
ربنا يهدينا جميعا انا و انتي و هو و كل الي يسمعنا ان شاء الله

Nohaz said...

عشان محدش يفهم ان بعيب بس في المنقبات لان حفصة غالبا فهمت كده.. انا بس بعيب ان مختارتش وقت مناسب للنصيحة .. و ممكن تكون هي احسن مني و ممكن يكون ربنا هيديها حسنات علي اساس نيتها الطيبة بغض النظر تصرفها استفزني او لا
لاني معرفش حسابها عند ربنا اية
وحسابها هيكون علي قد تفكيرها و علمها و ثقافتها
ممكن يكون ربنا رزقنا بعلم و ثقافة عن غيرنا اناح لينا فرصة التفكر و التدبر
مننا بيشطح و مننا بيسلك الطريق الصح
علي الأقل نحمد ربنا ان ربنا ميزنا عن غيرنا بقدرتنا علي التعلم و التثقف و التدبر بأننا منستهينش بمن هو اقل منا علما
فعلا ممكن تكون المنقبة دي احسن مني
لكنها استفزتني بتصرفها
ممكن تكون اختبار لي ان صبرت علي استفزازها لي و كتمت غيظي منها و سكت
و هي ممكن برضة تكون نيتها ساعتها حتي و ان اسأت التصرف يكون من نصيبها حسنات للنية الطيبة دي
الله اعلم
الرسول عليه الصلاة و السلام كان احسن داعية من خلال خلقه .. كان خلقه القرأن...مش لازم نمسك واحد او واحدة نبستفها اعمل و سوي ممكن بتصرفاتنا الحلوة نكون احسن من احسن داعية

^ H@fSS@^ said...

نهاازززززززز حبيبتي
انا مفهمتش حاجة غلط علي النقاب لانهم اساس لا يهموني في شئ و لا عمري ازعل عليهم لاسباب كتيرة
المهم
منوله انا بقول ان شكلنا بقي وحش
واخدين البلوج بتاع خالد باشا مقاولة كانه بيتنا
بقول ما نروح للصالون عندي و اهو ناكل لقمه مع بعض بعد ما كرشتيني من عندك؟؟
و انت لا يمكن تزعلي مني و لا كان قصدي انك تفهمي اني ممكن اقول انك علقت المشنقة لحد
انتي ارق و اطيب من البقسماط بعد ما نبله في الشاي
ايه رايك؟؟
تحياتي لحبايبي كلهم

Nohaz said...

الله يسامحك يا حفصة يعني بتعطي الإنسان الحرية في ممارسة شذوذه لكن مش عاجبك بتوع النقاب
انا عن نفسي ماشي مش ممقتنعة بالنقاب بس ده ميدنيش الحق ان اسلبهم حريتهم
عموما كلها اراء شخصية
لان ليس منا بفقيه و معلش ولا واحد فينا بيفهم في الدين عشان يفتي

تحياتي
بالنسبة لان احنا قلبنا المدونة هنا ساحة حوار اعتقد ان الاستاذ خالد مش هيتضايق لانه اكبر من كده
عيد سعيد و اسفين ان وجعنا دماغكم

albida said...

نهى.... أزعل منك ليه بس يا بنتى؟ احنا بنتناقش والخلاف شئ طبيعى.... كمان الاختلاف فى البط لا يفسد للوز قضية
:)

فاكرة يا نهى لما سألتك هو العيب فينا ولا فى الناس... قولتيلى فى الاتنين... فينا علشان مابنقبلش نقد الاخرين لينا وفى الناس علشان بيسمعوش النصيحة, مش كده؟

أنا عن نفسى... مفهومى للنصيحة هو أبداء رأيك لانسان أخر فى شئ معين بنية حسنة وبقصد الخير لهذا الانسان... وتانى بقولها: هو له مطلق الحرية فى النهاية لاننا مش هنحاسب الناس. وأنا على فكرة عنيدة جدا فى موضوع تقبل النصيحة ده, لكن ده مايمنعش أنى أسمعها وأوزنها الأول... أنا كتير جدا خالفت نصايح ماما وبابا ليا ,ده مش معناه أنى مش بحبهم وأنهم دايما غلط.. لكن كل انسان أدرى بمصلحته وعارف ظروفه أكتر من أى شخص أخر

أما عن توقيت النصيحة.... فأنتى محسسانى أنى رحت وقفت على باب بيته وقلتله الكلام ده... ده هو ممكن يقرأ الكلام ده وهو قاعد فى بيتهم وحاطط رجل على رجل وبيشرب كابتشينو كمان.... ده اذا كان قرأه اساسا! أنا مابطلبش منه غير أنه يسمع ويفكر... وبس

أما موضوع اللى بيشيل ابرة والكلام ده... فده منتهى السلبية فى رأيى... يعنى نسيب كل واحد يعمل اللى هو
عايزه فى الدنيا ونقول احنا مالنا؟

وكفاية كلام بقى فى الموضوع ده
احنا قلبنا بلوج الأستاذ خالد محل فطاطرى من كتر اللت والعجن ده
:) :)

يا ساتر يا رب أنتى قلبك أسود أوى يا حفصوصة... يا ستى ايه التعبيرات الجميلة دى, محسسانى أننا قاعدين على قهوة
:) :)


manal

Nohaz said...

نال انا هقول كلمة واحضة يا رب تفهمي منها قصدي بعد كده هوقف التعليق نهائي عشان مش كل الناس بتقبل كلامي
الي اقصده مش لازم نصيحة مباشرة لانها احيانا غير مجدية
مش فاكرة بالظبط بس في ايات كان كلمني عنها موظف معايا في شغل ان ربنا اخد ناس محاولوش ينصحوا اهل قريتهم معاهم في العذاب لانهم محاولوش ينصحوهم
الفكرة كلها ان ممكن بدون اسلوب النصح المباشر .. فاكرة قصة الحسن و الحسين لما لقوا واحد بيتوضاء غلط ... مجرحوهوش .. و بطريقة لطيفة وضحوا له الوضوء الصحيح
فهمتي قصدي؟؟؟
لان ممكن طريقة النصح او الكلام تزيد الي قدامك كبر و عناد
تحياتي ليكم جميعا
و اسفة ان مش هرد بعد كده
لان مفيش كلامي تاني يتضاف

albida said...

انتى عندك حق فى كل كلمة قلتيها دلوقتى (يسلم فمك يا أستاذ خليفة!).. فعلا جبتى من الاخر! والحمدلله أن الموضوع خلص على قد كده وممسكناش فى خناق بعض
:) :)

ليه يا بنتى محدش بيقبل كلامك؟ أنا حساكى منطقية وعسولة جدا
:)

وفى النهاية مش عايزة أى حد يزعل منى يا جماعة... ماشى؟
صافى يا لبن؟

manal

^ H@fSS@^ said...

يا نهاز بقي انا اقلك هما ما يهمومنيش في حاجة تقومي تقليلي اني سلبتهم حريتهم؟؟؟
هو انا قلت لك انهم غلط و ان صح
انا قلت مايهمونيش يعني لهم دينهم و لي دين
بس
مش عارفة بقي لو كنت قلت لك انهم كذا و كذا كنتي قلتي عليا ايه
بس مش مشكلة
سلام

albida said...

خلاص يا جماعة.... فضوها سيرة بقى! عايزين الأستاذ خالد يجى يلقينا مكسرينله البلوج وبنتخانق مع بعض
:)

وبعدين هو لما يجى يقلنا ايه رايه فى المواضيع دي.... هو برضة اكبر مننا وكلنا بنحترم رأيه

manal

Anonymous said...

يمكن اللي أنا باكتبه مالوش علاقة بالموضوع لكن عاوزة أكثر عدد من الناس يعرفوا اللي حصل ده ونعرف كويس احنا وصلنا لايه ورايحين لايه

أرجو الدخول على بلوج الوعي المصري لقراءة هذه المأساة:

"حالة سعار جنسي جماعي في وسط البلد في أول أيام عيد الفطر

nour said...

انا عارفة ان انا جاية متأخر و عارفة ان كلامى ممكن يولع المعركة تانى..بس انا مش قادرة امسك نفسى
انا متفقة جدا جدا مع منال..و مش شايفة اى مشكلة انها تقول نصيحة لحد حتى لو كان اكبر منها بخمسميت سنة كمان النصيحة لازم تكون علنى حتعمل ايه يعنى حتدور علي عنوان بيته و تنصحه؟و بعدين ايه موضوع كل واحد حر دى حرية شخصية؟لأعند هنا و ستوب فى حاجات الواحد ميقدرش يسكت عليها و اهمها الكبائر اللى منها الشذوذ الجنسى انتوا ناسيين ان الفعل ده بيغضب ربنا اد ايه بتتهز له سموات يا جماعة يبقى اكيد حاجة مش طبيعية ان احنا نلاقى واحد شاذ جنسيا و حتى ما نفكرش ننصحه قال ايه حرية شخصية لأ انا فى الحالة دى بقى باذات برفض الحرية الشخصية و اللى جايبينها كمان..ان كان الغرب بيقبل حاجة زى دى لدرجة انهم يوالسوا الشواذ جنسيا و يطلعوا شخصيات شاذة فى افلامهم و برامجهم على اساس انه عادى لا فى اختلاف هنا فى مصر بقى الموضوع ده مرفوووووض جدا و عمرى ما اقدر اتعامل معاه عادى يعنى..يا جماعة اى حاجة غريبة عن الطبيعة مرعبة يعنى لو مرة اتعورتى و ايديكى نزلت دم ازرق او منزلتش دم خالص مش دى حاجة مرعبة لانها ضد الطبيعة يعنى منقولش هنسيب كل المشاكل اللى احنا فيها و نتكلم عن الشواذ..طب ما فى ناس بتقول هنسيب كل المشاكل اللى احنا فيها و نتكلم عن ابتذال الاغانى و الفن؟..وفى ناس بتقول هنسيب كل المشاكل اللى احنا فيها و نتكلم عن الزبالة اللى فى الشوارع ؟و لا العشوائيات و لا الناس اللى مش لاقية تاكل و لا الناس اللى بتموت فى العبارات و لا الناس اللى بتتحرق فى السكة الحديد و لا و لا ولاا....كل الطرق تؤدى الى روما ..واى بدع بتظهر فى بلدنا ليها سبب واحد..حتقولى الموضوع ده من آلاف السنين..بس بذمتك عمره ظهر كده قد اليومين دول..ده حتى اذا بليتم فاستتروا..ده انا بقيت اشوف ناس شواذ كده واقفين مع بعض على الكورنيش..بقيت اعرفهم و لا كأنى قاعدة فى شيكاجو..

albida said...

الحمد لله.... في حد فهمنى ووقف معايا اخيرا! ربنا يخليكى ليا يا نورا يا رب

هى شرحت اللى انا كنت عايزة اقوله من زاوية تانية

عندك حق يا نورا ان الموضوع بقى ظاهرة مايتسكتش عليها ولا يمكن نتجاهلها أكتر من كده..... وأعتقد ان هو ده اللى خلى الأستاذ خالد يقبل دور حاتم رشيد... علشان مش ممكن نغمض عيننا اكتر من كده.... انا مرة كنت قاعدة فى كافيه على النيل وشفت اتنين قاعدين بصورة لا يمكن تتخيلوها... كده عينى عينك! وأخويا كان مرة فى الجيم, جاله واحد عربى بيطلب منه يعمل علاقة معاه.... تخيلوا؟

واذا كنا عايزين نعالج ظاهرة معينة يبقى لازم نعرضها الأول وبعد كده نناقش حلها... ودى مش مشكلة هينة... لانها بتمس الأخلاق والدين

شكلك يا نورا بتقرى رفعت اسماعيل, مش كده؟
:)


manal

الخبز و الحرية said...

والله يا جماعة انا حاسس اني دخلت بلوج معرفوش:) مساء الفل على الجميع أولا.. ووحشتوني جميعا جدا ثانيا، وبرحب بكلللللللللللللل اللي جم وانا غايب لأني كنت مريض مرض رخم بعيد عن السامعين وجه العيد وانا عيان ورحت قافل على نفسي مية ونور لزوم تجميع النفس للنقاهة وتجديد الدم والبال وكده.
مش حقدر ارد على كل واحد لأن فيه كلام كثير قوي بس بشكل عام انا بشكر كل اللي عجبته القصيدة ومبسوط من كل اللي جانا جديد واتمنى يستمر معانا.
اما في موضوع جاي والسجال التالي فرايي ان الموضوع مركب شوية والنقاش نفسه زاده تركيبا.
محتاج اركز واقرا ثاني عشان اقول رأيي لكن برضه بشكل عام انا ضد اضطهاد أي إنسان تحت اي مسمى لأن الاضطهاد ده سلاح أعمى بيلف يلف ويرتد عاللي استخدمه بشكل او بآخر.
واللي عاوز يقترح او ينصح او يوجه او يصلح لازم يكون مبدئيا بينطلق من فكرة انه بيحب البشرية وعاوز يساعدها مش مجرد انه عاوز يسجل موقف او طمعان في حسنتين وخلاص:)
ده معناه انه يحب البشر لذاتهم او يحب الانسانية حتى في أعدائه زي ما المسيح كان بيقول ، واحنا عندنا سواء في التراث العربي الاسلامي او التراث الانساني كله ما يدعم هذه النظرة، ولا اتصور نبيا احب ان ينصح احدا فبدأ معه الكلام بقولة "بص يابني هو انت زبالة ولازم تتحرق اصلا بس خد هنا اما انصح ايمانك يمكن تتعدل!" وضحكت موت لما نهاز كانت مخبوطة والمنقبة عمالة تنق ف دماغها (اذكري الله) لدرجة ان نهى كانت حتسبلها:) نبدأ من النقطة دي وبعدين نبني عليها ده رأيي، نقطة اننا بنحب بعض كبشر وبالتالي قلبنا على بعض ومن هنا نقدر نفرز بسهولة الطيب من الشرير لأن الأول بيحب البشر ومش بيصارع الا على حقه المسلوب بينما التاني عاوز ياخد حقه وحق الثاني لأنه مش بيحب الا نفسه. انا بالنسبة لي لو الانسان بيحب البشر يبقى انا بحبه ولو معرفوش سواء كان يوافقني كلامه وافعاله ولا لا لأنه مادام بيحب البشر. طيب ازاي اعرف انه بيحب البشر؟ لو مش بيؤذي البشر ولا بيدعو لأذية البشر ولا له مصلحة ان اشرار البشر يؤذووا بقية البشر. طب لو بيؤذي نفسه؟ أنصحه لو عندي اللي اقدر اقولهوله.. بس اقوله بحب ولو اكتشفت ان فيه حاجات مش فاهمها ماصدرش احكام وخلاص خصوصا لو احكام قاسية. لو مش عارف أميز بدقة اضرب مين واوجه نقدي لمين وانقد نفسي قبل ما انقد الآخرين نبقى مش بنكسر دايرة القمع اللي عايشينها واللي بتخلينا قامع يقمع مقموع يقمع مقموع يقمع مقموع.

bintbeladi said...

استاذ خالد
دخلت مدونتك من مدونة لمدونة لمدونة
و في الآخر لقتني عندك
و قريت لك
وعجبني كلامك
فقريت و قريت و قريت
بقالي 3 أيام مليش شغلانة غير قراية مدونتك
لكن كل مرة بعد ما أقرأ ارجع للقصيدة دي تاني
و اقف عندها
و أقراها
و أسأل نفسي.. هو ممكن القصيدة الواحدة تجمع حب و جرأة و خجل و متناقضات كتير..؟
ده اللي حسيته و أنا بقرا إبداعك الأدبي ده.. و بعدين قلت لازم أكتب أوصل لك رأيي.. بس الأول أقرأ التعليقات اللي عليها
ايه ده.. مقدرتش أقرأ كل التعليقات من كترها..بجد.. أبدعت
و اشكرك

NoNa said...

السلام عليكم

انا اول مرة اشوف بلوج دة

عرفتة من بلوج نايم يامصرى

بجد بشكرة انه عرفنا على بلوج بتاعك
ماشاء الله عاليا جميل جدااا

جداااااااا تسلم ايدك

بالنسبة بقى ((للبنت دى )) بجد بجد

رووووووووووعة جدااا جميلة اووى

انا مبسوطة انى عرفت بلوج بتاعك
:)