Friday, December 22, 2006

غزلك مضيء

غزلك مضيء
كيمامة وردي على الطريق
والمغربية خط كحل وخط نور وسطور حريق
غزلك مضيء
أغزل لك البوح البريء
والروح تدوق ما بين شفايفك الابتسامة
أغزل لك الروح اليمامة
وتطير كناريا القلب مالعش العتيق
غزلك مضيء
وانشد واقول:
شعرك مطر
قدك سؤال.. والرد انا
وانت المحال لو يتوصف
انت الولف
وانت البريئة المؤمنة
بالحب في الزمن الغريق
غزلك مضيء
واجمل قصايدك ما انكتب
وماطالش لسه المنتهى.. آخر لهب
يبقى اسمحيلي بالغزل وبالانتظار
ده المُشتهى.. أخطف من الأرض المدار
واثبت على حبك أبد
وان ما طاوعنيش الجسد
حيطاوع الروح الجريء
يا بسمة الوقت الشقيق
غزلك مضيء
غزلك مضيء

54 comments:

Anonymous said...

very sensitive and nice romantic and have childish innocence loved it

karakib said...

غيبه طويله بجد
حمدالله عالسلامه
و كل سنه و أنت طيب
أنتوك

albida said...

يا خبر يا أستاذ خالد كل ده!! كده مفيش مذاكرة النهاردة
:)
بجد قصايدك وحشتنا أوى

غزلك مضىء... عنوان القصيدة نفسه يشد! فحضرتك بتوصف الكلام اللى بيوصف المحبوبة, وده يدل على شدة جمالها وروعتها
الغزل نفسه مضىء كأنه شعلة بتنورلك طريقك وبترشدك لحاجة.. اكيد للمحبوبة نفسها

الحب اللى فى القصيدة من أسمى أنواع الحب.. الحب اللى بيترفع عن عاطفة الجسد ويصل الى الروح.. علشان كده أنت بتقولها فى الاخر

يبقى اسمحيلي بالغزل وبالانتظار
ده المُشتهى.. أخطف من الأرض المدار
واثبت على حبك أبد
وان ما طاوعنيش الجسد
حيطاوع الروح الجريء

وكمان برضه

والروح تدوق ما بين شفايفك الابتسامة

حضرتك مقلتش أنا ادوق.. لكن الروح هى اللى بتدوق... هى اللى بتشعر بالسعادة

ومن شدة جمالها أصبح وصفها كوصف الشىء المستحيل

وانت المحال لو يتوصف

وبالتالى وصفها شئ مستحيل.. وبالتالى برضه ده هيطول من فترة انتظارك ومحاولتك للتغزل فيها والتمتع بالنظر اليها.. وهى دى السعادة بالنسبة لك
عارف حضرتك الموضوع بيفكرنى بايه؟ بيفكرنى بالشمس.. جميلة جدا ومضيئة جدا وبتدخل فى نفوسنا السعادة لكن من شدة اضائتها وتوهجها لا يمكن النظر اليها أو الوصول ليها

عجبنى كمان أوى تناغم حضرتك مع الطبيعة من خلال اليمام والكناريا والمغربية والمطر

من الاخر القصيدة تسيب احساس بالسعادة فى نفس الواحد
:)

manal

Anonymous said...

موقعك بالفعل جميل للغاية و خاصة الشعر المعبر و الذى يخاطب العقل ايضا ، كما ان ادوارك الفنّية جميلة ايضا :)

اهنئك على هذه المدونة ، و اتمنى لك دوام التوفيق.

حسين

http://www.theblogofhusfahmy.tk

الخبز و الحرية said...

مفقوعة شكرا.. هو انت مش ناوية تغيري اسمك ولا ايه:) يا ستي كلنا مفقوعين بس ادينا بنحاول:)
هاني أنتوك صديقي ازيك واحشني وكل عام وانت بخير يا باشا.
ياه يا منولة وحشتيني انت ونقدياتك الرائعة.. والله يا بنتي انا حاجز منك تعليق على ديوان ليا بس خلصي انت اللي ف ايدك من انتحانات وندردش:)
اهلا بيك يا حسين دايما معانا نورتنا:)

Anonymous said...

Sabah el fol
It's a wonderful start to the day ...
This collection is softer and more sensitive than your previous ones... It has a different tone to it... younger and more open..
It makes me happy for you

maf2ou3a said...

well ana 3arfa enou kolena maf2ou3en bas wade7 en kol wa7ed men maf2ou3 betr2etou we maf2ou3 men 7aga gher el tany moshkelty ana ba2a eny maf2ou3a men kol 7aga mafesh 7aga 3agabany law 7adretak naourteny fe el blog beta3y 7ate3raf ana batkalem 3an eh
shoukran

DoDo said...

الانسان والفنان خالد الصاوي
ككثير من زوار المدونة، أدهشتني عذوبة القصيدة ابتداءا من اسمها مرورا بسطورها التي تدغدغ الأحاسيس وتبعث الأمل الدفين في طهارة الحب وسط غوغاء الزمن الأسود

تتلاحق الصور وتنفذ الكلمات الى القلب، فتحية للفارس العاشق بداخلك

albida said...

:)
أن شاء الله يا أستاذ خالد
أدعولى بس دوشه الامتحانات دى تعدى على خير

manal

غادة الكاميليا said...

طيب هو الواحد وهو داخل هنا ولأول مرة يعنى كده بجد يقول إحم ولا دستور والمصحف أنا بجد شكلى اتجننت هو أنا بقالي شهرين كده بدور على البلوج لما عرفت إن حضرتك عندك بلوج بس يئست وملقتش والنهارده بالصدفه كده لقيتك وبصراحه يعنى اتخضيت يعنى هو بجد ولا إيه وطبعا ده خلانى أجيب البلوج من يوم افتتاحه فالمذاكرة راحت في السلامه مش مشكله بقى تتعوض المهم احنا هنا عايزة أشيد بأعمالك ولي إشاده بعمل مخصوص جدا وهو(الروح)عمل تحفه
النص ده بقى فيه نضج فظيع وواضح قوى من قرايتى للبلوج كله وبصراحه
يبقى اسمحيلي بالغزل وبالانتظار
ده المُشتهى.. أخطف من الأرض المدار
الجزء ده نغم منفرد ترنيمة روح وخصوصا وأنا بقالي بتاع ساعه في الصفحه بتاعة حضرتك وأنا بسمع فيروز (بكرة بيجينى انسان)
وبصراحه عجبنى السيد جمال الصاوى والدك تعليقه في أحد البوستات تعليق ممتع بجد انت فاضي أصلي شكلى هتخذ طريق اللك والرغي الكتير ولا بلاش لاتمل منى وتقولي بسبس متدخليش هنا تانى
أقولك أنا مستمتعه جدا إنى هنا أما ألحق آخد اللينك أحطه في البلوج بتاعى
تحياتى الخاصه قوى هو عند حضرتك إيميل أقدر أضيفك لو أمكن يعنى والله العظيم أنا خرجت من حالةالكآبه اللي أنا فيها على إيد البلوج بتاعك النهارده
تحياتى واعذر لكّي ورغيي سماح النوبه دى

Unknown said...

حمدالله ع السلامة
أولا
وكرجل محب للحرية
أدوك للإحتجاب غداً
استجابة
للمدون
آدم الصوالحى

من أجل الحرية
ارجو زيارتى
للتفاصيل
ارجو الإهتمام

VEЯŎ said...

كل سنة وانته طيب يا صاوي وحمد الله على سلامتك وكلام جميل قوي بعد غيبه

Anonymous said...

الحب الأفلاطونى
الحب الذى أؤمن به
ما أروعه
وما أروعك
(",)

الخبز و الحرية said...

شكرا انونيموس هي فعلا قصايد اصغر عمرا بعضها من 15 سنة وبعضها من 20 سنة كمان:)
مفقوعة انا زيك مفقوع بس لو سميت نفسي بالصفة السلبية عموما بفضل ابص لنفسي بالطريقة السلبية ده كان قصدي.. ربنا يفك فقعتنا جميعا:)
دودو الف شكر.
غادة الكاميليا اهلا بيكي دائما:)
ابو امل متهيألي شفت رسالتك بعد الموعد مش متأكد.
شكرا فيرو.
شكرا وينكي بس انا مش افلاطوني بس:)
انا بقدر جدا مزج الاساليب في الشعر وفي الفكر وفي الحياة ايضا.
شكرا حامي دعواتك.

ياسر خاطر said...

أغزل لك الروح اليمامة

كفاية دي جدا عليا
بحسدك لان كان في نفسي اوصل لتركيبة جملة زي دي

Anonymous said...

تعرف يا زعيم أنه من يوم عودتك بالسلامة للبلوج قل عدد المترددين على بلوج سردية

قلي اتريت منين المغماطيس دا
طبعا بهزر
ربنا يديم المحبة

Anonymous said...

تصحيح: اشتريت منين المغماطيس دا؟

Ahmed said...

ياراجل ده انت الي كلامك مضئ
الكلام رقيق اوي
بحس انك بتطبطب عليها
انا لما عرفت انك عامل بلوج قلت اكيد هتبقى كلام نجوم بقى والحجات دي
بس متصورتش ابدا ان واحد ممثل وبذات في العصر الاسود ده وزمن افلام زي "أيظن"
او واحد يكتب كلام زي ده
انت فناااااااان

بعيدا said...

Assalamu Alaikum everyone,
I am new in the world of blogging :) and just wanted to share how excited I was for discovering br. Elsawy's blog. I was greatly moved by some of your takes on life, politics & love :)
How do you write like that? :) Any tips? :) I wish there were more informed actors about current affairs and social issues...to personify the true meaning of "Al-e3lam al-hadef" in their work. May Allah reward you for your efforts. I look forward to reading more of everyone's contributions. Ma3 araq ta7eyati :) (apologies for not writing in arabic as my fingers are aching from working & updating my new exciting toy...I mean blog):)

^ H@fSS@^ said...

عارف
قريتها كذا مرة و كل مرة يعلق في عيني منظر واحد

والمغربية خط كحل وخط نور وسطور حريق

احلى وصف للمغرب قريته لغاية دلوقتي
في ثواني استحضرت منظر المغارب و السحر المصاحب ليها و اللمسة الغريبة اللي بتجتاح الواحد لما يشوف مزج الالوان الغريبة دي

خط كحل
خط نور
سطور حريق

قدرتك انك تذكر كلمات معروفة بسلبيتها لكن في لحظة معينة تخلق انطباع ايجابي مش معقولة
و العكس صحيح طبعا
و ده بياكد نظريتي المتواضعة ان احنا اللي بنعطي للكلمة معناها
مش ايه طبيعتها
و ده بردة ان دل فيدل انك عبقري كسر قوالب و حدود و ده شئ بحبه جدا

السطر ده عندي بالقصيدة كلها

تحياتي
يا سطور حريق

^ H@fSS@^ said...

مقالك الاخير في حوار متمدن شامل جدا و رائع
فصصت المشكلة من جميع ابعادها و جوانبها و اعتقد ان الحل فعلا جاي و قريب جدا
ادعو الجميع لقراته اذا ماكنوش قرأوه

سيلامو عليكو

Anonymous said...

You have to revive your younger voice ... It's easy to fall into the traps of biiterness that come with age and become cold and hard... we want more of this younger more optimistic poetry ... especially at the end of yet another year. Cheers

Anonymous said...

hi khaled, i read your interview in al-watan newspaper of kuwait, it was really wonderful, good luck :)

هراءات منطقية said...

أستاذ خالد

لسة مكتشف المدونة بتاعتك بالصدفة....حبيت أرمى السلام

Anonymous said...

جميل يا خالد
جميل :)

محمود عزت said...

جميل يا خالد

جميل

أميرة said...

أولا دى اول زيارة

واول مرة بشوف الوجه الآخر للفنان الجميل خالد الصاوى

أجملتحية على كلماتك الرائعة ياريت تشرفنى بالزيارة

سلامى

Anonymous said...

بصراحة انا اندهشت من كتاباتك واندهشت اكثر عندما علمت انك تألف اشعار واسعدني اني وجدت موقعك بالصدفة البحتة عبر جوجل بصراحة احلى صدفة ويعجبني تمثيلك بكل المعاني وارسل لك باقة من الحب والامتنان والمودة المنقولة عبر اثير الخواطر القلبية يا استاذ خالد وكل عام وانت والامة العربية الاسلامية بخير وسلامة بمناسبة عيد الاضحى المبارك
ورجاء مراسلتي عبر الرابط التالي لاني اريد ان اعرض عليك اقتراح سري للغاية
http://mail.abufars.com

Unknown said...

خالد باشا
المدونة بتشغى
واحنا
رشينا الشارع
وقاعدين
وبنش
يا عم عبر

frozen love said...

خالد باشا..انا بجد رغم اني دي اول زيارة لمدونتك..سعيد قوي اني اكتشفت خالد الصاوي الشاعر اللي انا حبيته كممثل...اسمحلي اقولك اهلا بيك في عالم الشعر المستخبي ده... احنا فعلا طلعنا مش احنا بس اللي كده....احنا كتييير قوييييييييي
looool

frozen love said...

نسيت اقولك

والمغربية خط كحل وخط نور وسطور حريق
غزلك مضيء
أغزل لك البوح البريء
والروح تدوق ما بين شفايفك الابتسامة
أغزل لك الروح اليمامة
وتطير كناريا القلب مالعش العتيق

الجزء ده بجد رائع

بعيدا said...

السلام عليكم

هل تسمح لى بأن أتسائل فى تواضع..

ما هى المؤثرات التى بسببها كان مولد الشاعر خالد الصاوى؟

هل كانت دراستك أدبى ولذلك تشكل ذلك الاحساس الراقى
بالكلمه؟

أريد ان أتفادى المجامله لكى لا أكون من المداحين ممن يحث فى وجوههم التراب، ولكن بكل صدق، ليس كل ما يكتب يقرأ...وكتاباتك من القلائل المميزه الهادفه، ماشاءالله...نفعك الله والآخرون بها...هل نتوقع ديوانا بالاسواق قريبا؟ :)

معاك الميكروفون يا فندم :)

وأعتذر مقدما ان كانت تساؤلاتى تطفلا..ولكنها أكيد عبرت ذهون أخرى غيرى من متابعيك..

Sincerely,
Ba3eedann..

علي الالفي said...

يااااااااااااااااااااااااااه
والله ليك و حشة يا راجل
المهم حمد الله ع السلامة
بقول لك ايه
انا عندي حفلة مهمة جدا في ساقية الصاوي و هاكون مبسوط جدا بجد لو انت حضرتها الحفلة هاتكون 30-1 فرقة
step by step

Anonymous said...

الجميل خالد
نهارك سعيد ومساك أسعد

كل سنة وإنت طيب يا زعيم

غزلك مضيء جميلة قوي
وأنا فعلا سعيد وحابب ألفت نظرك لكم التعليقات اللي حازتها، واللي بيرجع من وجهة نظري لعدة عوامل، منها تميزها طبعا، ومنها كونك نجم محبوب بالأساس والقراء بيشوفوا جانب آخر منك بيقربك منهم ويحببهم فيك أكتر
أما ثالث الأسباب فهو أن "غزلك مضيء" أخذت فرصتها أحسن مما سبقها، وده بالضبط اللي كنت أقصده بالبوست أسبوعيا
بخصوص غزلك مضيء عندي تعليق أو خليني أقول نقد وحيد، القصيدة في تدفق وسلاسة جميلة، وايقاع فيه انسيابية، لكن في شطرة واحدة فيها كلمة بتقطع الايقاع والتدفق ده، وهي الشطرة التالية
وانت المحال لو يتوصف
انت الولف
هنا كلمة الولف بتقطع انسياب الايقاع، وكنت أتصور لو اخترت كلمة تانية تحافظ على تدفق وسلاسة الايقاع والموسيقى، أو حتى تعيد صياغة الشطرة دي تحديدا كلها
أنا عارف طبعا إن في الشعر الحديث والعمودي وما يسمى بقصيدة النثر وارد إن الايقاع تكون له مقومات أخرى خلاف السجع اللغوي والايقاع اللفظي، بس يمكن في غزلك مضيء القصيدة كانت قصيرة لحد لم يسمح إن تكسير الايقاع بالطريقة دي يصنع ايقاع موازي أو بديل
مش عارف، أنا بأقدر كل أنواع وأصناف الشعر، بس بأميل أكتر للإيقاعات والموسيقى اللفطية، وشايف شعرك ميال أكتر للاتجاه ده

على أي حال، بعيد عن القصيدة كنت حابب أسألك لو مقال تروتسكي اللي كلمتني عنه متاح عندك على الكمبيوتر، في الحالة دي ح أترجاك تبعتهولي علشان اقراه
ولو لم يكن ح أحاول أبحث عنه، أو يصح إننا نلتقي قريبا وأقدر استعيره منك لو أمكن

أخيرا يا عمنا
بلوجك مضيء
دايما يا رب

BaSsMa said...

أجمل باقة ورد مهداة للاستاذ خالد
مني انا باسمة من المغرب 19 سنة
اتمنى حقيقة ان نصبح اصدقاء
مش صدفة ابدا اني اعثر على البلوج لاني بحثت عن كل مايتعلق بك كفنان وسعدت جدا لما وجدت مايتعلق بك كانسان وليس من الغريب ان اجد كل هذه المشاعر النبيلة في ماتكتبه من كلمات معبرة انها حقيقة تعبر عنك لأنك مبدع بالفطرة

انت مبدع حقا بالسينما بالشعر بأي مجال تخوضه ستكون كذلك

بالنسبة لقصيدة "غزلك مضيء" هي من اجمل ماقرأت لك وحبيتها خاصة عشان كلمتين بسمة والمغربية:):)

ارجوك لاتطول غيبتك عنا
انا اطالع البلوج باستمرار

في انتظار ردك
وعيدك مبارك سعيد
مع اطيب التمنيات


باسمة

ذو النون المصري said...

قصيده من شعر ابي نواس عن الحج
اهداء لكل اسرة التدوين
..................................
الهنا ما اعدلك
مليك كل من ملك
..................................
لبيك قد لبيت لك
لبيك ان الحمد لك
..................................
و الملك لا شريك لك
ما خاب عبد سالك
..................................
انت له حيث سلك
لولاك يارب هلك
..................................
لبيك ان الحمد لك
و الملك لا شريك لك
..................................
كل نبي و ملك
و كل من اهل لك
..................................
و كل عبد سالك
سبح او لبي فلك
..................................
لبيك ان الحمد لك
و الملك لا شريك لك
..................................
و الليل لما ان حلك
و السابحات في الفلك
..................................
علي مجاري المنسلك
لبيك ان الحمد لك
..................................
و الملك لا شريك لك
يا خاطئا ما اغفلك
..................................
اعمل و بادر اجلك
و اختم بخير عملك
..................................
لبيك ان الحمد لك
و الملك لا شريك لك
__________________________________
القصيده مهداه للجميع و كل عام انتم بخير
--------------------------------------------------------------------

بعيدا said...

Assalamu Alaikum everyone and Eid Ad7a Mubarak lel gamee3 :)

Please disregard my previous questions as I was able to find a link that pretty much answered all of them. Here it is for those who are interested:

www.geocities.com/ashraf_20hamdi/Article1.doc

Keep up the great work & beautiful talent :)

Anonymous said...

إلى كل المدونين والغير مدونين الأعزاء
أنا عامله حفله صغنونه على البلوج بتاعى( حاجه صغنونه).. وياريت كلكم تشرفونى فيها النهارده
عشان نحتفل مع بعض ببداية عام جديد وبالعيد السعيد
مستنياكوا فى تمام منتصف الليل.. ولو حبيتوا تيجوا بدرى شويه مافيش مشاكل
بس تعالوا
(",)

Unknown said...

شكراً ليك يا خالد ولاحساسك الراقى ولكن عايز اعرف معنى يا بسمة الوقت الشقيق انا حاسس انها غريبه شويه

عماد رفعت said...

عام سعيد
رغم ان بشايره هلت للعرب باعدام صدام

Anonymous said...

تعرف اول ما عرفت انك بتكتب استغربت ليه؟ مش لسبب محدد . مش علشان ممثل وكده .او يمكن برضو . معرفش.المهم اجمل حاجه فى الدنيا ان الانسان يقدر يعبر عن نفسه على السطور بحس ان ده اقرار بوجوده وكمان قوه كبيره ان يكشف خباياه .معلش مقرتش كل المدونه ولا حتى قريت غزللك مضىء بتركيز يمكن علشان اليومين دول وفى ظل الظروف اللى بيمر بيها العرب حسه ان من الواجب انى اقرى حاجه تحسسنى بالحسره على انفسنا نحن العرب تقدر تقول نوع من عقاب النفس . بس ان شاء الله هقرى كل المدونه واكتب تعليق على كل حاجه .اما الجو يروق .. استمر

أشرف حمدي said...

صباح الفل يا خلّود
الحوار اتنشر في عدد النهاردة من وشوشة
واضح ان الديسك أكل ثلاثة أرباعه لكن معلش
انا نشرت الحوار كاملا علي المدونة بتاعتي
كل سنة وانت طيب يا جميل

محمد العرب said...

حلوة أوي كل سنة وانته طيب

Unknown said...

هل ثمة من تهنئة بالعيد
لا اعتقد

... said...

اختلاط الفصحى بالعامية
غريب جدا
بس جميل
كل سنة وانت طيب

Anonymous said...

ازيك يا أستاذ خالد
اعتقد ان فيه مشكله عندك على الايميل لأنه دايما بيوصلنى رد آلى ان الايميل مش ممكن يستقبل رسايل دايما
حبيت انبهك لأن كتير غيرى لاحظوا الموضوع دا
دعواتكم ليا كلكم عشان اعدى من الامتحانات على خير

غادة الكاميليا said...

هنفضل مستنيين الجديد كتير كده ؟؟؟؟
كل سنه وانت طيب ومتغبش علينا

بعيدا said...
This comment has been removed by the author.
بعيدا said...

اخ أشرف، انت كنت موجهلى الكلام؟؟
أعتقدت ذلك لأننى من أشرت للحوار ..ولكننى لست خلود
:)

على كل حال، شكرا على مجهودك لأن الحوار فعلا أسعدنى..وزى ما الكل قال، جاوب على كل شئ كان بيدور فى ذهننا.

متهيألى إننى أعلم عن الاستاذ خالد كإنسان أكثر منه كفنان
وهذا الاهم
:)

وكل عام وأنت والجميع بخير

Anonymous said...

وانت البريئة المؤمنة
بالحب في الزمن الغريق
غزلك مضيء
واجمل قصايدك ما انكتب
وماطالش لسه المنتهى.. آخر لهب

الزمن الغريق الذي تغرق فيه كل المعاني الجميلة ولم يعد فيه مكان لحب
ولا يحزنون.

الفنان لا يمكن أن يعتبر أي عمل له أجمل أعماله لانه دائما ما يرى في عمله عيوب يحاول تلافيها في الاعمال القادمة وكثيرا ما يسأل فنانون عن أجمل أعمالهم فيجيبون بأنه العمل الذي لم يقدم بعد

والمحب دائما ما يرى أن حبيبه يستحق المزيد وأنه قادر على أن يعطي أكثر علشان كده
أجمل قصايدك ما انكتب

عمر لهب الحب ما يوصل لمنتهى طالما القلب ينبض ويا رب تفضل النار مشعلله علشان يستمر فيض القصائد الجميلة دي

maf2ou3a said...
This comment has been removed by the author.
maf2ou3a said...

how are u mr. khaleed we miss u
happy new year

^ H@fSS@^ said...

خالد انت بخير؟؟
لحسن تكون انفلونزا حقيرة من اياهم؟؟
ايه الغيبة الطويلة دي
مستنينك

الخبز و الحرية said...

صباح الفل على الجميع.. معلش كنت واخد دور برد من النوع القذر اللي بيقعد أسبوعين.. خللوا بالكم عشان فيه دور بشع بيطول ونصيحتي أول ما تاخدوا الدور تشوفوا طبيب فورا وبلاش الوصفات والافتاءات عشان بتضيع زي ما حصلي:(
بشكر الجميع على تعليقاتهم الرائعة وبرحب بكل اللي جم لأول مرة وأرجوكم سامحوني على التأخير ماكانش بإيدي فعلا..
عام سعيد عليكم ان شاء الله