Friday, December 22, 2006

مش مشكلة

هديت شوية المسألة
ولا عادشي حبك مشكلة
ولا عادلي رغبة أفهمك
ولا أخنقك بالأسئلة

هديت صحيح المسألة
ورجعت اخّبط في الخلا
في القلب حزن ملوش حدود
عايم ف موجة صهللة

هديت كثير المسألة
والدم راق بعدن غلا
وقبل ما يكون الانفجار
حليت فتيل القنبلة

هديت خلاص المسألة
وطويت كتاب المرحلة
دلوقتي لو تتندمي
أو تفهمي.. مش مشكلة

15 comments:

maf2ou3a said...

حضرتك عارف أنة فعل بيبقي إحساس الإنسان فعلا في معمه الحب ببقي عصبية و ردود أفعالي عنيفة حتي لو دي مش طبيعتي لكن بمجرد هدوء إحساسك ناحية الشخص اللي بتحبةبتلاقي إن اللي كان بيضايقك بقي عادي

هديت صحيح المسألة
ورجعت اخّبط في الخلا
في القلب حزن ملوش حدود
عايم ف موجة صهللة

أنا حسيت إن معني البين دة هو الإحساس بالخواء اللي بيصاحب الإنسان بعد أنتهاء القصة مش دة قصد حضرتك
إحساسك أنك قلبك فضي بعد مشاعر و معارك

في الآخر أحب أقول إنها جميلة قوي و حساسة

سـردية said...

افتقدناك كثيرا يا زعيم
سعيد جدا بعودتك
مالآخر عجبتني قوي
بساطة وصدق عاليٍ

hebaz said...

حلوة أوى لأنها صادقة جدا

albida said...

كده يبقى الحب مات والقصة انتهت

لأن الحب والهدوء- خصوصا بعد ما قريت كتير من قصايد حضرتك!- لا يجتمعا أبدا
الحب مهما كان فى ظاهره هادئا فهو بيبقى زى البركان فى القلب

فى القلب حزن ملوش حدود
عايم ف موجة صهللة
أنا فاهمة حضرتك فى السطرين دول جدا!!
ساعات فعلا الواحد بيبقى غرقان فى الحزن مع أن سلوكه والأشياء المحيطة بيه على عكس كده تماما, بتبقى بتوحى بالسعادة... بس بالنسبة له بتبقى مجرد صغب وضجيج

manal

KHALED-ELSAWY said...

اه بالضبط يا مفقوعة ده الخلا اللي قصدته. شكرا:)
شكرا يا شريف.. والله انا كمان مشتاق للجو ده ولصحبة الروح دي.. شكرا لصداقتكم.
شكرا هبة.
أه بالضبط يا منال.

وينكى said...

فترة ما بعد العاصفه
وبداية إعادة الحسابات.. واسترجاع كل لحظه مضت بشىء من التعقل والهدوء
فترة حزينه .. القلب فيها بيبقى فاضى.. بس بيمر بفترة نقاهه
قلب وحيد ..الحياه اليوميه ما بتعبرش عن الآمه
يمكن أكون بعدت عن الموضوع بس هو دا اللى حسيته

صفصف لادي said...

حيث لا ينفع الندم

KHALED-ELSAWY said...

وينكي احساس في محله.
بالضبط يا حفصوتشا.. حيث تووو ليت:)

wa7a said...

الدم راق وبعدين غلا..... الاحساس بقيمة الانسان بعد ما ضيعته(او ضيعها)

صحيح,دلوقتي لو تندمي او تفهمي مش مشكلة
لان الفرصة عدت واللحظة خلصت, واحساس جميل برئ مات.

استاذ خالد احيك على قصائدك, كلها معبرة جدا واتمنى من كل قلبي ان تجد الغالي المفقود.....والدعوة عامة لينا كلنا...... امين .
تحياتي

ragazza11 said...

Hi Khaled,

I really love this poem, anyone who's been in love before knows that it takes quite a while and a lot of effort before the feelings die out..someone once told me that the reason why the word "qalb" and "taqalob" in Arabic are similar is that the heart or the feelings often change..I wonder why is it then that they teach us through fairy tales about one and only everlasting love like in Snow White and Cinderalla..your poem brought back a lot of emotions that's why it is special.

big big girl...in a big big world said...

هديت كتيير المسئله
و طفيت شعلة الحب الى كان
كان يا ما كان
دلوقتى قلبى عاد ليا خالى
دلوقتى قلبى رجع صديقى
دلوقتى يا ست البنات معدتى حلمى
دلوقتى ماعدت عنيكى هى طريقى

اعتذر على المداخله بس لما قريت مقدرتش امنع نفسى من الكتابه
مرسى ليك جداا على المدونه الجميله

memokareem said...

السيد الاستاذ :

ليست هذة اولى زياراتى لمدونت حضرتك و لكن هذا اول تعليقى لى هنا

عجبتنى جدا قصديتك كثيرا


و لكن لديى سؤال هل تقصد الحب انه يبداء كبيرا ثم ينتهى ؟ ام ان حضرتك تقصد ما بعد نهاية الحب من حزن و الام فراق ؟

اوليس هناك الحب الذي يزداد بمضى الوقت ؟ لا يقل انما يزيد ؟ حقسقة لم اجرب هذا النوع و انما اقراء و اسمع عنه

لا ادري سيدى .... عموما كل تجاربى ف الحب انتهت بالم .... و كان الحزن هو نهايتها و الحزن كان يبدأ كبيرا مثل الجبال و مع الوقت يتلاشى

salma said...

مش مشكلة شعور باللامبالاة ينتاب الانسان بعد تلقي الكثير من الصدمات لدرجة إن مفيش حاجة بتبقى فارقة معاه وده مش في الحب بس ده في كل حاجة ويبقى الحزن زي الفرح ومفيش حاجة تفرق.

رجعت اخبط في الخلا
في القلب حزن ملوش حدود

الخلا بيزيد من قسوة الحزن

Carol said...

brilliant:)

moshmosh said...

اخر مرة اما سبتك كتمت الشكوى ليه مش كان احسن حاسبتك و عرفت القصة ايه لكن محاسبتكيش و قلتلك مفيش كانك يا حبيبتى امرك ميهمنيش تقريبا نفس الاحساس

رائعة