Friday, December 22, 2006

مايهمنيش

مايهمنيش
مين اللي كان فارس ودبتِ بين إيديه
مايهمنيش خد منك ايه واداكِ إيه
ولا افترقتوا ازاي وليه
مايهمنيش
غير تفتحي الدرج الصغير
جنب السرير
وتطلعي صورته الحقير
وتخزقي بإيدك عينيه!!

مقدرش افكر إلا إنه كان حمار!
سرق براءتك واختفى زي الغبار
وماسابش غير ذكرى الملل
والشك والطعم المرار
مايهمنيش .. غير الصراحة وان انا..
ما أحبكيش.. واطلع .. حمار!!

إديني نفسك كلها
بحلوها وبمرها
خلليني دايما احبها
وعلى عضام الخوف نعيش

حبك لوحده يهمني
واللي انت خايفة يهدني..
ما يهزنيش
إوعي تقوليلي حعترفلك باللي فات
أنا اللي فات.. مايهمنيش

12 comments:

maf2ou3a said...

ياريت الناس تقرأو تفهم إن ماضي الشخص سواء راجل أو ست ملكة لوحدة

hebaz said...

أنا اكتشفت المدونة بالصدفة البحتة
و بصراحة أعترانى شىء من الذهول حيث أنى لم اعرف انك كاتب ماهر بصراحة شدنى جدا و توغل الى فكرى و أثر فية ( أسمحلى أكثر بكثير من الممثل )
عارف يا ريت كل الناس تفهم و تعرف المعنى الى انت عايز توصلة , أتفق معاك جدا جدا أن الماضى ملك لصاحبة فقط و مش من حق أى حد أنة يسألة علية و للأسف الناس مش بتدرك أن الانسان هو محصلة و نتيجة لتجاربة العديدة الى مر بها فى حياتة و ماضية
يعنى زى ما قلت بالضبط
أدينى نفسك كلها بحلوها و مرها
تحياتى

albida said...

يا سلام هو ده الحب بجد!! المشاركة فى الحلوة والمرة, احترام الخصوصية

وعلى الرغم من كده المشاعرة مش متبلدة.. بالعكس دى مليانة بالغيرة والروح الانتقامية.. بس الفرق أنها لصالح الحب

وتطلعي صورته الحقير
وتخزقي بإيدك عينيه!!

جميلة أوى الصورة دى
واللى أنت خايفة يهدنى
مايهزنيش
رائع ذلك الحب الذى يمتزج بالقوة

manal

KHALED-ELSAWY said...

مش مهم نغلط المهم لما نعرف غلطنا نتراجع عنه.. وانا كنت فيما مضى من الاغبياء اللي بيحققوا مع تاريخ الحبيبة عشان مصر انها ملاك مش شيطان زيه! ثم أفقت على غباوة مثل هذا السلوك مني أو عليا فقررت أن لا أنقب وراء من سأحبها طالما أني أحترمها بصورتها الحالية وطالما لم تخدعني أو تكذب علي.

وينكى said...

الله... ايوه كده كان فين الكلام الحلو دا من زمان
انت لمست نقطه مهمه جدا.. وعاملالى مشكله نفسيه
لأن مش أى حد ممكن يغفر أخطاء الماضى للشريك.. وإن وجد هذا الانسان يبقى بجد نادر الوجود
ليه الواحد يدى نفسه الحق انه يحاسب حد تانى على وقت ماكانش هو جزء منه؟؟.. بأى حق؟
كلام رقيق
أسلوب سلس.. التعابير فى منتهى الوضوح والرقه
عودُ أحمد
:p

honeybee0608 said...

I felt this should be a song!
after i read it i felt awy that it is words of a song, not sure who may sing it, but lazem sot gamed, may b ali el 7aggar aw mounir, 7ad 7assas shwya, anyway i liked it and liked its topic, wade7 en koll el banat homa el katbeen ta3likat w homa el ma3 mawdoo3 el poem, as for boys they have to be mature men to realize the right thing in this issue, like wht u khaled said.

صفصف لادي said...

ما هو اساسا مينفعش نقول عليه فارس
ده يبقى حقير اللي يحب واحدة و بعد كده يسيبها بكل برودة اعصاب

المهم

المعنى الي في كلمات القصيدة حلو اوي و نبيل
و دي اهم حاجة فيه
هي دي اخلاق الفرسان

KHALED-ELSAWY said...

ثانكيو ليديز:)

ragazza11 said...

Hi Khaled,

Happy new year to you and the rest of the bloggers. el mawdou3 da men a3kad el mawadee3 la'en el kalam sahl laken el wake3 sa3b we ta'theer el nass as3ab..momken el wa7ed yekoun moktane3 beshee' laken el 7awaleih yekhalouh ma ye'darsh yenafezoh fel wake3...a3raf amsela keteera 3an couples kano bey7ebo ba3d we 3ala washak el gawazs laken 3eelet el ragel fashelet el gawaza le'en el bent "mesh monassba". We kol sana wento tayebeen.

someone in life said...

Hi ,

It is nice but sorry to say it is just a poem not real becuase none forgive or appreciate .. I see hunters always around and they put honey on the surface by good masks of forgiveness and understanding ..damn life

Soha said...

مايهمنيش
غير تفتحي الدرج الصغير
جنب السرير
وتطلعي صورته الحقير
وتخزقي بإيدك عينيه!!

what I like most that you asked her to TAKE AN ACTION. indeed you gave her a hand but also u asked her to take an action ...amazing ya Khaled

سمو الأميرة سارة said...

تحفففففففففففففففة جداً

بس صعب أوي يتحقق أو يكون حقيقي

عجبتني اوووووووي دي

إديني نفسك كلها
بحلوها وبمرها
خلليني دايما احبها
وعلى عضام الخوف نعيش

حبك لوحده يهمني
واللي انت خايفة يهدني..
ما يهزنيش
إوعي تقوليلي حعترفلك باللي فات
أنا اللي فات.. مايهمنيش