Friday, December 22, 2006

مالآخر

بالرغم من إنّا ف بيتنا
بحسنا إثنين غيرنا
مستغربينّا ولا كأنّا
كنا ف نوم ملهوش آخر

روحي بتحيا من نَفَسِك
ومدياني يا روح نفسك
وامسك ف جسمك واتمسّك
ألقى مشاعرك تتاخر

مين اللي جرّح أوراقك؟
داقك ما قدّرشي مداقك
وانا لو أكون برضك شائك
لكن بحبك مالآخر

سنين وانا مشتاق حضنك
سنين وسني من سنك
ده انا اللي مالأول منك
إديني روحك للآخر

7 comments:

maf2ou3a said...

جميلة قوي بس إحساسها قوي جدا بيتهيألي صعب إن حد يدوب في حد الدوبان دة كلة و يعيش في روحة مش كدة يخاف أحسن يقد نفسة و ميبقاش عارف هو بقي أية

KHALED-ELSAWY said...

وهو انت يعني شايفاني عمرت في أي قصة:) ما هو ده الرعب الأزلي يا صديقتي.. حتى لو مش صح بس حاصل.

وينكى said...

ادينى روحك للآخر

مش لاقيه كلام يوصفها


مين اللى ف قلبه كل الحب دا
انهى قلب دا اللى شايل كل المشاعر دى
تعبير رائع لأبعد حد

KHALED-ELSAWY said...

انا :(

وينكى said...

طب ليه زعلان؟؟
دى حاجه انت المفروض تفتخر بيها
اكيد هاييجى يوم هتلاقى اللى تستاهل الحب دا كله
الأمل قدامك مادام لسه عايش

albida said...

لا تعذل المشتاق في أشواقه
حتى يكون حشاك في أحشائه

المتنبى


manal

wa7a said...

الله عليك........ مين اللي جرح اوراقك
واحد منه لله اعمى البصر والبصيرة :))))

ما اعتقدش ان لما حد يدوب في حبيب او يلاقي الحبيب اللي يدوب فيه بالشكل ده يفقد نفسه لانه هو دا اللي عايزه وهو دا حلمه بالعكس دا من غيره نفسه مش مكتملة

تحياتي
واحة