أسد جريح

أسد جريح ملهوش في الكون
غير الضوافر والأنياب
أشباله هربت من طوعه
ومقفلة ف وشه الأبواب
ماشي في غابة دحلابة
قرودها تقدر عالأفيال
شجرها حيات وأفاعي
وميّها فخ وأغلال
أسد جريح مضروب بالسهم
أسد جريح في الروح والجسم
الأنثى خانت والأشبال
شغالة في السيرك المنصوب
والنمر أنبل أعداؤه
بقى نجم سيما ف فيلم سكوب
ومن الزرافة للخرتيت
يتسولوا اللقمة ف إعلان
أسد جريح ملك الغابة
وماعادش ملكه في الإمكان
جريح جريح يزأر يزأر
تضحك عليه كلاب الغابة
والوحل ينفض تماسيحه
تعض ديله وتتغابى
وتحاصره خنازير وحشية
والكثرة شاطرة وغلابة
مايخلصوش من وسطيهم
إلا فؤاده الضرغامي
جريح جريح بس غضنفر
حامي على الكون المايع
أنا ليث ف جلدي ومسامي
مهما تجوني بأسامي
فأنا الأسامة المتكبر
أموت ولا أهرب مالساح
أنا الوغى وأنا الرمّاح
لبيك يا أمسي المشبوب
يا كبريائي المسلوبة
جريح جريح يزأر يزأر
الغابة تخفي خنازيرها
وتلم بومها وثعابينها
وكلابها تنده أسيادها
بمصفحاتها وجنازيرها
جايين على السبع المجروح
إكمنه بيسلم في الروح
أسد جريح مايحسوهشي
غير صقر زاهد في الصحرا
لما الأصيل حس حصاره
حس بشجن شعلل ناره
نزل بضوفره ومنقاره
وانضم للسبع المجروح
انضم شهم لشهم صحيح
بقى مش مهم الجيش والريح
وقف المناضل والقناص
والغابة ولعت ضرب رصاص
لكن وسبحان العاطي
سبعين لوا خيل برية
هوجة كرامة وحرية
لبيك يا ملك الأحرار
سبعين لوا سمعوا زئيرك
ومع وزيرك ذو المنقار
سبعين لوا سبعين إعصار
لبيك يا تاج القبة
ملعون أبو الخوف والرهبة
بص الأسد للخيل والصقر
وقالهم ميت ميت
ميت ومش عشمان في النصر
قالوله مين سمعك يا كبير
الموت بقى أحلى من العمر
الكون بقى شيء مايسرش
أتفه ما فيه بقى يتحرش
والموت جوارك بيشرف
نموت لكن مانعيشّي ف عش
نموت لكن ما نتحرفش
وقف الجيشين برة الغابة
في الناحية دي كل الغابة
ومعاها ناس ثانية ديابة
برصاص وألفين دبابة
والناحية دي وقفوا الأصحاب
سنوا المخالب والأنياب
لحس الأسد شق جراحه
زأر ورد عليه الخيل
والصقر قام زاعق في الليل
يا مرحبا بالموت واقف
زي الشجر زي النخلات
هجموا على جيش البهوات
جريوا الكلاب من قدامهم
سابوا البطولة لأسيادهم
جريوا الديابة والخنازير
والدبابات داست في الوحل
والدم يطبع عالجنازير
مافضلش إلا صهيل وزئير
حتى الرصاص ماعادشي خطير
والمعركة دارت دارت
بقت الوحوش في الوحل عجين
والناس من الدهشة اتدارت
ومن الذهول على أناملها
وقف الزناد وسط الحلقة
خرست نيرانها وقنابلها
العركة حطت أهوالها
والفجر داخل على مهله
الغابة خليت من ناسها
ومن الشجر كشفت راسها
وطلت الشمس الجاية
لقت المكان غرقان في الدم
وعبير جديد في الغابة اتشم
نسيم من الطينة والدم
ريحة كرامة وحرية