عشر حاجات

عشر زهور راحت مني
وفي البوكيه فاضل واحدة
دبلانة تبكي من الوحدة
عشر طيور طارت مني
وفي الفرنده فاضل واحدة
بردانة مالخوف والوحدة
عشر سنين عدت مني
عشر سنين خمرة وحريم
لما الحرملك ضاق مني
سن الجنون ده من سني
والقصر من جند لوزرا
واقفين على بابي الفيروز
وعجوز أرسطو بيسقيني
الحكمة مالدنيا بالكوز
وف حضني مهرة يونانية
بديها من لحمي الجملي
وقاعد لنا مايكل أنجلو
على السرير يرسم فينا
كندوز بيطحن ف بتلو
ناكل صوابعه ونحتله
وموزار على الكنبة التركي
بيشد في اللاي السحري
ويقوللي كونشرتو الأحزان
عشر جياد هربت مني
عربي وحرة ومختومة
بالنار وبلجامي الدهبي
ونزار بينزف أشعاره
على المخدة يسيل دمي
وسمعت موتي من الشباك
شعبي بيصرخ آه يا سبعي
وصحيت لقيت جثة ف حضني
عشر سيوف رشقت فيها
ومؤامرة في القصر بتعوي
حتى الجواري بالسكاكين
طالعين على العرش المسكين
عشر سنين شايلين أعلام
بونابرت نط ورا سريري
الثورة قايمة من الحمام
والدم كان ماشي لقدام
ثعبان ومتثبت طيري
وتتار بتكسر مناخيري
وتشد بغداد من تحتي
حتى الجواري الأندلسي
سرقتني ف سلاحي وفرسي
وسقطوا الداية اليمني
بيقولوا كات حامل مني
فين الأمين فين المأمون؟؟
فين هم أولادي الملاعين؟
عشر عيال ماتت مني
اللي اتطحن تحت بلاطي
واللي خنقته بملاياتي
واللي دفنته ف لحم امه
عشر عيال شردت مني
والغابة واسعة وغريبة
وان جزتها ألقى الصحرا
وان دستها بحر هيولي
وقراصنة حمر يبصولي
عشر حروب كسرت صيتي
كل الشعوب دخلت بيتي
تشرب وتزني على موتي
وحاولت اقوم مالقيت جسمي
نايم عجوز بين الشبان
عريان ومتقادة الحفلة
عشر شموع تضوي ضلوعي
وتحرق الشعر الشايب
واما المسيح حاول ينطق
صلبوه على باب الأوضة
مفيش نبي يتشفعلي
إلا ويدوله بالكوع
سحبوني من تاجي وشعري
ورموني قدام المأمور
يوناني طمعان ف هدومي
وروماني يورث ف حريمي
غجري ويهودي وأعرابي
بيسنوا نابهم على بابي
بارمين شنابهم عثمانلي
ووقفت احارب في العالم
وحدي كسبع ملوش صاحب
عشر جيوش حاصرت جسمي
وجابوني من ديلي المعقود
آسف على السم الهاري
آسف على بحر الأحزان
القلب صار حتة لحمة
مصلوبة على فرعين من زان
انا مش أنا وانا زي زمان
مستنظر الحب التايه
وبحب شيء مش في الإمكان