Thursday, November 30, 2006

إحكيلي

إحكيلي عن بكرة
إللي حيصبح حقيقة
سمرا وحلوة وبريئة
من بعد ما كان فكرة
جوة الفؤاد الدابل
وابقي ابعتي المرسال
يام العيون ساهية
ويا الحمام الزاجل
إحكيلي عن لون السنابل
يا نفحة هالّة على غيطان الملح
إديني بالفم الدوا
تترد من ثاني الحياة في القمح
إحكيلي يللا
إحكيلي عنك أكثر
طعم الكلام ما بين شفايفك سكر
إحكيلي عن شعرك بحور
إحكيلي عن لون السرور
عن حبنا المولود بيتكلم
حطي على جسمي الشهيد
خطي على عمري أثر
خلليني اخضّر في الحجر
إحكيلي عنك.. عن كلام القمر
عن ملحمة بكرة السعيد
الدنيا يرجع ليها صوت
وان كنت اموت .. يكفاني اموت فيكي
وان كنت اعيش .. أرجع واحبك موت

8 comments:

Anonymous said...

خالد، أنا بجد مش عارفة أقول ايه ولا ايه... إحساس عالي أوى من فنان جميل... في الأربع مدونات
حسيت انى زى الأخرس اللى نفسة ينطق...أي حاجة حقولها حتبقى بلا قيمة...
أحسنت ولك تحياتي

الخبز و الحرية said...

متشكر يا عزيزتي الف شكر:)

Anonymous said...

مش عارفة.. القصيدة دى نقلتلى احساس غريب شوية
حسيت أنها رسالة مبعوتة من واحد مات من العالم الاخر بيحاول يعرف فيها ايه اللى هيحصل فى الدنيا اللى هو تعبب فيها… الدنيا اللى مات وهو بيحاول يحقق فيها حلمه ويوصل لحبيبته
بيسأل هل يا ترى اللى عمله هيكون ليه أثر فى ميلاد أمل بكرة


manal

Anonymous said...

جميلة قوييييييييييى الأبيات دى
ابيات مصرية بجد
ابيات عن الحب اللى بجد
ابيات من فنان بجد

ماكنتش اعرف إن إحساسك عالى قوى كده يا أستاذ خالد يا فنان

مفيش كلام تانى ممكن أقوله
غير شكرا ليك
سلام

Anonymous said...

انا قريت القصيدة 3 مرات وكل مرة كنت بتخيلها بشكل مختلف:

اول مرة تخيلت جد مناضل هجوز بيكلم حفيدته و يطلب منها تحكيله عن بكره. شايف ثمار العمل كلها اتركزت في كلامها الناري اللي بيرجع لروحه شبابها. وشايف فيها امل ملوش حدود.
الهدف اللي كان بيسعي ليه طول عمره اتحقق في حفيدته، كلامها و فعلها بالنسبة له امل بكرة و استمرار حلم دام سنين و اتضحي عشانه بحاجات كتير.

تاني مرة تخيلت اتنين عشاق واحد منهم بيستمد الحياة من كلام التاني عن بكرة. بيأكد لنفسه افكاره و مشاعره لما بيلاقيها طالعه من الطرف الآخر.

تالت مرة تخيلت مناضل جريح ومعاه رفيق. الحرب جواه و حواليه بتطل من الشباك و عنين رفيقه و من انعكساس عالازاز. بيطلب من الرفيق يحكيلة عن بكرة ، ثمرة جراحه اللي بيعانيها. بيحس بالامل الجديد نابت علي الجرح العميق المؤلم. بيحس انه لو خسر حياته فهو كسب بكرة اللي كان بيحلم بيه. لو عاش فحيلاقي امل بكرة يكمل بيه ايامه.

schlau_oyoo said...

الحقيقة رائعة و يمكن جمالها انها فيها امل.
تحياتي

marwa said...

بجد وحقيقي جميلة ..انت رائع ..وبعدين شكلي ححبك بجد ولا أيهّّ أنت فنان مبدع وشاعر مرهف الحس ربنا ينورلك طريقك أكتر وأكتر .

Anonymous said...

عزيزي الصاوي
تقول ايه عن زمن الحب الجميل..تقول ايه عن نهفة روح عاشقة في باكورة طلعتها..اهو انت اللي شاهد وعايش بيها...
الف شكر