Monday, November 13, 2006

للعمر

وانا برضه بحلم شملنا يتلم
وعد الضوافر عرشها في اللحم
وعروق إيديا اليابسين صارخة
اللابسين بردة ضنا وبهتان
المحبوسين بين كبرياء العضم
متسلسلين من وجدهم عطشان
مليون وريد في الإيد غنا وهذيان
السلسبيل حِبي ونقطة دم
تسري ف سري تنكشف أسرار
والبور حينطق يسمعه الصبار
ويعود تجلي العقل في الأشياء
لون الفواكه زهزه البستان
والدم لم المدبحة واتلم
أصبح جسد عائد من الميدان
راجع بظهره وراجعة دمعة بنت
تدخل عينيها تقول أنا ما نزلت
عصافير ف قلبي يا أمة الراجعين
لو كان لقلبي أجنحة ما يطير
يفضل يرفرف يمسح الطباشير
وتعود وشوش الناس على الأعناق
مرفوعة قول مليون علم ف عناق
أحلف بقلبي اللي ف حجم الكف
إني حصافح يومها كف العمر
واكتب بعيش علشان بميل ليها
وعشان ف قلبي ألف سر وسر

6 comments:

Anonymous said...

حلم جميل
لكن باحسه عسير المنال فى الواقع
ليه الاحساس دا بيغلبنى لدرجة انى ما بقيتش قادره اصدق الحلم؟؟

Anonymous said...

بتجيبى فى سيرتى ليه يا وينكى وأنا مش موجودة؟ ايه عسير المنال دى؟
:) :)

لو فقدنا القدرة على تصديق أحلامنا يا وينكى يبقى الحياة ملهاش أى معنى! هو أحيانا بيجى على الأنسان فترات بييستصعب حلمه بسب قسوة الواقع... لكن مش لازم أبدا يجعله مستحيل


manal

الخبز و الحرية said...

وينكي مالك اليومين دول داون ليه؟ هو انا على طول داون ثم اب ثم داون بس برضه بنطمن.
فين نهاز يا جماعة مش باينة؟

Anonymous said...

نهى موجودة يا أستاذ خالد بس هى مشغولة اليومين دول فى الشغل شوية بجانب انها مريضة حبتين... أدعولها ترجعلنا تانى بسرعة علشان احنا مفتقدينها جدا
:)

manal

Anonymous said...

نهاز تعبانه؟؟؟
لأ ألف سلامه عليها
أنا رايحه أشوفها فى مندونتها
تعالوا كلنا نزورها ونتطمن عليا شروه واحده
دى هاتفرح قوى

الخبز و الحرية said...

نداء إلى نهاز.. عودي بسرعة.. بابا وماما يحبوكي وماكانش قصدهم يخنقوكي.. يا نهااااااااااااز.. زي يا جهااااد كده