Sunday, November 05, 2006

الحب آه قاتله الله!

"الحب آه قاتله الله"
في الحي كان راجل مهووس
ف إيد علم والتانية فانوس
داير يدق على الأبواب
وفي الحيطان ينطح راسه
كام باب عليه دمه العناب؟
مين ينسى شكله وأجراسه؟
"الحب آه قاتله الله"
رجعت حبيبتي من البستان
رجعت حبيبتي كراميللا
ف شعرها وردة وفلة
وف إيدها روحي وأشجاني
وقعدنا فين ريح الشجرة
اديتني لقمة وسقاية
وحكيتلي عن جوة البستان
سبحان من اللي من بذرة
بينبّت النخل الوارف
زي ابن آدم ما هو عارف
الحي من حي بيخرج
حتى السمك ساب المية
ايه الحياة؟ سألت هي
الأرض والبطن الحبلى
شجر شجر على بحر النيل
وعيال بترمح عالسكة
موسم حصاد لبست طرحة
ولبست أبيض وشبيكة
شبعت بلدنا بأفراحها
عاوزين نعيش مع بعضينا
ولا نفترق عن بعضينا
ويكون لنا من بعضينا
بنت وولد شبهي وشبهك
مدي ف حياتي أوصالك
مالك مابترديش مالك؟؟
حاضنك لكن باردة ف حضني
لا حاضنة بنتي ولا إبني
الحب آه آه آه
الحب آه قاتله الله !!

10 comments:

albida said...

ليه يا أستاذ خالد بتعيشنا فى جو حالم وجميل .... وفجأة كأنك بتدينا بالطوبة فى دماغنا؟ ليه مابتكملش أحلامك لاخرها؟ ليه دايما حاسس أن حتى لو اللى نفسك فيه اتحقق هيروح منك؟

manal

^ H@fSS@^ said...

مش عارفة اقول ايه؟؟؟
انا مكنتش ناوية اعلق على دي بالذات

يعني لغاية قبل اخر سطرين كنت حاسة انك بتوصف جنه

و اخر سطرين كانوا
ادم و حوا لما خرجوا منها

الخبز و الحرية said...

يا ليلي
حييجي يوم والحب يكبر في الفؤاد
ويمد قدامه الطرق وينور السكك البعاد.. ابقي اقريها في الارشيف:)
يا منولة هو انت حتقعدي قارشة ملحتي كده:)؟
حنعمل ايه يا حفصوص؟ ما القصة انتهت كده

Anonymous said...

بيقولوا أجمل مافى الحب عذابه
لكن أنا مش شايفه كده خالص
فى الأول كنت باقرا حاجه عسووووووووله وحبيتها كتير
لكن النهايه.. مفاجأه بجد
لكن هل بييجى عليك اليوم اللى تفتكر فيه المواقف دى وتبتسم وتقول: كانت أيام
بتفتكرها بسعاده ولا الجرح القديم بيوجعك؟؟

^ H@fSS@^ said...
This comment has been removed by a blog administrator.
الخبز و الحرية said...

وينكي انا ببص على اللي فات وابتسم مهما كان واجعني لأنه فات خلاص، لكن ممكن حاجات تفضل مأثرة في شويتين زيادة.
متشكر يا حفصة ولكني لا اقبل الشفقة بتاتا:)
شكرا يا فدوى ومفيش اي انة عشان دي قصيدة مكتوبة من زماااااااااان:)

^ H@fSS@^ said...

اسفه استاذ خالد لكن مكنش قصدي الشفقة ابدا و عمري ما فكرت بالاسلوب ده
معلش يمكن خاني تعبير او كلمة
اسفة كمان مرة لاني لا اعتقد بالشفقة في علاقة بين اي اتنين ايا كان نوعها سواء كانت صداقة او زملاه او حب

الخبز و الحرية said...

ايه يا حفصة بهزر معاكي مالك حسستيني اني لازم ابقى حزين على حالي بجد:)

^ H@fSS@^ said...

dont be 7azeen, i was just afraid of the slightest idea that i might have said sth inappropriate.

please take off the word verifecation pleeeeeeeeeeeeease.

regards

الخبز و الحرية said...

يؤسفني يا حفصة اني اقول لك اني مضطر للفريفيكيشن شوية عشان بكره الاعلانات العشوائية.. شوية بس:)