Wednesday, November 22, 2006

كلام مرسل 2 (متتالية من عدة حركات)

من قد إيه كنا هنا يا هل ترى..
والنيل بتنده ميته نهر الفرات؟
نفس الوشوش، نفس الكلام والمنظرة
نفس النفوس.. نفس الزكام.. نفس الحاجات
من قد ايه كنا هنا؟ أفلا ترى..
إن المظاهرة نصها أغوات؟
--------------

خمسين سنة مروا على سهوة
وكأنها والله ليلة امبارح!
أمة بحالها ملطعة ع القهوة
بتشد بودرة وتتحقن.. وتكافح
خمسين سنة يا مدمنة مش نزوة
آن الأوان يا أُمّة أن نتصارح
--------------
إديني إيدك يا أَمَة واتحملي
البتر واجب والمخدر مش كثير
حديكي سكة وانت وحدك كملي
يا توصلي، يا تموتي بس.. كما البعير
هاتي شفايفك.. غمضي واتأملي..
لحظة ميلادك مهما كان مر وعسير

40 comments:

Anonymous said...

بتر الفاسد
ثم ارشاد الجديد
ثم ميلاد النضيف

مفيش كلام يتقال بعد كده

manal

الخبز و الحرية said...

صباح الفل يا عزيزتي عاملة ايه؟ بصي بقى هي قصيدة واحدة طويلة اسمها كلام مرسل حاططها في بوست قديم والاجزاء هنا المتتالية بتكملها.. ليه اللخبطة؟ مش عارف:)لخبطة في الدماغ وارد.

Anonymous said...

معلش احنا اتخدعنا بما هو مسمى بالقومية العربية لكن معرفناش ازاي نحققها كانت بس شعارات لذلك فضلنا متخدرين بيها لغاية دلوقتي

بس حقول على حاجة انا شايفة ان دلوقتي في قومية اكتر من اي قوت لكن لسه بصورتها الميتذلة نوعا ما
عارفين فين؟
في كم الهائل من تبادل الاغاني حتى و ان كانت فارغة
بس اللي انا شايفاه ان احنا بدينا نعرف عن ثقافة الطرف الاخر
مظنش من 15 سنة كنت ممكن اتفرج على اغاني او اشوف اخبار من دولة خليجية او من المغرب الشقيق او حتى من السودان

يمكن يبان ان كلامي مالوش علاقه بالنص لكن اللي حسيته ماكنش ليه اي معني عندي غير القومية اللي بنحلم بيها بقالنا سنييييين
"
من قد ايه كنا هنا يا هل ترى
و النيل بتنده ميته نهر الفرات
"

تحياتي و عذرا للاطاله

الخبز و الحرية said...

والله يا حفصة انا لما سافرت كذا بلد عربي حسيت اننا ننفع نبقى الولايات المتحدة العربية بسهولة.. بنفهم بعض وبنتحمس لبعض ومنظور اصلا لينا على اننا حاجة واحدة ده غير ان مصالحنا واحدة.. بنتجوز من بعض بسهولة، بنشتغل سوا بسهولة، مش شايف اي سبب اننا نكون دويلات متهالكة كده غير انها طبقات حاكمة منحطة من المغرب لعمان.. لا قادرة تنسق سوا ولا بترجعلنا في اي حاجة.. لا بتطور ولا بتوحد ولا بتعمل غير متابعة مراكمة الارباح وفي اضيق نطاق من الجهد والمخاطرة والاستكشاف وبلا اي تخطيط ستراتيجي. لو الشعوب العربية اختارت بحرية اعتقد حتتوحد.

Anonymous said...

a very good one i still would love to read ur book

الخبز و الحرية said...
This comment has been removed by a blog administrator.
الخبز و الحرية said...

أي دراسات سيكولوجية مطلوب فيها عينة بحث كده مثلا أو دراسة عن الحشرات الخايبة أو ما الى ذلك؟:) العب بعيد يا شاطر او العبي بعيد يا شاطرة

Anonymous said...

نهارك سعيد يا خالد
اشكرك للرد على رسالتي لكني لم أستطع قرائتها وظهرت لي بعلامات غريبة الشأن ولم تستجيب لكل محاولات الـ
Encoding
ياريت ترسها مرة آخرى
as attachment
شكرا

Anonymous said...

mr. khaled donot go down to there level you answering them is all they want, all they want is your attention and they have got it donot give them that satisfaction i guess the man that accepted to a gay role in an oriental society is someone who has self confidence and professionalism so just ignore them u are much bigger than answering them

Anonymous said...

خمسين سنة مروا على سهوة
وكأنها والله ليلة امبارح!
أمة بحالها ملطعة ع القهوة
بتشد بودرة وتتحقن.. وتكافح
خمسين سنة يا مدمنة مش نزوة
آن الأوان يا أُمّة أن نتصارح

الامه ضايعه يا فنان..شوف كام بلد بيتكلموا نفس اللغه وبيؤمنوا بنفس اله ولازالوا مختفلفين..الاتحاد الاوربى فيها اكثر من 20 لغه و20 ديانه ونجحوا فى الاتحاد..

بالنسبه للست اللى مش لاقيالها شغله..
احنا ممكن نكتب التعليقات بالانجليزى..لان اشك انها بتعرف تقرأ عربى

الخبز و الحرية said...

لا يا ريس هي مش حتجبرنا نعمل اي حاجة.. دي نكرة ولا تستحق اي اهتمام.. جبنها واسلوبها الخسيس يفسد دعواها ومايخليكش حتى تسألها ايه اللي مضايقك؟ وايه اللي محسسك انك مظلومة اشرحي.. خالص.. تجاهلها لأنها لا شيء. تخيل تعمل بلوج عشان تشتم حد وانت مستخبي:) بص الدماغ!!

Anonymous said...

well again mr. khaled just ignore her she doesnot deserve ur attention act as if she doesnot exist

Anonymous said...

والله يا استاذ خالد احنا فى بلد متهالكة داخليا ماسكنا نظام ربنا يخده والى الامما يا خالد

المدون
كازانوفا

Anonymous said...

صباح الفل والياسمين على حضرتك يا أستاذ خالد وعلى كل الناس الحلوة اللى فى البلوج
:)
أنا الحمدلله... لسه بتنفس

وبالنسبة للقصيدة دى فأنا خت بالى فعلا أنها مرتبطة علشان كده أنا كتبت تعليق تانى فى أخر بوست

لا يا أستاذ خالد.. كده أحسن.. حضرتك لو كنت نشرت القصيدة دى على بعضها كان زمان كل اللى يقرأها يجيله صدمة عصبية ذهنية ويتنقل على أقرب مستشفى قسم أمراض شعرية
:)

فعلا القصيدة مجهدة عقليا ونفسيا جدا

manal

Mariam Mekiwi said...

ana a7'talef ma3ako fe mawdou3 el qaumeuia el arabia di.
heya masr bazet mesh bessabbab el tayar el 3arabi el islami?
howa e7na law kona zai ma7na fe 40's,50's we awel 60's mesh kan yeb2a a7san.
konna 3al a2al bena3raf el zo2 wel adab, kan el deen fel beit bas mesh bei7kom kol 7aga fe 7ayatna, zai lamma farouk hosny despite if i'm against him as a person, lamma ye2oul 7aga 3al 7egab ne3melha 2adeyaet ra2i 3am?? Egypt has always had middle eastern, mediternian and african spirit a kind of a melting pot. bas 7'alas egypt lost this mediterrenian spirit. we're turning again to the eruopean middle ages. el balad bayza bel superstitious wel wrong believes. we kol da bessabbab el dowal el 3arabia. ma7'aleena masr we bas. mesh el dowal el 3arabia el 7'aletna ne7rab kazza marra? mesh el dowal el 3arabia elli 7'alet el illusion beta3 el we7da el 3arabia ye2ssar 3al nas we ye7'aleehom ba2o 7'alas zai el saudia!!!

Anonymous said...

يا جماعة بس حابة اشركوا معايا في فرحتي
رامي صيام اللي كان مقبوض عليه خرج خلاص

الحمد لله

الخبز و الحرية said...

شكرا كازانوفا.
منال:) ضحكتيني والله.. الحمد لله ان انا بكتب الكلام المزعج ده منيش المسكين اللي بيتلقاه:):)
مريم الدنيا اتغيرت تماما عن وقت بلورة الرأي الساداتي ده والحقيقة اثبتت خطأه.. بس الموضوع طويل.. عموما حبعتلك عالميل حاجات تقريها وقوليلي رايك بعدها.. باختصار.. اكبر خطر على مصر هو عزلتها.. اما بقية الافكار ففيها الحقيقة اخطاء كثير تحتاج مراجعة من وجهة نظري.

Unknown said...

لو عشنا ف وهم القومية افضل من واقعية
انا ومن ورائى الطوفان

جمال الدولي said...

ياريت نكتب حاجة تديما امل

Anonymous said...

خالد.. حمدلله على السلامة! اتبسط فى الحفلة ولا لا؟
تعالى البلوج عندى واحكيلى على كل حاجة

وبالنسبة للصراصير... ففعلا هم عندهم اعاقة ذهنية!! بحسهم بيمشوا وهم مش عارفين رايحيين فين
لما تيجى روما تفيدنا أكتر فى الموضوع ده.. تقريبا هى دارسة حاجة عن الحشرات- على ما اتذكر يعنى


manal

smraa alnil said...

كان عندي امل زمااااااااااااااان اني الاقي تعريف القومية والوحدة في قاموس حياتنا
بس قعدت ادور وادور قلت يمكن مش جت عندنا رحت مش كدبت خبر سافرت برة لبلاد عربية
يمكن الاقي هناك القاموس السحري واعرف سر الخلطة
لكن للاسف رجعت وايدي فاضية
كنت عايشة وهم اسمه الوحدة
وياريت يكون عندي امل زيك كدة يا استاذ خالد باني اشوف عيد ميلادها من تاني
اهو بندعي ونقول يارب نتحد
زي ذرة الاكسجين مع الهيدروجين يمكن نعمل فيضان

admelmasry said...

الكلام جميل جدا جدا جدا

كنت كاتب جملة جديدة بقول فيها


ياللي بدعت لنا الكلام
ماتقولنا خرست ليه
هو الكلام اصبح بكام
ياعم قول هنشتريه
سمعنا صوتك في الزحام
اوعاك تضن علينا بيه


شعرت وكانك بتسمعني وبترد عليا
الكلام حلو جدا

Anonymous said...

استاذ خالد..مع دقات الساعه معلنة منتصف الليل حبيت أقولك
كل سنه وانت طيب وبألف صحه وسلامه
وعقبال 143سنه تانيين وانت على خير دايما..هديتك وصلتلك على الايميل
أنا ما قدرتش أعلق على كلامك المرسل دا لأنه مافيش كلام يقدر يوصفه مهما كانت بلاغته
فقلت لنفسي اكتفى بالقراءه وبس

Anonymous said...

أنا جيت أهو.... يارب ماكونش اتأخرت على العيد ميلاد
:)

أنا جبت التورتة والجاتوه والحاجة الساقعة
:)
جبتى البلالين يا وينكى؟
:)

كل سنة وحضرتك بألف صحة وسلامة وسعادة وخير يا أستاذ خالد
:) :) :) :) :)

manal

Mariam Mekiwi said...

First of all Happy Birthday to you!!!
I will be waiting for your emails
my email is mariam.mekiwi@gmail.com
Thank you :-)
Have fun

Anonymous said...

happy birthday to u mr. khaled we 3o2bal million sana
i really enjoyed ur role in yacoubian s building and it shows that u have dare and self confidance to accept such a role and to do it with such professionalism i am anxiously waiting for ur next role
happy birthday again

phedra

الخبز و الحرية said...

متشكر للجميع وعقبال ميتين سنة لنا كلنا:)

Anonymous said...

mr. nase7 ameen
with all do respect to ur opinion, khaled el sawy's role in yacoubian's building did make alot of buzz along the society in Egypt and in all the arab world u can hate it or love it but u cannot deny its one of the best chracters presented by the egyptian cinema in all its 100 years the role had depth, dare, novouty,and it caused lots of Discussions, ofcourse u might disagree with me but u cannot deny the success of the role

phedra

Anonymous said...

كل سنة و انت طيب يا خالد و عقبال ملليون سنة مليانيين شعر و فن من اجل الفن
و تمثيل جميل و كل حاجة حلوة باذن الله

Anonymous said...

صحيح
معلش عندي مشكلة
الولية اياها بقت تيجي بلوجي و تقل ادبها بالفاظ سوقية عليا و على منال
دلوني اعمل ايه
انا مسحت تعليقها عشان محبش حاجة وسخة زي دي تكون عندي

متشكرة
سلام

Anonymous said...

وفي قلبي نبض وفي العروق
من نبض 46 والعشرينات والخمسينات
من الجاي ومن اللي فات
أنا الولاد، أنا البنات
أنا التلامذة التلميذات
أنا الرجال السهرنين على المكن والموتورات
الشقيانين العرقانين في عذاب بؤونة وبارمهات
أنا الرجال الشغالين جوة النفق والبياعين في الترومايات
وعلى المدقات البعيدة عرق إيدين الأبهات وفي الشوارع العريضة أنا رنين الهتافات
وكلامي تلح كلح مش رطن الخوجات
أنا خضار قلب البنات، أنا حنان الأمهات
أنا الدفاتر والأبتسامات
وانا العشم فيما هو أت
أنا الشعب أنا
لو يموت غلبني الكدب يقتلني السكات
-----------------------
أيها الناس
من تلاتين سنة تقريبا خرج الشعب المصري في الشارع لاخر مرة حتى يومنا هذا، مطالبا بحقة في رغيف الخبز، يومها خرج زعيم دولة العلم والإيمان وأطلق عليه اقذر لفظ قد يطلقه حاكم على الجوعى والمحرومين من رعاياه
أيها الناس
أدعوكم بمناسبة حلول الذكرى التلاتين لانتفاضة الشعب المصري في 18 و19 يناير عام 1977 للمشاركة في رد العتبار للانتفاضة ولشهدائها ولمبدأ الخروج للاحتجاج
واعتذر لكوني سطوت عليكم واخذتكم شوية بعيدا عن عالم خالد الصاوي الذي أحبه أنا ايضا، لكني أبحث فيكم وفي كل مكان استطيع الوصول إليه لمن يشاركنا في احتفاليتنا بالكتابة والرسم والشعر وكل أدوات التعبير لرد الاعتبار لهذا الشعب، رد الاعتبار لـينا نحن
http://intfada.blogspot.com
شريف الصيفي

الخبز و الحرية said...

"Age is mind over matter,
if you don't mind,, it doesn't matter"
رجازة حلو قوي قوي.. شكرا.. دي حاجة احب اقولها لنفسي وانا عندي 43 سنة:)
انا آسف يا حفصة وللجميع بعتذر لان الشخصية القذرة دي تسللت من خلال البلوج ده لمدوناتكم.. متهيألي الاهداف بتاعتها واضحة.. تلويث اسمي، وفض هذه المجموعة.. فهل تنجح؟
شريف يا ريت تكون كل سطوة علينا بهذا النبل:).. أؤيدك مية في المية

Anonymous said...

كل سنة و انت طيب و بالف خير و صحة.
معلش تعليق بسيط، حفصة بتنتقدي السوقية بطريقة سوقية اكتر منها "ولية،وسخة". معاكي انها تضايق، بس برضه متطلعش منك انتي.

Anonymous said...

معلش يا حكي نسوان
كلمة ولية كلمه عربية فصحي تستخدم لوصف الست التي تكون متولاه من شخص للاعالة عليها و مافيش اي عيب في استخدامها
ثانيا كلمة وسخة مش عارفة ممكن استبدلها بايه تاني مثلا لوصف شئ قذر في مستوى الكلمات اللي شفتها؟؟؟
التاثير السلبي للكلمات مقدرش امنعه لان هو ده هدفة و انا مثلا مش حوصفها بانها جت ترمي ورد بلدي عندي
لأ!
لازم اكتب الكلمة اللي تعبر عن مدى سخطي بالموضوع
فلو سمحتي متقوليش ان كلاماتي سوقية اكتر منها
مش عارفة امتى حنبطل خوف من استخدام الكلمات و الالفاظ

استاذ خالد ملكش 1نب في اللي بيحصل و طبعا هي لا يمكن تنجح في تكسير صورتك بيننا لانها لسه مش قارة تستوعب نوع و طبيعة العلاقة
فمتخفش
و لو انه شتا لكن حط في ثلاجتك بطيخة صيفي

سلام

الخبز و الحرية said...

وده العشم طبعا يا حفصة وانا اؤيدك في كل كلمة قلتيها .. وبالمناسبة القذارة ليست في الكلام فقط ولكن في الدماغ والروح أساسا والسبب هو قذارة التربية اصلا.. فالأم التي لا تربي أبناءها على كراهة الجبن والخسة والأب الذي لا يربي أبناءه على محبة الشجاعة والنزاهة هم آباء يربون أبناءهم تربية قذرة كما في حالة ايف وصاحباتها ويرمون علينا عبء مواجهة قذاراتهم للأسف.. معلش بعتذر لك تاني واؤكد ان هدف ايف واخواتها هو تلويث اسمي وفض هذه المجموعة.. اصبح الامر واضحا وعلينا التصرف على هذا الاساس
وشكري وتحياتي المخلصة لجميع المحترمين ولن أعددهم كي لا انسى احدا.. المحترم عارف نفسه:)

Anonymous said...

عجبانى دماغ حكى نسوان
دى واحدة فاهمة صح

الخبز و الحرية said...

خلود وانت بالصحة والسلامة:)

Anonymous said...

كنت بدور على كلمات اغنية من قد ايه كنا هنا للراحل عبدالوهاب فوجدت هذه المدونه وهذا الشعر البسيط والمعبر اسعدتني هذه الصدفة

hasona said...

ندعو لك بالتوفيق

والوصول الي ايقاظ امة نائمة

hasona said...

هي أوقات تمر
يقضيها الناس جريا وراء أوهام

وسعياً الي تحقيق الكمال والتمام
ولك تتمة وبيان