Tuesday, September 05, 2006

فرحة نهار

أنا جيت الدنيا ناري
جوة بركة دم عايم
كنت حافي وكنت عاري
حسّي عالي ولسه صايم
أكلوني ولبسوني وكتفوني بالملاية
كلموني وعلموني وحطوا ايدي ع الهجاية
وامّا جم يستأنسوني
قمت عمت بدون علام
واندفعت بدون حزام
واللجام سفيته سفّا
واشترعت الكون ده سيفا
روحي فوضى بالكلام
والله لو مليون ملاية
والله لو بليون لجام
الحياة ملكوت غنايا
والغنا شرع الحضور
والله لو أتبقى نبقة جوة قصر بألف سور
حرمي نبقي للعيال الفرحانين
يالله دوقوا الفوضى مني
غصب عن عين الجنايني.. والعساكر والكلاب
نفسي الف الكون بحاله
وابقى موجة في البحار
ولا هوجة من غبار
وانتشر زي الاشاعة
وارتحل زي اللهيب
واندفع جوة الحصار
وارمي ثوبي للصغار
يالله دوقوا فوضى موتي
غصب عن عين الحانوتي
والعساكر والشرار
يا حلاوة يا حلاوة يا حلاوة ع النهار

3 comments:

^ H@fSS@^ said...

thanks, this would be my reply to those who try to change anybody, thinking they r doing better, and they r the ones who aught to be changed.
انا انا انا ابريق الشاي
ايدي كده بوزي كده
حد يقدر يغير شكل ابريق الشاي مهما اختلفت تصميماته؟؟؟؟

Anonymous said...

انت ناري بش مش نار بتحرق انت نار بدفي الخير وبتلسع الشر ربنا يحميك يا احلى ناري:)
تحياتي

الخبز و الحرية said...

أخجلتم تواضعنا:)