Wednesday, August 28, 2013

رجب.. لا طيب ولا ماني!

رجب.. لا طيب ولا ماني!

الوالِدين في المستشفى جاني الندا هف كياني
بقى أردوغان العثمانلي خاين بلاده الإخواني
وسعت معاه راحت منه طلعت عليه يتحداني؟!
إذن فحق عليك القول يا رجب لا طيب ولا ماني!

هاتوا الكتب هاتوا الكتبة وصحصحوا حزب الكنبة
وسخنوا كل المواتير واطمنوا.. لينا الغلبة
كفتنا طابة بالفواتير ومفيش ف إيده الا الغلبة...

البُق سهل ورغيه كثير وساعات يجيب قطع الرقبة

شوف يا رجب عامل طيب حتجيب مهانة لجدودك
خليني اقول قبلا لشعبك: من قلبي.. خليك ف حدودك
ده اللي ظلم ف ميدان تقسيم كان أردوغانك وجنودك
انصفنا يوم وابقى نصيرنا واحنا رفاقك وشهودك

أما انت يا رجب السلاطين يا سلطانية من المتحف
سلطان ف عينك ده بعينك! عامل خليفة وبتخرف
واقع ف مصر ده شيء عادي الست روعة وتشرف
لكن حذارِ شبشبها لو حد هوّب واستظرف

وافكرك بليالي زمان في داهية انت ولياليكم
من خمسمية سنة إلا يومين هجم البلا مع أهاليكم
عثمانلي دولت أغا بَلْطَج واحتليتونا معاليكم
ولبدتوا فينا تقولش قُراد تدبّحونا.. ونعطيكم

ثلاث قرون يا رجب بقرون تمص دمي ف كلابيظك
قاطع طرق قطّاع أرزاق قصرك، حريمك ومعيزك
شاركت لحمي مع المماليك واليوم وقعت ف أرابيزك
زي امّا شوطتك من قرنين حديك بشمروخي.. واغيظك

جدك حرامي ومسجل عرباً وغرباً دايقينه
سفاح يقطّع ويسجل ويحرف الحادثة بدينه
ملطوط ف ألف كتاب ملعون مافضلّهوش غير شياطينه
وجد جدك كان مجنون وفي التاريخ جم حاجزينه!

رجب ابن طيب أردوغلي ثروة بلاده من بلدي
هبيت عليه كان محتلي هبيت أحامي عن بلدي
غوّرته وماحلش عني أرخم من اللزقة البلدي
وفشخته في الشام والأناضول جيّش أوروبا على بلدي!!

والاحتلال طبعا مفهوم ثعبان ولازمه ثعبانته
خنزير يحن لخنزيرة خفاش يعاشر خفاشته
يعني الغرض حلف الأوساخ فارش على الترك ملايته
هجم العدا على جيش بلدي والمُشتهى تسقط رايته

اتكتف المارد مصري وهو لسه بيتاوب
يدوب صحي.. إوعى المصري! وهات أوروبا ونتكالب!!
وفي الأساس فلاح مصري حفظ بسرعة وقام حارب
اتثبتت أمم الظَلَما شدت مدافع وركايب

بعد أربعين سنة في الحبسة والسبع يستحلف للسور
فتح القدر صفحة فولسكاب وجه التاريخ قام قاد النور
العسكر المصري بيغلي عرابي والحدث المشهور
والمؤتمر في الأستانة لجيوش أوروبا فتحها ماخور

من تحت راس جدك برضك بركت جمالنا في الوحلة
سبعين سنة جيش بريطاني وصبحتوا ديوث الحملة
عجزتوا ومرضتوا بسرعة جُلكوا بساطورهم والحلة
وقطّعوك نفس الحلفاء عملوا على شرفك حفلة!

حموت واضايقك اقولك إيه؟! أيوة افتكرت اللي يذلك
عمري ما كنت انا مغرم بيه بس اعمل اللالي واغزّك
قائد بلادك بتعزّه بعيوبه.. برضه برقبتك
والله لانده لكمال بيه أتاتورك ينتفلك شنبك!

كفاية كده على ميتينك والحي يرحم أمواتنا
ارجع لوطنك ولدينك وبلاش تعفر سكتنا
عرّضتها ووِسْعِت عينك وعملت دوشة ف حتتنا
يا غلام أوباما يا زعامة! حارقاك طبيعي ثورتنا

يللا اجري غور قبر يلمك ويلم شبكة أنصارك
يكفينا شرك يالخرسيس حابس يا أفعى بمسمارك
يا شعب تركي ما تتحرر شوف شعب مصري بمنظارك
شيل الورم.. ألف تحية لفنانيك ولثوارك

عكر لي دمي رجب شرير تنح سِدِغ كداب ومريض
حرجع لأهلي المستشفى واضرب لي قرص من التمريض!
إياه يقف يوم ف طريقي خليه برجسُه مع التعريض
ويا شعب تركي سلام ثورة من مصري مؤمن بالتحريض

2 comments:

محمد إسماعيل سلامة said...

رائع يا فنان .. رائع

مركز الاسهم said...

مشكور علي المقالة