زعلان يا بوب

زعلان يا بوب
منك؟ يا ريت!
زعلان عليك
انت انتهيت
فضيت شراكة مخضرة
وأزلت بيت قبل البنا
وقفلت ورشة ما خلفت
مسمار يوحد ربنا
لا قلت إيه ولا ليه ولا
عبرتنا
حيرتنا!
يا ريت ما رحت
يا ريت ما جيت
عفرت دقنك لما خفت
أحسن إيديك يتوسخوا
بالدم ولا بالصديد
طبيب يا بوب
بلسم مسكن بدلة رايقة ونظارات
تنفع طبيب بيزور في بيت
ياخد ويدي مع الصيادلة والمريض
ومع الجيران
ينشر عبيره في المكان
يوصف وندفع
وبايبايات حتى السلالم
يا سلام
طبيب يا بوب
أمير ومجدع
عظيم يجنن أب فعلا مستنير
أستاذ رئيس قسم وأمين
قاسم أمين
قاسم حقيقي مشترك
أوقات بتنفع
ورقيق وشيك ومستقيم
فرجن حنين
صحيح لكن برضه وأكيد
ويا رب تسمع
جراح.. ما تنفع
الاثنين أطبا وطيبين
لكن ده طب
وده دبح لجل ما يبقى طب
مسكين يا بوب
ساقط وحتعيد امتحانك والسنة
وتعيد كلامك مع منى
وده غصب عنا وده الطبيعي
لا جراحة تاخدك لا عيون ولا مخ
شوف في علاج طبيعي
ابدأ من الأول يا بوب
من قبل طب
لحظة من الصدق الجميل بينك وبينك
في بطاقة التنسيق بلاش حلم الصبا
خليك طبيعي
ما انا كنت بحلم أبقى صاعقة
والسقا كان ضابط بوليس
وحد عارف رغبة أولى ليسري فودة أو لميس؟
فكك يا بوب
حب البطاقة لا طاقة تكتب أو جراحة
اقف صريح مع ذاتك الحيرى الجميلة
واكتب سياحة