بعد الخطاب الأخراني.

بعد الخطاب الأخراني..
(شالله ما تخطب أبدا ثاني)

مش قلتلك يابن الرفدي ملكش دعوة بأيماننا؟
بلدك هناك هناهه بلدي ما بلاش تشرّ وتتجنى
أنا لي وضعي ف منطقتي بستأذنك.. إرحل عنا
إن كان أدب.. قدمتولك طالب غبا؟ ماشي استنى!

يا باراك يا أسمر تايواني بريئة منك افريقيا
خنت الجدود واسأل في القبر وجع العبيد لعنته باقية...
بقى حمّلوك وحي الثورة.. أتابيك قفا "الطبقة الراقية؟"
تستعبد الغلبان ليهم وتكلبش الثور في الساقية!

مالك يا عرص ومال بلدي؟؟ لا حقول سوري ولا حسحبها
أنا مصري مالقهوة البلدي خدت الشهادة.. وشاربها
ذاكرت أمسك من أمسي بلدي.. في دمي مطالبها
وانا واد عصامي منيش زيك عرصت لجل ما تركبها

إياكش غرك بنيانك حبة عضل منفوخ مية
اكبر لتخسر أشياءك أنا إيدي طرشا وصعيدية
بالعقل وقصاد العالم وانا راضي بالحكم يا دنيا
حنشهد الناس البلدي من كل مصر ومية ناحية

قضيتي ف بقين بلدي والمدعي ينطق قبلا
أنا ست آلاف سنة ضوئية راشق هنا زرعة وطبلة
وحربة وبيوت في العالي مية ألف جيهة ومحلة
أعياد موالد ومدافن مليون حوار مليار نخلة

شقيان علاوله لكن صابر مفشوخ أساسي لكن ضحكان
عملت عيلة وهليلة من قبل ما يبلغ إنسان
ومزجت دمي وأحلامي ونقشت لذة على الجدران
وطبعت أنفاسي السخنة وخطفت أرضي من الفيضان

الوحش لان للجميزة والحب هذب فوراني
كحك ومواسم وعرايس عمرت كَفري بحناني
وعملت شعبي من عرَقي نسند سوا مهما نعاني
ولا حد له فضل عليا إلا شقايا.. وإيماني

عدت عليا صنوف الدهر ومت مية مرة وأكثر
عادي! ما أنا أصل عقيدتي الخير يموت.. يرجع أكثر
أنا أصلي سر وسحري جميل خليك بعيد حتشوف أكثر
حتخش مستهزأ بيا صدقني.. كان غيرك أشطر

محسوبك الغلبان طيب وإبن نكتة فقرية
أحب اغني وأتمسخر وحتتي بلطي طرية
لو حلو حتاخدنا أخوّة ناكل سوا لقمة هنية
ولو في نفسك أمراضها ما حتنفعكشي الحربية

معلش طولت عليكم يا أمم جديدة وجهلتني
أما القديم فاهم فيكم وأنا جدي شهم وصيّتني
قضيتي يا بَني الأرضين ناس من جدودكم ظلمتني
نهبتني ياما في الدفتر وف ذكرياتي ذلتني

يسلم آبائي ما سكتوشي ضُعُف الشجر ولا سلمشي
الفرس والروم دي عروشي وقتن أثور يرجع عرشي
فقير وعيان واستموت وهوب أفز ما تلحقشي!
آدي الأدب وآدي الإنذار قولوا لأوباما ما يحكمشي!!

أنا لحمي مر انا مش هندي! مع حبي للعسكري الازرق!
أنا جن أزرق على بلدي لا بنكسر ولا بتفرّق
بمزاجي سايبك في كنالي ولو عطست عليك.. تغرق
شعبك لذيذ وابن امبارح غلبان ودايما بيصدق!

لكن بقى الوكر الأبيض حزب الحمير حزب الأفيال
أفاتار جنابك كاوبويك فتحة قميصك عالبطال
ومسدساتك رسمالك والبوت عليه دم وأوحال
وجزتك على أنيابك ولغوتك خنفة محتال

كل الهلمة دهه كومة وف كومة دخلة أساطيلك
مارينز مز ومتريش بيخمسوا بالدبابة
ونظارات شمس تثبت ومجنداتكو الخلابة
والواقي من راسه لرجله ده جندي ولا بوابة؟!
ياماشالله يحرسله شبابه ما ترميهوش جوة الغابة

يا إنسانية ظلمتني فاضت بقى عزة نفسي
هاتوا الدفاتر حاسبوني وادوني من فاقد أمسي
ده انا خيري عالكوكب تمّاً زعقت فيكم من نفسي
أعوذ بالله من غضبي واستغفره على طول يأسي

قول انت طيب يا اوباما حسكت يا عم اعرض نفسك
مالك ومال أهلي ما تنطق؟! أنا حالي كرب ومش ناقصك
مصارين في بطن بتتعارك إيه يا ثقيل اللي يخصك؟!
عملت ناظر على ابويا آن الأوان اني أنافسك

بلدي وناسي ومنطقتي وماقلنالكشي ما تزورشي
شعبي وشعبك من غيركم وبالأصول الكون يمشي
والناس هنا ما بتكره حد فاهمة الأمم وش ومحشي
في الوش حلوة افلامكم في الحشو شر ما يرحمشي

مالك يا عرص؟ وعديها حكم اني مخنوق من أمك
أمك في ذاتها على راسنا والقصد بس اني أذمك
لو مصلحة هات من عندك ماللي نهبته بروح أمك
ومالكشي صالح نتصالح ولا نقاطع.. مش دمك

والله كداب يا أوباما! بالمستند طبقة أوساخ
توهمنا نهضة ومزارع مانشوفش غير تجريف وسباخ
وف مطبخ المُلْك السري آدي وصفتك وانت الطباخ
الفوضى طلعت من قصرك حترد لك ذل وأسياخ

طوّلت يا عالم ساكت خد الحديدة واتكلم
او خد يومين راجع حالك طلع كتابي واتعلم
لو صفحتي سطر تجني فالباقي مجني ومتألم
ما عايزش مالعالم والله غير المحبة اللي تعلّم

نهايته يالله عشان نختم أنا عندي حلم حلمتولكم
الظلم.. سيبك من إسمه ولونه.. راح ولا عاد يحكم
الوردة فاحت من بلدي حولين ونص بتتلجم
مالآخر اللنضة انقادت والقطر زاعق وحيفرم

حلمك يا عالم في ضلوعي أنا أمتي أمة نبية
ورسالتي بوح غمض واسمع على شرط تخلص في النية
أنا ثورتك.. أنا علشانك استفت قلبك في عينيا
أنا المثل.. وش المدفع شهيد.. و حيّ.. وحرية

في صدري حلقف أخطارها واخدك يا عالم من إيدك
أخوك أنا وكبير عنك وحخلصك من عرابيدك
حط انت غضبك على غضبي خلليني أحرر في عبيدك
اضرب معايا ف نفس الجدر وحشّ.. طهر عناقيدك

التربة حتماً تتهوى والعنكبوت الأحمر هابش
مخاليق أبالسة بأطماعها ندل الجشع لكن قافش
ممحون بيضرب بيانولا وف ربحه يضرب بالقايش
ينيموك بعيون أفعى و وولستريت هو الكابش

سلام أنا طولت وطال موالي نفسه وبيكرر
رزيل ساعات أيوة أنا عارف لحوح وبهري وبثرثر
على العموم آدي عنواني والكل يوزن ويفكر
والكارت اهه فلاح وفصيح أول أدب.. أقدم عسكر

فارد إيديا أنا ووشي عشمان نصب في بعضينا
منظمات عرصات تركن وندور احنا بعضينا
رساميل وأرباح بتعفن واحنا بناكل بعضينا
وانا اهه بهدد يا أوباما وبلاش تموتوا ف أراضينا

لو الشيطان ومعاه حزبه والنيتو والحلف بتاعه
ساقوا العوج على باب دارنا حيضيعوا.. قبلك كم ضاعوا؟
خمسين وأكثر ييجي سبعين مليون مقاتل بدراعه
أمة نبية ودي رسالة والمصري خالد بشعاعه

بلا نجم ساطع في معونته ده طاعون في سينا وده حريقُه
بلا دبلوماسي وتكساسي بلا نقد دولي في صناديقه
بلا مجلس الأمن القارح بلا قرض فايظ بغريقُه
الكون ده للي يعمر فيه والكادحين هم فريقه

مستني رد ومستني نصبح على عسل الدنيا
لحد دلوقت ما طلنا غير قرص.. فين الحنية؟!
معلش هانت يا أحبا بانت بشاير بشرية
ما تجدفوا وتغنولي المصري جاي بالحرية

http://khaledelsawy.blogspot.com/2013/07/blog-post_5566.html