أبلة الفلاسفة

أبلة الفلاسفة

شجرة العيلة ف بلدنا
فرع وارف فرع ناشف
اللي من ضهر الشهيد
واللي جاي من جدر تالف
واللي ملهوش لون وطعم
واللي مانشوفهوش ف غم
بس حاضر في القطايف
كلهم شجرة بلدنا...
في الهجير وفي العواصف

لينا أخت كبيرة ناشفة
أختنا شريكنا المخالف
دمنا وعلى طول مخالفة
في الكوارث والهوايف
اسمها أبلة الفلاسفة
رمزها الديك المناكف
عمرها ما تقولش آسفة
طبعها والكل عارف

في العلام أخدت شهادة ودكتوراه
في الكلام تاخدك ف ستين اتجاه
فضلها على أهلنا غمر الجباه
أطعمتنا وسقتنا بالمعارف
حملتنا الحكمة عبينا المقاطف
شاطرة في شرح السباحة في الدفاتر
بس لو يوم عتبت نهر الحياة
تبقى غرقة ووقعة زرقا عالجميع
والأكادة بعد ما تجف المناشف
ترجع الدموية تاني للشفايف
قوم تفز تهزأ الطقم اللي واقف
تنكر الحادث تبرر أو تشكك في اللي شايف
تتهمنا بالسخايف والمؤامرة
وان نطقت ولو في سرك ليه المكابرة؟!
يتنصبلك سيرك عاكف
لما تحلف بالطلاق يا أبلة آسف!
ثاني نوبة تغرقي ولا تعومي
انت حرة انت قومي
عمري ما حبل ف هدومي
ولا تستاهلي المجازفة
هي دي أبلة الفلاسفة

عنست علشان مقاوحة من زمان
كثروا خطابها وبارت مالجنان
تمسك الجدع اللي طالب تعصره
ويا ويله لو سقط في الامتحان
تعرف ايه عن كل حاجة؟
امتى آخر الزمان؟
كيف لم يحدث كذلك؟
ولماذا هذا كان؟
يخرج ابن الناس بيشخر للعمارة
واللي عنده نخوة يخرج عاللومان
رغم ذلك
برضه بتقطع ف قلبي
لما تبكي لوحدها مع كل زفة
هي دي أبلة الفلاسفة

واسمعوا آخر نوادرها الهباب
جبنا خولي يشوف صالحنا
قلنا نحلف عالكتاب
إحنا نديك الأمانة
وانت تدينا الحساب
والصراحة شكله قيمة وسحنة سمحة
العباية قصب، ف إيده تمللي سبحة
قلنا نكتب ورقة قامت
أبلتك وقفت وقالت
ليه العذاب؟!
النوايا الحلوة باينة
احنا نستكفى بمعاينة ولقمة حلوة ونقرا فاتحة
ابتسم بسنان دهب وعيون غراب
وفتح فجأة العباية شر فتحة
فتشوني حتلاقوني
قلبي طافح فوق لساني وفي عيوني
كلي ليكم
أراضيكم في العيون
كل أملي أراضيكم
أبلة بصت بانبهار
قلبتله كشافاتها.. قام مشاور انتظار
شكلها بعدما شابت زقزقت ويا الزبون
ها يا أبلة قلت ايه؟!
غردت أبلة بصوت سهتان حنون
ملحمة حلوة النوايا لا ورق ولا يحزنون
كله كل برطوشة يومها
وعشان نبلع كلامها
قوم حرتنا غيط لمون

عدا موسم قال في مستوصف جراحي
قلنا ألف سلامة أجلنا الحساب
ثاني موسم هج في الحج السياحي
قلنا فرض وينخرس فيه العتاب
بعدها شيعتله محمد صباحي
قام رجعلي المغربية بطلقتين!
خبر اسود! مين وفين؟!
قاللي عم الخولي جالي وسط زفة من الشباب
بالطبنجات والأوالي والمسبة والكلاب
كلمتين قلمين بواني وشلاليط مالجناب
امش يابن ويابن واعرف ثاني نوبة مفيش إياب
قل لابوك واللي جابوك
في العيارين الجواب

اجتمعنا كلنا وف وسطنا أبلة الفلاسفة
اللي قال نعمل له محضر
واللي قال نرفع قضية
واللي قال شوفي لنا صرفة
فكرت ساعة ونطقت في الأخير أربع ساعات
قلبت كل المزاعم والزوايا والحاجات
احنا معناش الا فاتحة
هو عنده رشاشات
الطريق هو المصالحة
والمسامحة في اللي فات
ابعتوله البت صابحة
وان عند نبعت آيات!

سبينالها وخدنا بعض ورحنا عزوة فبعضنا
خدنا مصر كفر كفر نقول ده ثارنا وأرضنا
جم معانا ياما حسوا عرضهم من عرضنا
كله كان متعبي منه طلع له سابقة ف كل ناحية
فلاحين وغفر وعمدة وشيخ غفر وأرزقية
هيلا بيلا وصلنا عنده وقفونا البلطجية
والله ما يرهبنا آلي ولا تردعنا السيوف
جه بسلامته بالكاريتة معاه شهوده والضيوف
عاليمين قنصل ومندوب سامي وصيارفة
وعالشمال تفتكروا مين؟!
أبلة الفلاسفة!!
ايه يا أبلة؟ انت هبلة ولا ايه؟!
ده سرقنا
ودولا سارقين من جدودنا
انت ايه؟!
راسية عالضفة المقابلة لينا ليه؟!
طلعت أبلة الفلاسفة نظاراتها والكتاب
فشختنا بالمحاضرة وعفرتنا بالعتاب
كلنا قلنا دي ثورة.. وهي قالت انقلاب!
لا دي ثورة
انقلاب
لأه ثورة
مالكتاب اسمه انقلاب!

حيث كده ينعل أبوكم عاللي علمكو الكتاب
عالبنادق والقناصل والمشانق دنشواي بحر البقر
حفارين بحر الكنال تحت السياط ميتين سنة
مطرودين من المحاكم حقنا من غير ورق
ملطوعين على قفانا والخيانة علمت
حقنا الضايع حناخده من عينيكم كلكم
شوف يا خولي اسمع وترجم للجماعة يا جبان
ولا سيب أبلة الفلاسفة هي أصلا ترجمان
هي أصلا بغبغان
شوف يا خولي شوف يا قنصل شوف يا قرصان البحار
شوف يا مندوب سامي بريطاني أمريكاني جن أحمر كندهار
شوف يا مملوك يا أغا عثمانلي ولا من التتار
يا مناديب الندامة مبعوثين سوء النوايا والحصار
شوف يا عالم
ترجمي يا أبلة ليهم بس إوعي تحرفيها
اخرسي المرة دي خطرة بكرة تدري باللي فيها
قعدتك لسنين لوحدك تاكلي نفسك تشربيها
تدخلي جوة المرايا تخرجي حلوة وكريهة
انت لبستينا ياما.. انت حكمتنا السفيهة
اسمعي المرة دي منا وترجمي من غير زوادة
الكتاب ده جحش عنك، لو مواد تنقصله مادة
اكتبيها وترجميها ولا نحرق الكتاب
عندنا ف بلدنا ثورة
وانتو بتقولوا انقلاب
علشان خايفينها تكبر
علشان شايفينها باب
راح تجيلكم منه عصفة
وشعوبكم تستجاب
يومها لا حتنفعكو وصفة
ولا أساطيل الخراب
يومها ما تفيدكمش أبلة
هبلة عايشة في الكتاب
ولا يشفعلك حنانك
يا فلاسفة الاكتئاب

علشان هذاوذاكا وما تقدم من خطاب
وعشان خدتوا شرفنا وأختنا فوق الحساب
احنا راح نكويكو ثورة
كل ما تقولوا انقلاب