Tuesday, December 24, 2013

باب العناية

باب العناية

(( غرفة عناية مركزة لها صوت وهي ساكتة هس
وبيبان لطرقة ف ضَهر طرقة وباب طواريء..
ياخدك من اللحظة ويرميك هيلا بيلا ف أمس
تسرح فى غابة ذكريات تهجم عليك بألف وش..
وبألف ريحة.. ولون.. وحِس ))

لباب العناية الغشيم الحجر
لبلطو الدكاترة الملايكة
لضحكة ممرض جدع..
وسيستر قمر
لأيمن وهالة وفاطمة وسمر
لصبر الأطبا
وحنيّة العيانين على بعض
لأعظم مقاومة في وش الخطر
لرحمة وحكمة وشر وديون
وصاحب بيظهر في وقت القدر
وصاحب بيخفى
وصاحب بيعمل كأنه ظهَر
وناس تتحدفلك بطوق النجاة
وخير كنت عامله ورميته فى بحر الحياة..
تلاقيه.. بشر
ومحنة تعدي فى رحاها.. ولا تنعصر

لنقطة من الجرح..
في الدم شوفة..
وعالم.. حكاية
مفيش قصة تشبه حكاية مريض
مفيش ضيق نفس زي اخوه
وبتعدي..
كله بوسيلة ورواية..
يعدي..
يدوس الجديد عالقديم.. من جديد
ده يدبل وده يبكّ دم وشباب
ده يغرز في لحم اللي فات..
ده.. يتوه
وينصب قديم الكمين لتهور جديد لسه خام..
وتفرم ضروسه العتاقي العضام الطرية
وبتعدي..
من ميّت.. الحي يصرخ حياته العصيّة
وموت يتولد في الوليد..
واختناق الجنين والمنازعة
وحمى النفاس عاليمين
عالشمال.. قيصرية
وآخر فصول النهاية..
بداية
لروح رفرفت في حياتها البهية
لراس فرخ تنطح في بيضة
ونملة بتحزق في نملة
ونحلة تموت في العسل..
تضحية!

لجري الوحوش فى عروقنا
وحب السبق
عصير الحياة في غميق الخلايا
لآهة تصارع ما بين انكسارك وعزمك
لطيف المقاتل يلازمك
لطاقة ميلاد جوة جسمك
لأروع ندا في حنايا الوجود..
في وش الألم والضياع والعدم:
صباح التحدي

صباح الأمل

No comments: