Tuesday, December 24, 2013

اختار ما بين

اختار ما بين

ما بين ضلوعك طير وبوصلة وسيف وحارس
وحبر سري في ملحمة بين خاتمتين
يا بِرْكة ينشف ميّها والرمل كابس
أو نهر بيشق الرمال.. اختار ما بين

ألذّ شيء إنك تكون قد الخطر
ترقدله قبل ما يرصدك
وتصيده قبل ما يهبشك
تكسَر عينيه بقوة عينيك
وتكبّله بصنعة إيديك
بالمفهومية وبالرضا.. والشرط دعوة والديك..
تهتُّه وتكلبش مخالبه والنياب
وتحاصره قبل ما يبقى سجنك
يوم بعد يوم يثقل فولاذك والمعارك تعجنك
يتزفّ قلبك عالشجاعة، ويندفن في الأمس جُبْنك
تشِفّ روحك للحقيقي من الخطر
لا صيت يخضّك بعدها
ولا ياخدك الشيء السراب

ما تسعالوش، إسعى في طريقك وافتكر..
فين منبعك.. وميتك حتصب فين
وان جه في طريقك يبقى أهلا بالخطر
لو فاكره مُرّ.. الخوف أمرّ
ومذلتك سم في عسل إسمه النجاة
ما تموتش ميت عالحياة
ما تعيشّي حاير بين بينين
مهما تطول الملحمة..
مسك الختام.. آخر بيتين
وفي الأخيرة المرء ضربة تلخّصه.. مش ضربتين
افتح مسامك للوجود
وبقلب يشغي بمية بتشق الحجر
وفي منجم العزم الدفين
إوصل لآخر معدنك
عروق حديد وعروق دهب
هات العصب من الشغت
ساهل مشبّك في الصعيب
وانصب له فخ من اللهيب
ساعتها بس حتبقى أخطر مالخطر
وحتملكه.. وتستأنسه..
تخاويه.. ويعمل لك حساب
يكبر في ضلك.. نِفْسه ياكلك بس فين..؟!
مش لاقي ثغرة تطمعه
ولا رعشة فيك تفتح له باب

آدي الخطر..
وآدي المعادلة
إديه أمان.. ومعاه حذر
وصاحبه بس بنص عين
وفّيه احترامه بدون مذلة
ده الوحش ما يطيقش المجاملة
والجبن.. ما يصدِّش قدر

ما بين ضلوعك طير وبوصلة وسيف وحارس
وحبر سري في ملحمة بين خاتمتين
يا بركة ينشف ميّها والرمل كابس
أو نهر بيشق الرمال.. اختار ما بين

1 comment:

faten said...

بجد صعب ألاقي وصف ، أقل شئ أقوله انه رائع جدا جدا جدا ، شعر بيخلينا نشو حياتنا فيه