Thursday, December 19, 2013

فرح سماوي

فرح سماوي

بيقولك الشهداء فرح.. شادر سماوي.. بحبحة
خام الكرم حواليك مراكب
تغطس تمدد تتكيء بختك يا عم تنول مقام فوق المراتب
واحد من المعازيم في حضرة ما تنتهيش الذكر شارخ في الوجود
عدا حدود السلطنة واللعلعة والشعشعة
بختك يا سِيد!
فرح بيضوي في كل شتلة وخن مجاني الكهارب
أهل الفرح هم النجوم طول الفرح بيخدموا ويغردوا -ومن القرار- تغريدة أمن وأريحية...

ييجي جوابها من بعيد
ولا في الخيال
تسبيحة عدت الابتهال
ييجي كم دشيليون نقشبندي خد عذوبة وأبهة
إشي سرب عباسط يطوف
وسرب رفعت..شوف..
جميع من غنى ربه في أي ملة
دي غنوته وده ربها
بختك يا عم! تلاقي روحك في الكوال
هات يا ابتهال
هات يا مواكب
مسا وتحية من الكواكب
للعبقرية في الشهادة وفي الجمال
شفت الفرح ده قد ايه؟
شفت الجمال؟

1 comment:

إبراهيم محسن said...

كلام مليان جمال يا فنان

(تعليق جانبي عن عنوان الصفحة
العدالة قبل الخبز والحرية
العدالة تكفل للجميع الخبز والحرية أو للجميع الفقر والعبودية