Wednesday, January 10, 2007

على خيوط الذكريات

حلوة البنات
سكر نبات
شهد وغزل
واللي اتغزل مالذكريات
وعد البنات الطيبة
والمتعبة
واللي اتوصل بين الفؤاد واللي مضى
أزحف عليه برموش شقية مفضضة
كل اللي فات
لو فات ما مات
واللي انقضى ما يوم مضى
حكايات قصار
واحنا الصغار
مايهمناش طول الحكاية وقصرها
هي الحكاية بعمرها؟!
ماتقولناش إيه تعرفوا
ما حتعرفه
إلا إذا عدت عليك
أحلى أميرات البنات

يا قلبي يا قبضة رجوع
قلبي عليك
جايز يكون الاشتياق
همسة فراق
سرعة رجوعك ربما.. نغمة سفر
واغرب ما فيك
إنك ف وسط التنهيدات
بتسلم اللي بين إيديك وبتعترف
لكن لا تطلب مرحمة
ولا فوق شفايفك رغم كراس الخطايا والألم
هفوة ندم
واسمع غناك
حلو اللي فات
لازم يفوت
يمكن بموت
يمكن بصارع في الهلاك
عطش الوجود
أنا جيت معاك
وأموت فداك
آخر ما حنبض أغنيات
وتيجان ملايكة وجنيات
وأسامي عمرك يا عجوز

هلت وشوشكم يا بنات
عنقود كريز
طارح على شجرة لمون
حلوين لحد الانتحار
واحلى ما في الطعم المرار
بتهلوا ليه ؟ وتجوني لا إذن اتأذن ولا اعتذار
وتجيبوا ليه كل المطارح والمشاهد و والحوار؟
واحتار أدمع لو بنيت ليكم مدن
ولا أدمع لما اشاهد الانهيار
آه منكم ومن الجدار
يا مسافرين
يا قطر متحمل حنين
صفر.. وطار
يا مفارقين
مخطوف شبابي مع ارتحالكم فرقوه
وادوني زهر الذكريات

من كل وردة سرقت بعض العطر
لكني سبت ف كل وردة سر
وان كنت خدت من الورود لونها
أنفاسي تشهد في عيون الزهر
إني أخدت كثير صحيح
لكن وهبت العمر
والله وهبت العمر

7 comments:

maf2ou3a said...

allah very tender words

Ehab said...

حلوين لحد الانتحار
واحلى ما في الطعم المرار

مش كل البنات . . . سكر نبات

bassma 87 said...

اسمحلي اقولك

قلبي داب بين السطور..والشوق جرى في عروقي بحور
كلام يدوخ كلام ساحر..وقلبي ياعيني هو المسحور
عشان اوصفه احتاج لليالي..احتاج لسنين مش بس شهور

KHALED-ELSAWY said...

ايهاب.. انا بتكلم عن البنات اللي عدوا في حياتي مش عن كل البنات طبعا. وتحديدا على احساسي بيهم بعد ما عدا وقت كبير ومافضلش الا الذكرى.. الذكرى بقى نفسها.. سكر نبات.
شكرا بسمة :)

حازم شلبى said...

حلو اللي فات
لازم يفوت
يمكن بموت
يمكن بصارع في الهلاك
عطش الوجود
أنا جيت معاك
وأموت فداك

اذا كان اللى فات لازم يموت فلا أعتقد ان الذكريات تموت و إلا لما ظهرت تلك الكلمات الجميلة
تحياتى يا فنان يا جميل

Rasha said...

أستاذ خالد ... إنت حقا فنان شامل مثقف بمعنى الكلمة ... كتابة الشعر ليست بالأمر الهين ... كلماتك القصيدة أكثر من رائعة ...بالتوفيق دائما إن شاء الله... رشا زكى / كاتبة صحفية مصرية مقيمة بأمريكا

shams magdy said...

جميله جدا يا استاذ خالد
انا وانا بقراها حاسة ان محمد منير ممكن يغنيها و تكسر الدنيا

علي فكرة انا من متابعينك الجداد كشاعر و كاتب و اتفاجئت بان موهبتك ملهاش حدود