Wednesday, October 12, 2016

قال حب قال!
---------
الحب واد حيلة حليوة..
فسده الأحبا بتدليله
دلعه المرء بقى غنيوة
ومدامعه صايصة ف مناديله
يدب ساندي في عليوة
ويلبهم من تحاليله
ينفخ وتحمى الحكيوة
ويتنفخ من دلاديله
---
الحب واد ماترباشي
لا حرمانية ولا عيبة
خاله النقيب، والامباشي..
عمه وله تيتة رهيبة!
يوز كوثر وغباشي
فيسبقوه عالتكعيبة
واديني اطه! و يا خراشي!
واوبا! كبسة ونصيبة!
---
الحب واد ما تعلمشي
اكمنها عزبة جده
عايش يسبل وبيحشي
وحاشيته اللي بيتشدوا
حنجوري هتيف وماشافشي
الا الحاجات اللي في يده
بواسطته في جيبه بيمشي
ويرش عاللي بيسانده
---
الحب واد على ست بنات..
لا مؤاخذة ارجل من أمه
لا قالهم عنكم ولا فات
على بت بت يصون لحمه
ولا يوم دعا رب السماوات
يحكٓمه على من ظلمه
في السيما يتحدى الباشوات
وفي الحقيقة بيتعازموا
---
الحب واد هربان مالجيش
علشان يا مامي من المدفع!
يخطب في ناسه: اتستروا بخيش
وهو ماركة ومتقمع
وان يوم صحوا.. ما حياكل عيش
ومحطته راح تتشمع
ولو اتهرش ده بتاع تهويش
والله بجرايره ليتكلكع
---
الحب واد مدمن خبوه
قام أشوط التل بحاله
صايع ما بين امه وابوه
وبيشتغل عمه وخاله
حنية محن وعيلة ياهوووه
دبدوب وهايص في مجاله
ملعون ابوه لأبو اللي جابوه
لأي تنبل في عياله!
---
الحب واد وده مالاخر
علشان تعبت حقول وأنجز
مرض لذيذ من نوع فاخر
وحتكشفه لما تعجز
لو أوله شفت الاخر
تلقاه شاقطنا وبيقزقز
نموت وده نايم شاخر
وندوب وهو اللي اتبروز!
---
(الله الله سبحانك مااعظم ملكك ولك الحكمة جل جلالك
وما دام امرت باحسانك حسكت عنه والكلمة لك
حب و ماحبش ولا دايم غير وجه كريم
مكتوبله عمر ومكتوبلي صحوة ؤتسليم
الله يا دايم هو الدايم ولا دايم غير الله
قال حب قال!
حاضر حخرس والحكمة لك رحمن ورحيم
وبترحابك اطرق بابك
وارمي الأحمال)

No comments: