Tuesday, November 12, 2013

طب دولا مين ودولا مين؟؟

طب دولا مين ودولا مين؟؟

همج شمال ورعاع يمين
دول يشخروا زي الأفاعي ودول يسبوا السنسفيل والدين
دول يبطحوا روحهم ودول في الشكوى هم السباقين
دول ينطحوا الحِبْلى ودول ياكلوا الجنين
دول يعبدوا الشّيْطان ودول راشقين تمللي في أي سبوبة دنس ورا أي دين!
دول كدابين..
ودولا هم الكدب ذاته
دول يركعوا لعيون عظمته وبرجالاته
ودول لهم بسلامته صاحب له كرامة ولوح وتاج
دول يستلذوا الكهربا وضرب العصا
ودول يناموا لحامل الكرباج..
ويستَحْلوا رجالاته
ودول ودول متفلسفين على ديك أبونا!
دول من زحل ودول بلوتو ومكريين
على اللي جابونا
شريك مخالف ده لده، وده لده
ومضيّقين الكون علينا
-----------------
زعيط معيط.. يأجوج ومأجوج.. حادي بادي
أبناء وطن واحد لكن.. أغراب.. أعادي
دول نسل عقرب دول هجين غربان حدادي
وفي العلن.. شابطين في بعض على العلم
بس الحقيقة في بطنهم
مش كلهم
السر بين مماليك همج وملوك رعاع
بيقطعوا في فروة بلادي
تنتن بلاطُه مقبرة أجيال ورا أجيال وفوقها تل مال
وصولجان تنتون نتن بصَّم عليه بأكل الفسيخ ويا السمين
ياقة قميصه طبَّعت عارُه الوَبال.. من دم مينا واسماعين
تنتون وتنتن سفاحين سايقين جمال
سارحين بدول وبدول في بحر من الخَرَف
ومن الرمال
يطمعوهم بالعلف
ويحِشُّوا نخوتهم علاوله من الجدور
لا البت ترفع عين بشكوى أو شعور
ولا الذكور تصبح رجال
السر مخفي في القصور
في المطبخ الخلفي الوسخ..
مهماً غسلت الريحة فيه..
دايماً زفر هبو الجشع
دايماً زنِخ
ما بين شريعة الاغتصاب وذريعة السلب الوضيع
شهوة وصالهم في التملك
سلاطين همج متمرمغين في اللحم من فجع البطون
حتى الريالة على الحرملك
أمراء رعاع متمرنين
يجرجروك بنشيد وطن
ويبيَّعوك إسمك وأهلك
--------------
دول الملوك مالناحيتين
أما القطيع على الشمال..
زي القطيع على اليمين
دول ممسوكين من تحت باطهم بالحبال
ودول تمللي من بطونهم مشقوطين
كل اللي بينهم الاختلاف
وخلاف بيستولد خلاف
والمشترك.. قولة آمين!
طب دولا مين ما تقول لنا يا عم نجم..
ودولا مين؟؟
--------------------

5 comments:

شبكة سيدات مصر said...

تسلم يا استاذ خالد مبدع الصراحه

Anonymous said...

agmal 7aga aretha men senin

Ebtehal Hossam El-Deen said...

زعيط معيط.. يأجوج ومأجوج.. حادي بادي
أبناء وطن واحد لكن.. أغراب.. أعادي
دول نسل عقرب دول هجين غربان حدادي

Bussy Youssef said...

نذراً للعروبه من افواه جاهلية
مات فحيح الانسانية
تقدمت الكراهية بنا شوطاً
و عدنا اشواطاً لزمن العبودية
قومي يا مصر و انفضي غبار حقدهم
و انشدي لياسمينك تحية
حرية حرية حرية

emy ezz said...

دولا مين ودولا مين ..دولا على الكرسى ملهفوين ..ادبح واقتل خرب المهم نكون عاليين

الله عليك ياعمنا