ورد الخريف
فص المراحب
مش كل وردة في الربيع زفتها
ورد الخريف كافح خماسينُه
طالعة البراعم مالشقا برقّتها
قدر الفتى.. يعرف ف خَمْسينُه
أنا اخوك كبير عنك وشفت كثير...
واحنا ف سبق بين القلم والسنجة
مُرَّة الخلاصة ما تحتملها عصير
شمر عروقك.. خدها مني سرنجة
الشك واجب.. شُك فيا وفيك
وبعد رقدة وطول شلل حتقوم
صحصح شبابك ده الخلاص بإيديك
محروم يكافح.. بكرة مش محروم
الغرس
نبدأ كلامنا بالصلاة.. ثم الزِكا
مسلم، مسيحي ولا ملحد.. غمَّض
صلي في سرك.. واستعد لمعركة
جبنك بغيض.. وبخل روحك أبغض
سيفك خشب إكمن عودك أخضر
إغلط قوام.. بارز جميع الفصل
الغلطة وحشة بس لو تتكرر
إغلط خشب.. قبلما تلمس نصل
الدرس واحد.. بس ناكل قبلا
حلقة أحبة أرضي عالطبلية
ما تمدش ايدك في الطعام اتملى
حس الجعان وازعل على البشرية
في المية واحد.. خمسة قول في المية
تعدي بحر الدنيا ما تتبل
والباقي سلسال احتياج.. عبودية
يا يموتوا.. يا يخشوا في دين الذل
بطنك حتقرص.. اقرص انت عليها
الدرس واحد.. عالمكابح دوس
اشكم فرستك لجل ما تعلوها
واياك تنخ لنزوة أو لفلوس
طول ما الشراع نافر في ضي صباحك
عب الحياة واسبح في موج لذاتها
لكن في حجرك صنعتك، وسلاحك
والعيلة فرض.. إياك تفوت أوقاتها
الدرس واحد.. شغّل الفهامة
فرمل وابورك علمه مايروحش
المغزى واحد.. والحواشي ياما
أول قتالك تنتصر عالوحش
وحشك حيطلع بس ده بعدين
قبلين حياكلك إسمع الإنذار
ما تاخدش نفسك يا فتى باللين
حب الحياة ما بين قوسين من نار
الناس نوعين سواح وده الغالب
والبعض فارس كوعه من كوعك
حب القلوب ما تحبش القالب
واياك تصاحب إلا من نوعك
من ريحة المينا
لعتمة كهف
افرد قلوعك لمها من موج لشط
هز المراكب يا عفي وشيل وحط
الرحلة واحد جزتها خدلك زوادة
أول وأسهل فصل عدا.. جر خط
عِين الخشب إياك تفرط في اللي ساعدك
وافتح مسامك واستلم سيفك وعهدك
سيفك نصيبك توأمك.. ملفوف في خيش
متعان في كهفك صاحي من مهدك للحدك
لكن حصارحك قبل ما ياخدك حماسك
الكهف له حراس أذى.. عقلك في راسك
سباع، أفاعي، مخلوقات من غير أسامي
على نيتك في العهد موتك أو خلاصك
لو كنت واحد تلقى جسر ونور يغيتك
وان كنت جاحد للقسم روّح لبيتك
الجاي خطِر.. كلمة خطَر تصغر عليه
لا حينفعك مكرك ولا تحميك عافِيتك
النية حلوة؟ خش ما تبصش وراك
خليك في سيفك شوف هنا ودور هناك
سيفك خبيئة وخيشه أخشن مالقساوة
انزف ما تنزف ده اختيارك من قضاك
قمرية،
ودعوة والدين
جدع يا واد أبوك أكيد رجل جدع
والوالدة حرة والدعا شال الفزع
سيب لفِّتك وانزل بطولك في البحيرة
دمك.. ترابك.. ملحها.. طُهر ووجع
السيف ده إنت من النهارده بقيتوا واحد
إبن وأبوه، فرس وفارس، ضل واحد
السيف ده باسمك.. باقي جسمك.. سن رشدك
عمرك وعمره -زي موتكم- كله واحد
بالسيف ده حتشق اللي كان غامض عليك
حتشوف طريق ماجاش في بالك أو عينيك
مدق ضيق والحجر واعر وسخن
بين الحياة والموت.. وسرك بين إيديك
اصبر وثابر لما يهدا عليك ويوسَع
حتشوف حقيقتك بس حاسب إوعى تِسْرِع
الفخ دايم واللي عايم نتفة منه
والأخطبوط غطسان وطمعان في اللي يطمع
فصل المقال
مش في القتال..
في روح المقاتل
الخوف طبيعي بس حتطارده بطبايعك
دايما حتلقى أرنبه الرعديد متابعك
نشّن ولو خطّى اتجاهك.. خرّمه
قبلما يتحول لمسخ وتنه بالعك
الكدب وارد.. مش فضيلة.. بس.. آه!
وحل الرذيلة جاي مع رمل الحياة
حتدوس في مستنقع وتطلع بالعوايد
كنز الفوايد في الوحول مش في المياه
حدد هدف وماتسعالوش اصبر عليه
احفظ ملامحه وافتكر.. إخترته ليه؟؟
إنساه شوية وشوفه تاني ودي الاخيرة
لو حاسس انه يحق لك.. مستني ايه؟
أول دروسك في القتال الصبر طيب
أرصد عدوك من بعيد واضرب قريب
صون ميتك وانسف مخازن ميته
وخللي صيتك يسبقك واسمك يشيّب
واما تهل على اللي هابك كون حنون
بعينيك حترسم دايرتك حواليك.. حصون
إفتح بيبانك بس خبط عالفولاذ
والندل صيدة اصطاده عبرة لمين يخون
عمال تقاطع.. يا بني صبرا.. لا عتاب!
نفسك سريع والسربعة شرع الشباب
شايفك عنيد وانا كنت.. زيك هات سلاحك
أوقات يكون الدم أسرع مالكتاب
حتموت تجرب! آدي سيفك والضحية
حمل وديع ملهش ذنب ولا خطية
مطلوب تشقه بضربة واحدة تريحه
عاوز عيون لا رحمة فيها ولا قسية
قبلما تنزل ضربتك لازم أقولك
إسمع من اللي شق لحم وعظم قبلك
مش حاجة حلوة.. وسرها في ميزان جواهر
شق بشرف.. دبح الترف.. حيسد قلبك
حاسس برهبة؟ تبقى لسه يالحزين!
خدلك دقيقة وردّ شاهر عالسمين
لو شفت رجفة حنزلك فصل الخشب
سمعني قبلا سلام لعزم الجزارين
أحسنت.. ريّح.. روح بعيد ان كنت حابب
ابكي في وداع الطفل فيك.. وارجع محارب
لا ما تكابرش.. الضربة دي فتحت بيبانك
عالبحر وادفن.. بس حن على المراكب
راحة وشيشة
وابتهال من بعيد
حنخش فصل في سكتين خليك لبيب
يمشي كلامنا على الأمانة.. وعالحبيب
حقك يكونلك نهر جنبه تل خضرة
وان يوم طمعت حتتسخط ملعون غريب!
إزاي توفق غلِّتك مع قمح غيرك؟
فزورة وانت تحلها من فضل خيرك
واللغز باب منه الولوج أو حبسة باردة
وقت اشتهيت السرب.. قوم ضحيت بطيرك!
البت لُقطة وشرطها.. معقول
والدنيا إيه إلا إيجاب وقبول؟
الشرط نور بالحب قابل شرطها
ولا غير لسانك يربطك يا زول
اسكت شوية واستمع فكر كثير
كِبْر الشباب زايل معاه خليك كبير
قبل الوغى جاهد شيطان المرمغة
من اللسان ثغرة.. وثغرة من السرير
حط البنية في اختبار ما تحسهوش
ولو لقيتها بتختبر خليك بشوش
لو هو حقك يبقى هو حقها
وان كانش حقك يا فتى ما تعملوش
يا إبني اسكت! واصطبر واحسن سماعك
قدام شبابك عمر تفتي.. هات صباعك
الجرح ده.. اخرس! ما تكشفش الألم
للذكرى بس! الجاي جرح بطول دراعك
ما تحبش اللي تقول (أنا) طول النهار
دي طالبة ودنك لا محبة ولا حوار
عاوزاك مرايا باسطوانة في حسنها
ولو غطست في قلبها.. حتشوف مرار
ما تحبش اللي تسبلك في قَدَرْها
إزاي قدر يتسب له وينصرها؟!
دي لو كمنجة.. بالنكد حتنشِّز
ولو جنينة حتكتئب أشجارها!
يا عيني عاللي ماقالش لأّه في وقتها
يندم عليها بقية حياته كلها
كل امّا يفتكر اللي فات ينزف (يا ريت)
قولة يا ريت هي الخيابة بنفسها
البن عالجرح
وفنجانين قهوة
فصل الجفاف عدا وخلاص تقدر تناقش
دلوقتي عمرك عالمحك مادمت عايش
حتموت في لحظة وانت قابل وببشاشة
لا مال وشاشة تبدلك.. والعهد حايش
اختار معاركك والعدو ما يختاركش
كل اللي يقطع سكتك ما يخوفكش
شوف نيته لو كان بريء اتجنبه
وان كان وحِش يبقى البعيد هالك يا وَحْش
الأوِّلى.. إنذار فصيح وبالأدب
والتانيِة.. وريه صريح ناب الغضب
والتلْتَة في وش العدو وما ترحموش
الا اما تستسلم فلوله وتنسحب
ما تخليهمش يجرجروك خارج مسارك
زي الكواكب والنجوم تلزم مدارك
من النهارده وباختيارك رحلتك
وكل حادثة في سكتك هي اختبارك
السهم قازح في الهوا على وجهته
مش وجهتين.. ده منتهاه ودي رميته
الغلطة فين؟ في اللي رمى على عصفورين
سوا عن غرور أو عن طمع.. أدي سحبته!
أهم شيء هدفك يكون دايما بريء
لا خراب بيوت ولا تدي ضهرك للغريق
ولا جنس غدر على البشر ولا عالشجر
وكل جون حتجيبه يُحسب للفريق
خطط حياتك كلها حلبة صراع
وحب سيفك في الهجوم قد الدفاع
وخف نفسك في الميدان خللي العدو..
ما يشوفش غير عصبك وسيفك والدراع
ما توريهوش ثغرة في جسمك أو في روحك
ما تخليهوش يعرف جروحه من جروحك
ما ترسيهوش على بر ..كر وفر لما..
تغلط حصونه، ومن غلط خصمك فتوحك
علق على الجدران صور شهدا الفوارس
وفرو ظالم جبت قرنه وطب فاكس
وسيفك الخشب القديم تديه احترامه
وقف ما بينهم كل ما تهزك حوادث
ده إنت.. لو تهت افتكر.. صورتك دهيّا
آدي سجلك يا فتى.. رسالتك أهيا
كم من معارك قبلها نصر وخسارة
نضّف سلاحك مالفزع.. وسيب وصية
اعمل طقوسك.. غوص في أسرارك وضعفك
واجه جبانك حتلاقيه دايما مخالفك
تقوله واجب.. ينقلب نداهة تسحر
تاخدك فراشها تصطبح في الوحل أنفك
فكر كأنك صخرة مالجبل العلي
وقول لنفسك في العلالي منزلي
وقعت ولا كسّروا فؤوسهم عليا
الأصل غالب هو آخري وأولي
عزِّم على حلمك يوماتي.. فاكر إيه؟
تخبط سيجارة وتحلمه وترقد عليه؟!
الحلم شغل.. اتعب في نحته.. في ندهته
خللي الوجود يطلق سراحه من إيديه
اعمل لنَفسك تمثالين واحد تحبه
والثاني تكسر نِفسه وابكي بدم جنبه
كم يوم وتضحك عاللي حابه وعالكسير
صنمك يلاعبك لاعبه مرة ومرة حاربه
حب اعترافك بالغلط.. حب اعتذارك
أول بأول تتغسل.. ترتاح في دارك
الناس غلابة ومجروحين.. الناس يتامى
يوم ابنهم ويوم ابوهم.. ده مسارك
قبل الوداع.. بحبتين
خلاص فهمت كلام اخوك؟ حفظته حلو؟
مسك الختام كل الكلام.. تنساه يا حلو
أنا مش صنم أنا حاجة من دمي لدمك
وان كنت حلو حتلقى حلو في أي سَوّ
نسيبنا مني وننتبه لك.. للي جي
إمسك يا شاب الحكمة اههِ في غصن حي
تحسبها جاية في ملزمة؟! أبداً.. في شتلة
حابي عليها.. وكل يوم.. مية.. وضي
من حُرّ دمي بودّعك.. وبودِعك رسمي الوصية
سيفي وعهدي في خزنة من فولاذ عصية
سيبهم في حوزة ست داري دام وفاءها
لحمي أمانة.. وفني عهد.. وصدقة جارية
فص المراحب
مش كل وردة في الربيع زفتها
ورد الخريف كافح خماسينُه
طالعة البراعم مالشقا برقّتها
قدر الفتى.. يعرف ف خَمْسينُه
أنا اخوك كبير عنك وشفت كثير...
واحنا ف سبق بين القلم والسنجة
مُرَّة الخلاصة ما تحتملها عصير
شمر عروقك.. خدها مني سرنجة
الشك واجب.. شُك فيا وفيك
وبعد رقدة وطول شلل حتقوم
صحصح شبابك ده الخلاص بإيديك
محروم يكافح.. بكرة مش محروم
الغرس
نبدأ كلامنا بالصلاة.. ثم الزِكا
مسلم، مسيحي ولا ملحد.. غمَّض
صلي في سرك.. واستعد لمعركة
جبنك بغيض.. وبخل روحك أبغض
سيفك خشب إكمن عودك أخضر
إغلط قوام.. بارز جميع الفصل
الغلطة وحشة بس لو تتكرر
إغلط خشب.. قبلما تلمس نصل
الدرس واحد.. بس ناكل قبلا
حلقة أحبة أرضي عالطبلية
ما تمدش ايدك في الطعام اتملى
حس الجعان وازعل على البشرية
في المية واحد.. خمسة قول في المية
تعدي بحر الدنيا ما تتبل
والباقي سلسال احتياج.. عبودية
يا يموتوا.. يا يخشوا في دين الذل
بطنك حتقرص.. اقرص انت عليها
الدرس واحد.. عالمكابح دوس
اشكم فرستك لجل ما تعلوها
واياك تنخ لنزوة أو لفلوس
طول ما الشراع نافر في ضي صباحك
عب الحياة واسبح في موج لذاتها
لكن في حجرك صنعتك، وسلاحك
والعيلة فرض.. إياك تفوت أوقاتها
الدرس واحد.. شغّل الفهامة
فرمل وابورك علمه مايروحش
المغزى واحد.. والحواشي ياما
أول قتالك تنتصر عالوحش
وحشك حيطلع بس ده بعدين
قبلين حياكلك إسمع الإنذار
ما تاخدش نفسك يا فتى باللين
حب الحياة ما بين قوسين من نار
الناس نوعين سواح وده الغالب
والبعض فارس كوعه من كوعك
حب القلوب ما تحبش القالب
واياك تصاحب إلا من نوعك
من ريحة المينا
لعتمة كهف
افرد قلوعك لمها من موج لشط
هز المراكب يا عفي وشيل وحط
الرحلة واحد جزتها خدلك زوادة
أول وأسهل فصل عدا.. جر خط
عِين الخشب إياك تفرط في اللي ساعدك
وافتح مسامك واستلم سيفك وعهدك
سيفك نصيبك توأمك.. ملفوف في خيش
متعان في كهفك صاحي من مهدك للحدك
لكن حصارحك قبل ما ياخدك حماسك
الكهف له حراس أذى.. عقلك في راسك
سباع، أفاعي، مخلوقات من غير أسامي
على نيتك في العهد موتك أو خلاصك
لو كنت واحد تلقى جسر ونور يغيتك
وان كنت جاحد للقسم روّح لبيتك
الجاي خطِر.. كلمة خطَر تصغر عليه
لا حينفعك مكرك ولا تحميك عافِيتك
النية حلوة؟ خش ما تبصش وراك
خليك في سيفك شوف هنا ودور هناك
سيفك خبيئة وخيشه أخشن مالقساوة
انزف ما تنزف ده اختيارك من قضاك
قمرية،
ودعوة والدين
جدع يا واد أبوك أكيد رجل جدع
والوالدة حرة والدعا شال الفزع
سيب لفِّتك وانزل بطولك في البحيرة
دمك.. ترابك.. ملحها.. طُهر ووجع
السيف ده إنت من النهارده بقيتوا واحد
إبن وأبوه، فرس وفارس، ضل واحد
السيف ده باسمك.. باقي جسمك.. سن رشدك
عمرك وعمره -زي موتكم- كله واحد
بالسيف ده حتشق اللي كان غامض عليك
حتشوف طريق ماجاش في بالك أو عينيك
مدق ضيق والحجر واعر وسخن
بين الحياة والموت.. وسرك بين إيديك
اصبر وثابر لما يهدا عليك ويوسَع
حتشوف حقيقتك بس حاسب إوعى تِسْرِع
الفخ دايم واللي عايم نتفة منه
والأخطبوط غطسان وطمعان في اللي يطمع
فصل المقال
مش في القتال..
في روح المقاتل
الخوف طبيعي بس حتطارده بطبايعك
دايما حتلقى أرنبه الرعديد متابعك
نشّن ولو خطّى اتجاهك.. خرّمه
قبلما يتحول لمسخ وتنه بالعك
الكدب وارد.. مش فضيلة.. بس.. آه!
وحل الرذيلة جاي مع رمل الحياة
حتدوس في مستنقع وتطلع بالعوايد
كنز الفوايد في الوحول مش في المياه
حدد هدف وماتسعالوش اصبر عليه
احفظ ملامحه وافتكر.. إخترته ليه؟؟
إنساه شوية وشوفه تاني ودي الاخيرة
لو حاسس انه يحق لك.. مستني ايه؟
أول دروسك في القتال الصبر طيب
أرصد عدوك من بعيد واضرب قريب
صون ميتك وانسف مخازن ميته
وخللي صيتك يسبقك واسمك يشيّب
واما تهل على اللي هابك كون حنون
بعينيك حترسم دايرتك حواليك.. حصون
إفتح بيبانك بس خبط عالفولاذ
والندل صيدة اصطاده عبرة لمين يخون
عمال تقاطع.. يا بني صبرا.. لا عتاب!
نفسك سريع والسربعة شرع الشباب
شايفك عنيد وانا كنت.. زيك هات سلاحك
أوقات يكون الدم أسرع مالكتاب
حتموت تجرب! آدي سيفك والضحية
حمل وديع ملهش ذنب ولا خطية
مطلوب تشقه بضربة واحدة تريحه
عاوز عيون لا رحمة فيها ولا قسية
قبلما تنزل ضربتك لازم أقولك
إسمع من اللي شق لحم وعظم قبلك
مش حاجة حلوة.. وسرها في ميزان جواهر
شق بشرف.. دبح الترف.. حيسد قلبك
حاسس برهبة؟ تبقى لسه يالحزين!
خدلك دقيقة وردّ شاهر عالسمين
لو شفت رجفة حنزلك فصل الخشب
سمعني قبلا سلام لعزم الجزارين
أحسنت.. ريّح.. روح بعيد ان كنت حابب
ابكي في وداع الطفل فيك.. وارجع محارب
لا ما تكابرش.. الضربة دي فتحت بيبانك
عالبحر وادفن.. بس حن على المراكب
راحة وشيشة
وابتهال من بعيد
حنخش فصل في سكتين خليك لبيب
يمشي كلامنا على الأمانة.. وعالحبيب
حقك يكونلك نهر جنبه تل خضرة
وان يوم طمعت حتتسخط ملعون غريب!
إزاي توفق غلِّتك مع قمح غيرك؟
فزورة وانت تحلها من فضل خيرك
واللغز باب منه الولوج أو حبسة باردة
وقت اشتهيت السرب.. قوم ضحيت بطيرك!
البت لُقطة وشرطها.. معقول
والدنيا إيه إلا إيجاب وقبول؟
الشرط نور بالحب قابل شرطها
ولا غير لسانك يربطك يا زول
اسكت شوية واستمع فكر كثير
كِبْر الشباب زايل معاه خليك كبير
قبل الوغى جاهد شيطان المرمغة
من اللسان ثغرة.. وثغرة من السرير
حط البنية في اختبار ما تحسهوش
ولو لقيتها بتختبر خليك بشوش
لو هو حقك يبقى هو حقها
وان كانش حقك يا فتى ما تعملوش
يا إبني اسكت! واصطبر واحسن سماعك
قدام شبابك عمر تفتي.. هات صباعك
الجرح ده.. اخرس! ما تكشفش الألم
للذكرى بس! الجاي جرح بطول دراعك
ما تحبش اللي تقول (أنا) طول النهار
دي طالبة ودنك لا محبة ولا حوار
عاوزاك مرايا باسطوانة في حسنها
ولو غطست في قلبها.. حتشوف مرار
ما تحبش اللي تسبلك في قَدَرْها
إزاي قدر يتسب له وينصرها؟!
دي لو كمنجة.. بالنكد حتنشِّز
ولو جنينة حتكتئب أشجارها!
يا عيني عاللي ماقالش لأّه في وقتها
يندم عليها بقية حياته كلها
كل امّا يفتكر اللي فات ينزف (يا ريت)
قولة يا ريت هي الخيابة بنفسها
البن عالجرح
وفنجانين قهوة
فصل الجفاف عدا وخلاص تقدر تناقش
دلوقتي عمرك عالمحك مادمت عايش
حتموت في لحظة وانت قابل وببشاشة
لا مال وشاشة تبدلك.. والعهد حايش
اختار معاركك والعدو ما يختاركش
كل اللي يقطع سكتك ما يخوفكش
شوف نيته لو كان بريء اتجنبه
وان كان وحِش يبقى البعيد هالك يا وَحْش
الأوِّلى.. إنذار فصيح وبالأدب
والتانيِة.. وريه صريح ناب الغضب
والتلْتَة في وش العدو وما ترحموش
الا اما تستسلم فلوله وتنسحب
ما تخليهمش يجرجروك خارج مسارك
زي الكواكب والنجوم تلزم مدارك
من النهارده وباختيارك رحلتك
وكل حادثة في سكتك هي اختبارك
السهم قازح في الهوا على وجهته
مش وجهتين.. ده منتهاه ودي رميته
الغلطة فين؟ في اللي رمى على عصفورين
سوا عن غرور أو عن طمع.. أدي سحبته!
أهم شيء هدفك يكون دايما بريء
لا خراب بيوت ولا تدي ضهرك للغريق
ولا جنس غدر على البشر ولا عالشجر
وكل جون حتجيبه يُحسب للفريق
خطط حياتك كلها حلبة صراع
وحب سيفك في الهجوم قد الدفاع
وخف نفسك في الميدان خللي العدو..
ما يشوفش غير عصبك وسيفك والدراع
ما توريهوش ثغرة في جسمك أو في روحك
ما تخليهوش يعرف جروحه من جروحك
ما ترسيهوش على بر ..كر وفر لما..
تغلط حصونه، ومن غلط خصمك فتوحك
علق على الجدران صور شهدا الفوارس
وفرو ظالم جبت قرنه وطب فاكس
وسيفك الخشب القديم تديه احترامه
وقف ما بينهم كل ما تهزك حوادث
ده إنت.. لو تهت افتكر.. صورتك دهيّا
آدي سجلك يا فتى.. رسالتك أهيا
كم من معارك قبلها نصر وخسارة
نضّف سلاحك مالفزع.. وسيب وصية
اعمل طقوسك.. غوص في أسرارك وضعفك
واجه جبانك حتلاقيه دايما مخالفك
تقوله واجب.. ينقلب نداهة تسحر
تاخدك فراشها تصطبح في الوحل أنفك
فكر كأنك صخرة مالجبل العلي
وقول لنفسك في العلالي منزلي
وقعت ولا كسّروا فؤوسهم عليا
الأصل غالب هو آخري وأولي
عزِّم على حلمك يوماتي.. فاكر إيه؟
تخبط سيجارة وتحلمه وترقد عليه؟!
الحلم شغل.. اتعب في نحته.. في ندهته
خللي الوجود يطلق سراحه من إيديه
اعمل لنَفسك تمثالين واحد تحبه
والثاني تكسر نِفسه وابكي بدم جنبه
كم يوم وتضحك عاللي حابه وعالكسير
صنمك يلاعبك لاعبه مرة ومرة حاربه
حب اعترافك بالغلط.. حب اعتذارك
أول بأول تتغسل.. ترتاح في دارك
الناس غلابة ومجروحين.. الناس يتامى
يوم ابنهم ويوم ابوهم.. ده مسارك
قبل الوداع.. بحبتين
خلاص فهمت كلام اخوك؟ حفظته حلو؟
مسك الختام كل الكلام.. تنساه يا حلو
أنا مش صنم أنا حاجة من دمي لدمك
وان كنت حلو حتلقى حلو في أي سَوّ
نسيبنا مني وننتبه لك.. للي جي
إمسك يا شاب الحكمة اههِ في غصن حي
تحسبها جاية في ملزمة؟! أبداً.. في شتلة
حابي عليها.. وكل يوم.. مية.. وضي
من حُرّ دمي بودّعك.. وبودِعك رسمي الوصية
سيفي وعهدي في خزنة من فولاذ عصية
سيبهم في حوزة ست داري دام وفاءها
لحمي أمانة.. وفني عهد.. وصدقة جارية
2 comments:
الفنان خالد الصاوي يتميز بسهولة الكلمة وصداها الجامد احسنت يا فنان
والله يا استاذ لو عملت الكلام بصوتك هتفيد ناس كتير وقبل ما يقع في الغلط يفرمل ويعرف مصلحتو فين
Post a Comment