مدد يا مصر

مدد يا مصر
في أي شرع؟ في أي دين؟؟
يا أخو البنات.. يا أبو البنين
تمشي البنية في غابة طين
خنازير شمال.. وضباع يمين
ده يرمي كتف، وده إيدين
وينجسوا توب الفتى
-قبل الفتاة- يا مؤمنين!
ويدنسوا شرف الحياة
ويلوموا بنتك عالأنين!...
عالظلم ساكت.. تبقى إيه؟
وبدون كرامة.. تبقى مين؟؟

يا ولاد بلدنا يا سامعين
النخوة فين؟ النخوة فين؟؟
يا اهل البلد.. مدد يا مصر
يا أوليا.. يا محاربين
عاوزينها تنضف مالبلا
والأوّلة.. عالسافلين
حطوا الدراع ويا الدراع
ويالله بينا أجمعين
الموت لأنطاع الحياة
"المَوْتُ للمتحرشين