الخبز و الحرية

وقت اما قلنا مابدهاش
كانوا هم في الجحر الغميق..
بيخططوا ويتودودوا
ساعة يشدوا عالنظام
وساعات كثير.. يتوددوا
... يرموا الضعيف فيهم لكسرى
والمحروقين قربان لقيصر
وعلى الشاشات.. يتشددوا
لو كان كمين.. يتنصلوا
لو برلمان.. يتبغددوا
ويحللوا ويحرموا
ويوالسوا حتى مع العدو
ويوعدوا.. ويتوعدوا.. ويؤكدوا.. ويهددوا
ويلبدوا مصر بغيوم
وفي النهاية مفيش مطر
ويؤجروا شرف الفقير
ويحملوه شكارة شعير
ويفسحوه بين السعير والجنة، وانت مع الأسف..
تعصر على راسك لمون
وتسيب عيالك يحمضوا!

يا خلق مصر ف كل نجع وكل حارة وكل بيت.. اتمردوا!
اتمردوا علشان تصحّوا من العيا
وتصحوا من أرزل كابوس
وتكملوا الثورة اللي نهضت مننا
اتمردوا .. أو تنهضوا اكثر.. لا قدر ربنا!!
اتمردوا.. قبل اما طير النهضة يبرك عالصدور
يفقس طيور تبيض طيور
وبيضها يطبق عالمسام
تتسمم اللقمة الحلال
والمية تغطس في الرمال
يتجرم القول والكلام
وسينا تتحرم عليك
ويجردوك من الكنال
ويولعونا ف بعضنا
اتمردوا
اتمردوا