يوم الحد الجاى

" لازم تفهموا يا جدعان ان العيال الصيع دى مش حتسيبنا فى حالنا، ماحدش يقولى خايف، محدش ينطق الكلمة دى، خايف من ايه يابنى انت وهو؟ دول صيع صحيح لكن أى كلام، وإذا كنت راجل وتفيت فى وش أتخن من فيهم حينخ زى الجزمة القديمة، دول كلاب ولا يستاهلوا إن الواحد حتى يحطهم فى دماغه لكنهم زودوها قوى، ودى مش حتة أبوهم، لازم نقف قصادهم مرة واحدة وحتشوفوا حيبقوا زى الجزم، لازم يفهموا إننا مش عيال، أصغر من فينا عمره ستاشر سنة يعنى رجالة، وهم دايرين معاكسة وغلاسة وسفالة لازم نديهم فى وشهم يا رجالة".
أول ما خلص عمرو كلامه، بصوله كلهم، وكانوا بيجزوا على سنانهم، يمكن من الحمقة، ويمكن من الخوف، ما حدش يعرف، لكنهم اتفقوا يروحوا يدوهم علقة يوم الحد علشان هم قلوا أدبهم على نيفين أخت طارق وهى مارضيتش تقول عملولها ايه بالضبط بس كانت بتعيط جامد قوي وأول ما عمرو عرف اتجنن. " لازم نضرب الكلاب دول .. لازم نكسر دماغهم " ..
وعنها بعد ما اتفق مع الشلة على يوم الحد قابل واحد من الولاد التانيين وراح ضاربه بالقلم وقال له لو رجالة بصحيح يلموا بعض ويقابلوهم يوم الحد الجاى على ناصية المحل الجديد، لو رجالة بصحيح.
جه يوم الحد، وكان شمس قوى، حر جامد خالص، وراح عمرو الساعة اتناشر حسب الميعاد ووقف واستنى الشلتين شلته وشلتهم وهو طبعا كان محروق منهم قوى، وكان مصمم يضربهم جامد جدا علشان ضايقوا نيفين، ومش مهم انهم اكبر ولا أكتر، "الشجاعة تغلب الكثرة".

فضل مستنى شويه وكل شويه يبص فوق على الشباك اياه ، الشباك كان فاضى وفين وفين لما طلعت نيفين فى الشباك وقعدت تشاور لعمرو وتقوله حاجات مش مفهومة وشاورتله يمشى وشاورتله يطلع وهو مصمم مايمشيش وشاورلها تخش جوه بس هو كان نفسه تفضل واقفة وتتفرج عليهم وهم بيضربوهم وبعدين جت الشلة التانية، ولا واحد جه من شلته، ولا طارق جه، وهم كانوا جامدين خالص وهو مارضيش يجرى، وفضل يحاول معاهم، يحاول يحاول وكان وشه كله دم وهو بيبص على الشباك وكانت نيفين عمالة تعيط..
أنا كنت شايفها وكنت واقف بعيد شوية عمال أهوهو... أهوهو ... لكن زى ماانتى عارفه يا " لايكا " ان "اللولو" اللى زينا ما يقدروش يعملوا حاجة خالص ... وخصوصا لما يكونوا لوحديهم خالص ... خالص ...

===========

(من مجموعة يوميات خلود 1990)