Saturday, September 30, 2006

غزل لأهل القمة


وحشتني القمة العربية
وكلامها الحلو الكداب
وعيونها المايصة العسلية
وقرار الشجب الخلاب
وإيديها النونو بتتعفرت
وتدق جميع الأبواب
والصوت السيكا بيغرد
ويلقح ...لكن بحساب
وادي يا بني فرق التربية
وادي قمة ما يغلبها غلاب
حبيتها علشان رقتها
حبوها معايا يا أحباب
القمة المزة العربية
وفحولها شجر اللبلاب!
وحشتني النخوة الشربتلي
والكرافتات الممضية
والشعر المصبوغ والغنجة
واللغوة والديبلوماسية
وبيان الفتحة والقفلة
ولا الأحاديث الجانبية
يا اخواتي عليها اما تهدد
وتحدف قطن وحنية
وتخاصم ...لكن من برة
ما كفاية السحنة الملوية
أهي دي اللي تعيش يا بلدينا
شارية ومكسوفة وعشرية
ما هي بنت ذوات مصروف فيها
قوت الملايين الفقرية !
وحشتني خلاص انا مش قادر
ودوني يا عالم بيروت
أتملي من البشرة الناعمة
وأملس ع الخد التوت
وافديها بروحي من الحاقد
واديله خمسين نبوت
قال يعني مش عاجبه صفارها
علي ايه بتلوم الكتكوت؟!
يجرحها عشان متربية
باصة في الأرض مفيش صوت؟ ؟
الله لا يسامحك يا جاحدها
يا مبجح فيها يا سفروت
وتعيش القمة العربية
لو حتي العربية تموت !!!!

5 comments:

Anonymous said...

ممكن اطلب طلب من بعد اذن حضرتك الخط صغيير جدا وتصعب قراءته ..انا اسفة بس كنت حبه اقرا ما كتبت

تحياتي

Anonymous said...

الى احلى انسان وفنان ومبدع الى الانسان الحساس الذي يملك القلب ..اسلوب ساخر واقعي يمس حياتنا ويترك بصمة بداخلنا انت انسان مثقف ومحترم يشرفني ان اقرا جميع ما تكتب

شكرا على القصيدة

الخبز و الحرية said...

الكلام ده كبير:)
شكرا رشا ده من ذوقك وحساسيتك العالية

Anonymous said...

مع كل بوست باحس انك فى تقدم مستمر
حلوه وساخره ومعبره للغااااااايه

^ H@fSS@^ said...

تحفة ازليةمالهاش حل