Tuesday, September 05, 2006

اطلع بقى!

اطلع بقى
كل الطرق مبدورة طوب وموحلة
مبدورة طوب وموحلة
ومكحلة بلون الغضب ومعصّبة
متكحلة ومعصّبة
وحداد طويل
موسم عويل
وفصول بكا مترتبة
الحزن آخره فين بقى؟
سرداب شقا
وأوضة ضلما و ألف باب
حيطان وهوة وقطة سودا وألف سلم مكسورين
اطلع بقى برة البكا.. برة الأنين
اطلع بقى من كل شيء
اطلع بقى
اطلع بقى
كل الحاجات مش محتاجات الا الحريق
اطلع بقى
اطلع بقى من كل شيء
نفسك زفير الموت وريقك جف واتلف البدن جوة الكفن بدري وقالوا ما تيسر م الجناز والتعويذات
اطلع بقى
اطلع بقى من كل شيء
شفتك رموك جوة التابوت وكأنهم في المنور الموبوء بيرموا كيس ورق
اطلع بقى من كل شيء
حكيت بجسمك-جثتك كل الطوابق وانت نازل من جحيم لجحيم حياة
مالك بتبرق زي لحظة موت فريدة؟
وبتنتفض تحت الجريدة ليه بقى؟؟
اطلع بقى من كل شيء
اطلع بقى!
اطلع بقى!!

لحظة غضب يولدها جسمك م الحروق.. تطلع بنا
الكون عليك حق وحقيق
وماعادش الا رعشة الموت الأخيرة

1 comment:

Anonymous said...

وحداد طويل
موسم عويل
وفصول بكا مترتبة
الحزن آخره فين بقى؟
****
نفسك زفير الموت وريقك جف واتلف البدن جوة الكفن
****
شفتك رموك جوة التابوت وكأنهم في المنور الموبوء بيرموا كيس ورق
****
مالك بتبرق زي لحظة موت فريدة؟
وبتنتفض تحت الجريدة ليه بقى؟؟
اطلع بقى من كل شيء
اطلع بقى!
****

روعه روعه بجد
والاجزاء دى ق ايه عجبتنى وأثرت فيا
جميل يا سيدى
ومين أكون أنا عشان انتقدك