Wednesday, December 24, 2008

في مدح كائن منتَظر



جاي من بلاد الرافدين إنسان
مش إسمه بس.. حالته كمان: منتظَر
غريب في داره ماعادلهوش عنوان
ومنين ما راح يلقى علامة خطر
وقت أمّا شفته بيرمي الجمرة عالشَّيْطان
رد النسيم في الرئة، والكِبد عدا الخطر
وجريت أجيب كتب التاريخ تمّاً
زي اللي مسه جنون الوجد بعد الصبر
معقول مفيش شطرة تقول عنه؟!
إشمعنى حورس وهو بيرمي فرس النهر؟!
ومارجرجس بذاته رمى عالوحش.. مش فاكرين؟؟
ولا إبراهيم الخليل مش كسّر الأصنام؟؟
إشمعنى إنت يا منتظَر حواليك كلام؟!!
منا اللي بايعك، ومنا برضه من باعك
الثورة فينا وفينا الظلم والإحباط
فينا الفواعلي اللي زيك.. وفينا الغدر، والضباط
حبة فلاسفة لكن في الجد ماتلاقيهمش
يفتوك في بيض الخروف! وفي النطاعة ملوك!
يهينوك وهُمّ يا منتظر ملهمش وش
ويسموا غاصب أرضهم صاحب وطن!!!
آه يا زمن!!
واللهِ لأكتب ولو بكتب كلام فارغ
وأحفر حكايتك ده أنا مليان ومش فارغ
أنا المعبّي يا زيدي في زمن.. فارغ
وانت اللي عالي.. يا نجم بيضوي من بغداد
شالله يا كل الأوليا.. شالله يا آل البَيْتِ يا أسياد
عبيد بقينا جميعا، والعِدا.. أسياد
وفينا ناس زينا.. وفينا ناس أسياد
قطّعت كل الملاحم.. نفسي أقول زيّها
نفسي في ربابة تحبني، وأكون راجلها وقدّها
وبدال ما أقول الهلالي أقول أنا: منتظَر
وبدل ماألقّح كلامي أخلّي قولي حجر
وأنقح دماغ البلطجية ومسّاحين الجوخ
وأقف على جثث اللي ظالمينّا
شايل بإيد صورتك ورافع كلمتك
والثانية رافعة جزمتك

12 comments:

Cleopatra Ericsson said...

Mr. Khaled.
Tell me what to say… your words are nice… I’ve said that before.
Your words aren’t empty talking and you’re doing what you can to make Muntazer al-Zaidi being remembered. There are those who condemn the action and there are those who don't even care so you are doing a lot.
Zeina

KHALED-ELSAWY said...

متشكر يا زينة ده اقل واجب فعلا لأنه حدث مهم ولأنه شخص محترم ولأن رأيي ان المعارضين له والناقمين عليه بدعوى انه فعل غير متحضر لا يفهومن في الحضارة شيئا ولم يقرؤا التاريخ ولا عرفوا كيف تندلع جسام الحوادث من مستصغر الشرر.ودول طبعا لو كانوا عايشوا الثورات الكبرى زي الفرنسية والروسية كانوا حيرفضوا كل تفاصيلها لنهم ملكيين أكثر من الملك.
الناس اللي سايبة الاحتلال والنهب والقتل والاغتصاب وتدنيس المقدسات والايقاع بين الطوائف وماسكين في الغلبان اللي من قلب وجعه سجل موقف شريف له وللجميع..دول ناس جهلا أولا، ولو مش جهلا وفاهمين فهم خونة رسمي أو على أقل تقدير عملاء للاستعمار سواء قصدوا او لم يقصدوا.

ساره said...

والله ياخالد بجد موقف منتظر بين مين العميل ومين الوطني
فيه ناس كثيره يتمنوا يكونوا منتظر
وفيه ناس ثانيه اسمها حزب وانا مالي وفيه ناس مستخبين بينا ويستنوا ساعه الصفر عشان ينقلبوا عينا

لله درك يامنتظر رجعتنا لزمن الفرسان

الله يحفظك ياخالد

ياسر حسين said...

ازيك يا خالد
احييك على هذه الكلمات
شعرت اني داخل بانوراما تاريخية
من حورس لحد منتظر الزيدي
والحذاء اللي اترمى ده فعلا قد يكون نواة تغيير
والقاء الحذاء لم يكن الهدف منه ان يصيب شخص بوش
بقدر أنه رمز ورسالة للعالم عن رفض سياسة امريكا وتواجدها في المنطقة
أحييك مرة أخرى
وإلى لقاء قريب إن شاء الله

أم مريم said...

هايل بجد يا فنان ولو ان ده مش جديد عليك
الحقيقة احنا اصبحنا كلنا منتظرين مش بس منتظر الزيدي لوحده لكن مش عارفة حنفضل منتظرين كده لحد امتى
؟ الظاهر لحد يوم الحساب
-حساب كل ظالم_
عموما يسلم قلمك
تقبل مروري و احترامي

Unique Gurl said...

بجد احييك بشدة علي الكلام ده
انا كنت بقرأ الكلام و حاسه كل كلمه
ووصلني شعورك و اللي هو طبعا شعور الناس كلها تجاه هذا البطل
بجد كلامك رائع و اكثر من رائع واكثر من ممتاز
وده اللي احنا متعودين عليه من حضرتك
تقبل مروري
ســـــــلام :):)

KHALED-ELSAWY said...

أشكركم وربنا يهون عليه ضيقته لأنه رمز وده حيحط عليه عبء إضافي هو الصمود جوة قبضة ايدهم.. ربنا يقويه.

عاليا حليم said...

رد النسيم في الرئة، والكِبد عدا الخطر

----------------------

اشمعنة الكبد ؟

محمد البشبيشي said...

وأقف على جثث اللي ظالمينّا
شايل بإيد صورتك ورافع كلمتك
والثانية رافعة جزمتك

بجد انت فنان عبقري
معلش انا رديت متاخر
بس ماكنتش بقعد كتير
بس فى كل الاوحول انت
مش فنان وبس انت فنان عبقري
بدون اى مجاملات

amreltokhy said...

استاز خالد .ياترى مافكرتش تكتب رباعيات زى صلاح جاهين انا شايف انك بتتأثر بكل شىءفى حياتنا من احداث وشخصيات

loleta said...

كل اللي اتكلمو قبلي قالو كل اللي انا كنت هقولو
(حبة فلاسفة لكن في الجد ماتلاقيهمش
يفتوك في بيض الخروف! وفي النطاعة ملوك!
يهينوك وهُمّ يا منتظر ملهمش وش
ويسموا غاصب أرضهم صاحب وطن!!!
آه يا زمن!!)

الكلمه دي خلت دمعتي تنزل بجد قريتها كذا مره ورا بعض لإني حسيت إن حضرتك قريت اللي جوا قلبي واللي اكيد جوا قلب ناس كتير غيري....

حقيقي بشكرك من قلبي ودمت لنا مبدعا يا مستر خالد وأكيد كلنا مستنيين الجديد.....

yassoo said...

قطّعت كل الملاحم.. نفسي أقول زيّها
نفسي في ربابة تحبني، وأكون راجلها وقدّها
وبدال ما أقول الهلالي أقول أنا: منتظَر
وبدل ماألقّح كلامي أخلّي قولي حجر
وأنقح دماغ البلطجية ومسّاحين الجوخ
وأقف على جثث اللي ظالمينّا
شايل بإيد صورتك ورافع كلمتك
والثانية رافعة جزمتك



حلو اوي ...كلام واضح وصريح

وبكل سهولة حسيته وعبر عن اراء ومشاعر ناس كتير اوي

تحياتي ليك ومستنين كل ماهو ممتع وشيق