حتة من حكايات بلدنا
-----------
آبه العمدة
--------
العمدة حمال الوجوه واللستة عنده
ولا عهد عنده، العهدة والأسرار.. وقافل
في عبه مفتاح الخزين متدنسين جنبه الآيات
من بعد عام فيه عام لحجة وراها حاجة
يعبد هبل على انه سبحانه العليم
عشمان في رشوة يروح يطوف كده اي حاجة
يسرح في تفاح الحريم
وفي عبه غير الحج.. حاجة
يهرش إشارة لعلها تلفِق معاها
وان شافه حاج بجد يستغفر وراها
والحاج يستغفر وراه ويستعيذ من الخبيئة
وقد رَآه وقد رآها
---
ابن الخبيثة ملوش سمة ولا صابعه باصم
لكن معاه أختام بلدنا -محمدي من مية سنة
بايع لعاصم
وادي اللي واصل من ابوك لأخوك وشاري منه
حنا وراح يقدس
قالك داوود ملك ومالك حقه يورث
وادي حجة البيت اللي طار من أيد لايد وده
ختم فلتس
وجلا جلا يقلعك جلباب ابيك ويصقعك وَيَا
الجميع
ارض ومباني يجرفك ويصرّفك تركة ورضيع
طابور عرايا من اليتامى وابنه يلبس
وانا وانت نشهد عاللي جاي وعاللي رايح
أخين على الدم السخين والنخوة ليها زعقة
فينا وعرق طايح
عرق اللي من ملح السنين في الارض فايح
---
ابن البلد مش ابن آبه العمدة فاشل يدعى
ناجح
بالعافية راضع من مره معقربة قاطعة الحنان
وَيَا الرضاع
عشرين سنة بتغل في السقط اللي ضاع
نسيت جمايل ربنا من سن ستاشر عروسة لأبو
السباع
ولا عاد فيه جمع مع البنات ولا خولي يزنق
عاليومية في كفها وبنص عين بجيبها من اصغر صباع
ويشلح اللي اتخيله والزرعة فايرة مهفهفة
ويزنهر الفحل في حظيرته يمد بوزه للشيطان
وللخفا
والبت من قبل البلوغ بالغة الرجال من وشهم
راقمة القفا
تتلوى عالهادي اما تسمع بوق نفيره ولو كتوم
وهو يأكل بالعيون طلسم في شمامتين نهود
نافخة الهدوم
وهي بصة بصتين هرست تاريخه في لغوته وحاسبة
الحساب
يقرص على أيدها اليومية شندوتش قوام تعوم
سبقت نيوتن كل فعل ترده فعلة وكل بغل يدق
باب
افتح يا سمسم قبلا سمسم حط بيدي معيش جيوب
يهم ترجع خطوة ليها خطوتين منها يدوب
الخولي صالح حقه نضحك اسمه صالح
مانساش هبالته عاوج رقبته وأيده قافشة كفها
بالساعة رايح
صفقة وتفاوض سعد باشا والانجليز لم يبلغوها
مره قد بته لسانه واقع بين ريالته وقرشه
مالح
وهات يا سكر هات جنابك ده انت وحياة اللي
جابك قمع سكر بالبريزة
وهكذا على رأي محمود المليجي وهكذا سقطت
لويزا
---
ولأنه ستار العوار ماعرهاش
دخلت على العمدة العروسة وقام ماقامش ماتناهاش
عنك يا سيدي بايدي ليس بيد عمرو ولا عمر
صرخت وعاش
طلع الغضنفر رايته حمرا زغرطوا
وأبو الطرية برم شنابه عالجميع واخواتها
تما زقططوا
مين الضحية غير دكر بط اندبح من كف ياما
زغطه
والدم لمة
---
أدي الحكاية حكاية واحدة من بلدنا وكل قصة
وليها ختمة
لكنها مش هي دي اخر المتمة
وبكرة نحكي ف حتة تانية
دي مصر كبرى فيها نومة وبكرة ليها قومة
تانية
صلوا عليه ومجدوا سيدكم ومصر في قلبكم
ما تغيبش ثانية
No comments:
Post a Comment