خماسية في أوباما.. وراك وراك

 أيام انتخابه أول مرة:

أسوان بتنده ع المنيا
والندهة واصلة لآخر الكون!
وبيرقصوله قوي ف كيني
مستبشرين بسمار اللون!!
حاسيينه حيداوي المطحون
وتبقى بَرْداً وسلاما
الناس أهِه.. حابّاك بجنون
وعشمانين خير يا أوباما!
بيقولوا: "صح ديمقراطي
وواد جدع صاحب صاحبه!
بيحب عمرو دياب وشيرين
ولو تعاشره حتحبه!!
واكمنه راضي عليه ربّه..
خلصنا من بوش الواطي!!"
الناس أهِه.. حابّاك بجنون
وعشمانين فيك يا أوباما!
قعدت شارد ومسهّم..
(تقول يا واد ولا تخبي؟؟)
ساكت وسري المتلجم..
بيفط من عيني وغلبي
لا تقوللي أسمر ولا أبيض
ده لو ملاك بجناح أبيض
وحلّ في البيت الأبيض..
لازم حيكشفلك نابُه
ومهما حط احمر وابيض
في الجد.. راح يقفل بابه
ويسوق عليك كل كلابه
ويحرمك من أسلابه
ويهَمَّلك برضه جنابه..
لا حيلتك اسود.. ولا أبيض!
وان طيروا ألف يمامة
وان فرقعوا مليون بمبة..
والله لناخد فيك بمبة
وابقى افتكرها يا أوباما!!
---------
٢) أيام ضرب غزة:

البيه سكت ايام وايام
وكلبه يحصد في الأرواح
ولما جه ينطق.. يا سلام..
ساوى القتيلة بالسفاح!
إشمعنى طيب يوم مومبيه
طلبت محضر وتحري
أنا مش حلومك يا مون بيه
علشان هرشتك من بدري!
مركبتي سالمة يا سلامة
وكفتي هي الطبّة
مش قلتلك يااسطى أوباما
والله لناخد فيك بمبة!!

٣) لما بسلامته جه القاهرة:

ثالث قصيدة اكتبهالك
تقولشي طيفك مكتوبلي!
وهي كلمة بقولهالك
لا تردهالي ولا تقوللي
والله لو تدبح حالك
وتقضّي عمرك تحلفلي..
العبرة يابه بأفعالك
مش بالكلام الجندفلي!!
مادينا اهه.. بص علينا
دكاترة ف علوم الهتافات
غسلنهالك بإيدينا
من الهرم لبين السرايات
وفضّيناها وِخْفينا
وحصل لنا يمن وبركات
حركاتكو ماتخيلش علينا
إكمننا ملوك الحركات!
يابن الحلال شوف يا مصفي..
دم الغلابة ف غرب وشرق
المال ده ياما وحيكفي
لو قسموه الناس بالحق
والأرض حلوة وبتدفّي
لو شلنا بين الناس الفرق
إنت ابن بيت أبيض مخفي
ومهما قلت.. حقولك " لا "

٤) لما انتخبوه ثاني

رابع جواب أكتبهولك
وانت ودانك مقفولة
مبروك يا عم على الثانية
ولو انها.. زي الأولى
سابوك تباشر أملاكهم
رقوك لخولي رأس المال
والحظ ولزاجة رومني
خللوا الحمير ركبوا الأفيال
فاكر اما جيت أول مرة؟
ده قال: كاكاو، وده قال: سحلب
شوف كام سنة ما اتغير شيء
لا انا ولا انت ولا الكوكب
أمريكا طابقة على الدنيا
وانت وطبقتك طابخينها
طبق طبقكم وطبقنا
والأكلة مرة وحافظينها
روح انبسط مع عشاقك
سيب الشنط في البيت الابيض
بس اعترف إن القصة
لا فيها أسمر ولا أبيض
الكرسي ده بتاع الدمية
فيه ألف غيرك حيسدوا
هو المهم تعيشوا ملوك
على الغلابة.. ويتسدوا
سلام بقى يا ابو yes we can!
وكلام دهب ووعود فضة
يا حزب كنبة أمريكا
صبح على طير النهضة!

٥) لما حب يصيع علينا بعد ٣٠يونيو

من كم سنة داس في الجامعة
والكل جاله بدباديبه
وكنت واحد من سبعة
ماراحوش وهرشوا ألاعيبه
وكتبت شعري عالقلعة
وقلت أسجل.. وأسيبه
وبعدها وقع النصاب
وبان ميزانه الجلاشي
كتبت قلت امسك كداب
طار في الهوا قلمي وشاشي
وفي الفضا سجلت كتاب
وأربع صفح للغشاشي
خامس جواب أو ما تعدش
قدرك أنا والله ما سايبك..
الا اما تخرج ما دخلتش
وتروح بعارك لقرايبك
يا بيت يا أبيض حتخيش
ملعون يا شيخ كل مجايبك!
مش قلتلك من أول يوم
وادي السنين جابت ظني
يا فردة نايمة يا عيب الشوم
يا غراب بدمه متحني
يا ابن نحس يا برص يا بوم
يا طاعون بسمه بيلحقني
أقولك ايه؟ لا مش ذنبك
ذنب اللي عشش في أمانك
سهتان ووحدي اللي كشفتك
لا بعت ولا كلت حنانك
حداية بتحدف زيك
مالقفش انا من أيمانك
بقى يابن تيت تراباتاتيت
جابوك بشبشب وبيجامة
علشان تزغط في الكتاكيت
وتربي خونة وهجامة
زعيط معيط نطاط الحيط
خيوط في إيدك يا أوباما
قالولك المسلم ساذج
مع العرب يكرف ويصيص
فجيت لا سرب ولا بوارج
معاك سلاح اسمه التقريص
والندل قام غازل ناسج
والناس بقت جوعى وبلابيص
بياع خسيس ماستغربشي
ما انت ابن مكتب بيضاوي
ياما ظلمنا وما ندمشي
ولا اعترف ولا يوم ناوي
خد المعونة يا تيس وامشي
والعهدة على ابن الصاوي