Monday, January 19, 2009

آخر كلام

أنا مش مصدق إن دي بلدي
ولا عدت اصدق إن انا إنسان
يا ريتني طلقة اتهربت من سينا
ولا قذيفة من جنوب لبنان
ولا صاروخ مطلوق من الأردن
أو أي شيء محدوف من الجولان
ولا صمولة ف خط شايل نفط
ضربة مفك ف خط شايل غاز
أنا مش مصدق إن دول أهلي
ولا عارف اقرا وافك في الألغاز!!
يا ريتني حقنة بنج، أو مشرط
أو لقمة سخنة على بابور الجاز
يا ريتني عمري ما شفت بعيوني
يوم القيامة جي مِالتِلفاز!
منين ما ابص بلاقي صهيوني
والانفجار بيني وبينه قزاز!
أنا مش مصدق إن دول أطفال
متقطعين ومتشالين عالي
والقتل إيه..... عمال على بطال
والله غرت وقلت: عقبالي!!
أنا مش مصدق إن دول أطفال
متقطعين على حجري من غزة
دخانة بيضا قنابل الفسفور
ومن الشاشات تخنقني وأتأذى
إيديا دم وفوقي زنّانة
يابه الشهيد -عم الرسول- حمزة
يابه الحسين يا سيد الشهدا
خلِّصنا أتوسل إليك يا يسوع
ياللي وقفت ف وش روما.. مسِّني
حررني من تعبي وقَرْص الجوع
يا جيش عبيد حالف على شرفه
يا سبارتاكوس.. يا حورس المسموع
يا أوزير يا حيّ ف قلب موت بارد
يا مارِجرجس يا بطل يا جيفارا
يا أي حد في دمه لسه بارود
خدني صاروخ واعزق ف طيارة
أنا مش مصدق ان انا جثة
واحدة من الجثث اللي محتارة
أنام واقوم على شاشة الأخبار
وفي المنام وسط الضحايا بنوح
قويني الف حزام على وسطي
وأخش في السور اللي م مسموح
ياللي تساومني عاللي مش بايدي
خد جسمي اهه.. وأنا حلالي الروح!

38 comments:

منال said...

تحياتي قصيدتك جميلة والله رغما عنا يجب ان نصدق ما يحدث لاننا عاجزين عن درء رصاصة اسرائيلية واكتفى العرب بعقد القمم .البقية في حياتكم.منال.المغرب

romansy said...

لازم نصدق ان دى بلدنا واننا كده جزء منها
لازم نصدق ما احنا شايفين الحزن فى عيونها
شايفنه بقاله سنين مش بيفارقها
ولا احنا عارفين فى يوم نقدر نصالحها

كلماتك جميله يا استاذنا

Unknown said...

يا ريتنى لقمة سخنة على وابور جاز

آخر كلام إن اللى بقراه ده كلام لشاعر حاسس بألم بألم الناس
مش مجرد مهنة و لا إظهار لقدراته الإبداعيةو لا واخد الشعر تنفيس شخصى و بس

Tamer Diab said...

جميلة أوي القصيدة وبها كثير من التشبيهات والصور البليغة فعلاً
ولكن لا تصاب باليأس
وتذكر أن الشمس تخرج بعد شدة الظلمة
والحطب المشتعل ينطفئ عندما يصل إلي أعلي درجات الاشتعال

Nasimlibya `√ said...

دائما تاخدني كلماتك لابعد حد

سلمت يمينك

أم مريم said...

لا انت مصدق ولا احنا مصدقين
الاحساس بالعجز بيقتلنا
انا احيانا بتخيل ان بنتي كان ممكن تكون من ضمن الاطفال اللي اتحولوا لأشلاء ومجرد الفكرة بتخليني أبكي
ما بالنا بحال كل أم و كل أب جمع اشلاء اطفاله بايديه؟
و بالمناسبة ..أحب اقدم خالص عزائي في قطة البيت الأبيض اللي ماتت من كام يوم و قام بوش بنعيها في بيان رسمي
كان واجب برضه يا جماعة نبعت برقيات عزاء

Zeina Ramadan said...
This comment has been removed by the author.
Anonymous said...

و مين فينا قادر يصدق


احساس بشع و احنا كل يوم بنشوف أشلاء الأطفال وجثث أهلنا قدامنا و مش قادرين نمنع عنهم أيدى الصهاينة و قنابلهم الفسفورية الجبانة


يا ريتني عمري ما شفت بعيونى
يوم القيامة جي مِالتِلفاز!
منين ما ابص بلاقي صهيوني
والانفجار بيني وبينه قزاز



أشكرك على كلماتك الرائعة اللى بتعبر عن اللى جوانا


فتاة مصرية

Marwa Friday said...

ومنين أجيب ناس لمعناة الكلام يتلوه؟

!!! عارفة ... مش عارف ليه said...

كم هو مهين

ذلك الاحساس

بالذل والخزي والعار


شكراً لك

ساره said...

سقطت الاقنعه
ظهرت الوجوه على حقيقتها
كلنا فى صدمه
وقلبونا تبكي
حسبنا الله ونعم الوكيل

همس said...

لا صدق ان دى بلدنا

ولازم تفضل بلدنا

وان شاء الله هتبقى بلدنا

بس لا هيبقى ولا هيكون اللى بيحصل دا لينا

وان شاء الله ربنا هينصرنا


تحياتى

Anonymous said...

في مطـارٍ أجنبيْ
حَـدّقَ الشّرطيُّ بيْ
- قبلَ أنْ يطلُبَ أوراقـي -
ولمّـا لم يجِـدْ عِنـدي لساناً أو شَفَـهْ
زمَّ عينَيــهِ وأبـدى أسَفَـهْ
قائلاً : أهلاً وسهـلاً
.. يا صـديقي العَرَبـي !
احمد مطر
تمام كلامك و الله يا خالد كلنا هذا الرجل احنا عايزين نبقى كلنا جيفارا بدل ما نستنى واحد يبقى جيفارا لينا

zainab said...

السلام عليكم و رحمةالله و بركاته

استاذ / خالد

احساسك جميل و كلماتك عبرت عن اللى عايزه اقووله خاصة لما قلت " يا ريتني طلقة اتهربت من سينا
ولا قذيفة من جنوب لبنان
ولا صاروخ مطلوق من الأردن
أو أي شيء محدوف من الجولان
ولا صمولة ف خط شايل نفط
ضربة مفك ف خط شايل غاز
أنا مش مصدق إن دول أهلي
ولا عارف اقرا وافك في الألغاز!!
يا ريتني حقنة بنج، أو مشرط
أو لقمة سخنة على بابور الجاز
يا ريتني عمري ما شفت بعيوني
يوم القيامة جي مِالتِلفاز!
منين ما ابص بلاقي صهيوني
والانفجار بيني وبينه قزاز!
أنا مش مصدق إن دول أطفال
متقطعين ومتشالين عالي
والقتل إيه..... عمال على بطال
والله غرت وقلت: عقبالي"

تحياتى

Anonymous said...

http://www.youtube.com/watch?v=ZUEI8IROxRA&feature=channel_page

فنانين مصريين يدعون الشعب المصري الي التضامن مع شعب غزة

Plz help spread the msg... thanks

Anonymous said...

أنا بجد لسه كنت بافكر
محتاره اوى مش عارفه هاربى ابنى ازاى على حب البلد و انا زعلانه و حزينه منها
بلدنا فى طفولتنا كانت احلى و اجمل
دلوقتى كل شىء اتغير .. خايفه ابنى يطلع من صغره حاسس الهزيمه و المراره .. بنت اخويا بتسألنى على طفل فلسطينى شافته فى التليفزيون مجروح و بيبكى بتقوللى مين اللى عمل فيه كده
ما عرفتش ارد لقيت دموعى نزلت لانى حاسه بالمهانه بجد
الاطفال دول هيطلعوا على الذل و الهزيمه و التراخى و حكايات 6 اكتوبر بالنسبه لهم هتبقى زى حكايات الف ليله و ليله
لما شفت الققم الهزيله و شتايم العرب فى بعض حسيت ان المستقبل مظلم طول ما الوشوش دى هى اللى بتحكمنا
حسبى الله و نعم الوكيل

Zeina Ramadan said...
This comment has been removed by the author.
mohamed_elpshepshy said...

ياللي تساومني عاللي مش بايدي
خد جسمي اهه.. وأنا حلالي الروح!

جميل بجد جسمى اشعر من الكلمات
ربنا ما يحرمنا من كلماتك الرائعه
تحياتى

Wael Galal said...

ومين مصدق؟
"أنا مش مصدق ان انا جثة
واحدة من الجثث اللي محتارة"

حتى الجثة محتارة؟, لكن عموما هو ده الحال فعلا

"قويني الف حزام على وسطي
وأخش في السور اللي م مسموح"

و ده هو بس الأمل, لكل من يتصور ان الأمل في السلام و الفشل في المقاومة

منال said...

تحياتي انا مستغربة الموقف العربي طالما نمتلك ملايين الدولارات لاعمار غزة فلم لم يتم اعداد الجيوش العربية اعدادا جيدا على الاقل لدرء اي خطر محتمل والدي يغيظ اننا ما زلنا نتحدث عن اتفاقيات السلام والالتزام ببنودها واسرائيل تتعمد تخويف الشعوب العربية كافة من خلال استعراض القوة في غزةوالله حكاية السلام مجرد هروب من مواجهة العدو ودليل على ضعف العرب وهنا اتدكر المتنبي لما قال ياا مة ضحكت من جهلها الامم ......كل سنة وانتم طيبين.منال.المغرب

s.m said...

اظن بعد ما الموقف ظاهر على ارض الوقع والحقيقة بانت للكل ووضح دور مصر وانها مكانتش سالبية ايوا فى بعض الاخطاء فى التعبير على لسان وزير الخارجية المصرى انما مكانش فيه خيانة وكل الاطراف بتلعب لمصالحهم الشخصية وكان فعلا لازم علينا اننا نحمى نفسنا من اوتار العزف على سمفونية اللعب بى المشاعر واستغلال الاوضاع انا يمكن كنت موضح وجهة نظرى قبل الاحداث ما تخلص بس اللى المفروض كان على الحكومة هى الشفافية يعنى كانت تخرج من اول يوم وتقول الوضع فية كذا وكذا انما انها تسكت وتحسس البعض ان مصر دورها سالبى وانها شاركة فى العدوان دا كان اكبر خطا وهى دى ومازالت اللى الحكومة مش قادرة تقولة يعنى سابت الهوجائين يتحركوا وبعد كدا تكلموا يعنى النار مسكت فى القلوب وفكرة الخيانة اترسخت فى بعض النفوس واحنا جاين بعد كدا نتكلم دا الغلط انما موقفنا من الاول كان صحيح وانا اول مرة اوفق الحكومة المصرية على حاجة على الرغم من الاختلاف معها فى كل حاجة داخليا

t3ban said...

لأ صدق
بس بنحبها

لو انت فعلا خالد الصاوي
ححترمك جدا
و لو مش فعلا فيكفيني قلمك

وينكى said...

احنا اللى عملنا فى نفسنا كده
وماحدش يقدر ينكر
مهما بعدنا عن الحقيقة دى وغيبنا نفسنا
احنا اللى تخاذلنا
ازاى عاوزين نغير الوضع الأعوج ده واحنا اللى مش عاوزين نتغير
ليه احنا مستنيين ايه
فى ايدنا السلاح ومش عاوزين نشد الزناد لحد ما صدى فى ايدينا واكلته البارومه
ونسينا يعنى ايه سلاح
سوري يا خالد
بس انا عندى احساس عميق بالقرف مننا
مش باكؤه البلد
باكره المتخاذلين من ناسها
بكره الدور ييجى علينا وهانلمح الشماته فى عيون من ظنناهم اصدقاء
عشان احنا اللى عاوزين كده
اسفه على حدتى وانفعالى
بس انت اتكيت على الجرح جامد
وكان لازم الصديد ينزل

Zeina Ramadan said...
This comment has been removed by the author.
Anonymous said...

هو ده الواقع اللى لازم نصدقه
والحقيقة المرة
موت ضمير الإنسان
وموت الإنسان فينا

تحياتى لك أستاذ خالد

Unknown said...

إلى جمهور الفنان و الكاتب ( خالد الصاوى ) ندعوكم لحضور حفل توقيع مؤلفاته المعروضة هذا العام بمعرض القاهرة الدولى للكتاب بجناح ( دار شمس للنشر و الإعلام ثم جناح الهيئة المصرية العامة للكتاب ) يوم الجمعة القادم الموافق 30 يناير إن شاء الله ، سوف يتواجد الفنان خالد الصاوى من س 4 الى س 6 مساءأ ليوقع لجمهوره

-----------------------



أعماله المعروضة هذا العام

----------------------

أحدث دواوينه الشعرية " أجراس " " نص مسرحية اللعب فى الدماغ + سى دى بأغانى المسرحية "

بجناح دار شمس للنشر و الإعلام - سرايا 2

جناح الهيئة المصرية العامة للكتاب

جناح عين للدراسات - سرايا ب

جناح ألمانيا

جناح الناشرين العرب

" المجموعة القصصية يوميات خلود "
بجناح دار أكتب - صالة 3 - علوى

leeno said...

تصوير للواقع المر و الاغبر و المنيل الللي عايشينع و نفسي الاقي جواب لسؤالي ايه الطريق لتغييره؟؟؟؟!!!!!!!!!!!!!!!

Anonymous said...

استاذ خالد
انا بحييك علي دورك الهايل في فيلم ميكانو
انت عملت دور عبقري اكتر من رائع
خاصة المشهد لما تسيب شغلك
انت استاذ تمثيل
وشخصية محترمة جدا
محمود

Unknown said...

انا اول مره اعدى عالمدونه دى
وبشكر كلماتك الى مش هقول زى اى حد بيقول ( جميله ومعبره ) بس هقول مست قلوبنا
ببكى من قلبى عاللى بيحصل
ويا ريت صوتى هيوصل
.. لكن انا محبوس سجين
تحت التراب واشكى لمين
متقيده واللجام اهلى
جه فى المنام طفل غزه وندهلى
وبكل عزه قالى اسأليهم ليه اشتركوا فى دم اهلى
على صوتى وندهت فوقوا شايفين الى بيحصل بس يا ريت صوتى هيوصل
مهما على
اصل انا محبوس سجين تحت التراب


تحياتى لكلماتك

Mariam Galal said...

كلام حلو فعلا
انا نادر لما بعلق على خواطر بس بجد اللى بحسهم من القلب لانهم بيدخلو قلبى وبيمسوه
والكلام ده فعلا بيمس القلب

مؤمن عبد الوهاب said...

أولا أنا عايز أقول إن القصيدة تمام أوي

و لكن ثانيا أنا شايف إن مشاعرنا و إحنا بنشوف الموت على التلفاز بيصيب إخوانا الفلسطينين هي مشاعر ممكن تؤدي لصراخ أو أي شيء
لكن البناء محتاج عمل و صبر لإن البناء هياخد وقت كبير و اللي هيموت كتير

تحياتي

maxbeta3zaman said...

لم أكن أعرف أنك تكتب الشعر وأعرفك فقط كممثل جيد و عثرت على المدونةصدفة لكنى أعجبت جدا باقصيدة التى تعكس احساسنا جميعا بالمرارة لما حدث ..كل التحية لك
ملحوظة : ياريت تشيل كلمة التأكيد من عندك لأنها تعيق من يريد التعليق فى مدونتك وهذه ترفع من setting>> comments >>>varification>>>show word >>>NO

basma bahaa said...

ايه الجمال دا!
عارف اللى بيوجعنى اكتر من كل مناظر الموت اللى بنشوفها على التليفزيون ايه؟
اننا بنكمل يومنا عادى
ولا فى اى حاجة بتتغير!

EMAN HASSAN KAMEL said...

الله عليك يا فنان كلامك يطلع من القلب يدخل للقلب فعلاً كلام بسيط لكن مين فى الزمن ده يفهمه أو يحس بقيمته

انسان الشعب الطيب والديا said...

ده لان الانسان العربي اصبح عقيم الارادة

والمخ في حالة غيبوبة دائمة

Anonymous said...

سلالالالالام
فطر سعيد
انا عادة لا احب قراءة القصائد من هذ النوع منذ حرب افغانستان فلقد مللت من شعوري بالعجز امام كل ما يحصل
و عاهدت نفسي بان لا أطالع حتى الأخبار نهائيا
و في كل مره افتح مدونتك اتجنب بعض قصائدك
و اخيرا قرأتها اليوم
هي قاسية بعض الشيء
اصبحت لا اطيق ذالك
اعتقد ان الطواغيت في زماننا قد نجحوا في بث مثل هذا الشعور في نفس المواطن العربي
و فوق ذلك جعلوه غارقاً في همه و اثقلوا كاهله بصعوبات الحياة التي خلوقوها
حتى لا يصيبنا و باء النخوة العربي
الذي هو في نظرهم اخطر من
وباء " بومبا" الخنازير
مع حبي
و لا تغيب كثيرا
اشتقنا اليك

yassoo said...

جميل اوي الكلام ومعبر فعلا
ومؤثر بجد وبيعرض الواقع اللي عايشين فيه ومش عارفين نهايته امتى وازاي

قصيدة رائعة
ارق تحياتي ليك ولقلمك

Ragazza said...

جميلة جداً و حزينة جداً جداً