على خيوط الذكريات

حلوة البنات
سكر نبات
شهد وغزل
واللي اتغزل مالذكريات
وعد البنات الطيبة
والمتعبة
واللي اتوصل بين الفؤاد واللي مضى
أزحف عليه برموش شقية مفضضة
كل اللي فات
لو فات ما مات
واللي انقضى ما يوم مضى
حكايات قصار
واحنا الصغار
مايهمناش طول الحكاية وقصرها
هي الحكاية بعمرها؟!
ماتقولناش إيه تعرفوا
ما حتعرفه
إلا إذا عدت عليك
أحلى أميرات البنات

يا قلبي يا قبضة رجوع
قلبي عليك
جايز يكون الاشتياق
همسة فراق
سرعة رجوعك ربما.. نغمة سفر
واغرب ما فيك
إنك ف وسط التنهيدات
بتسلم اللي بين إيديك وبتعترف
لكن لا تطلب مرحمة
ولا فوق شفايفك رغم كراس الخطايا والألم
هفوة ندم
واسمع غناك
حلو اللي فات
لازم يفوت
يمكن بموت
يمكن بصارع في الهلاك
عطش الوجود
أنا جيت معاك
وأموت فداك
آخر ما حنبض أغنيات
وتيجان ملايكة وجنيات
وأسامي عمرك يا عجوز

هلت وشوشكم يا بنات
عنقود كريز
طارح على شجرة لمون
حلوين لحد الانتحار
واحلى ما في الطعم المرار
بتهلوا ليه ؟ وتجوني لا إذن اتأذن ولا اعتذار
وتجيبوا ليه كل المطارح والمشاهد و والحوار؟
واحتار أدمع لو بنيت ليكم مدن
ولا أدمع لما اشاهد الانهيار
آه منكم ومن الجدار
يا مسافرين
يا قطر متحمل حنين
صفر.. وطار
يا مفارقين
مخطوف شبابي مع ارتحالكم فرقوه
وادوني زهر الذكريات

من كل وردة سرقت بعض العطر
لكني سبت ف كل وردة سر
وان كنت خدت من الورود لونها
أنفاسي تشهد في عيون الزهر
إني أخدت كثير صحيح
لكن وهبت العمر
والله وهبت العمر