Thursday, July 11, 2013

جواب جديد لابن أوباما


من كم سنة داس في الجامعة
والكل جاله بدباديبه
وكنت واحد من سبعة
ماراحوش وهرشوا ألاعيبه
وكتبت شعري عالقلعة
وقلت أسجل.. وأسيبه


وبعدها وقع النصاب
وبان ميزانه الجلاشي
كتبت قلت امسك كداب
طار في الهوا قلمي وشاشي
وفي الفضا سجلت كتاب
وأربع صفح للغشاشي

خامس جواب أو ما تعدش
قدرك أنا والله ما سايبك..
الا اما تخرج ما دخلتش
وتروح بعارك لقرايبك
يا بيت يا أبيض حتخيش
ملعون يا شيخ كل مجايبك!

مش قلتلك من أول يوم
وادي السنين جابت ظني
يا فردة نايمة يا عيب الشوم
يا غراب بدمه متحني
يا ابن نحس يا برص يا بوم
يا طاعون بسمه بيلحقني

أقولك ايه؟ لا مش ذنبك
ذنب اللي عشش في أمانك
سهتان ووحدي اللي كشفتك
لا بعت ولا كلت حنانك
حداية بتحدف زيك
مالقفش انا من أيمانك

بقى يابن تيت تراباتاتيت
جابوك بشبشب وبيجامة
علشان تزغط في الكتاكيت
وتربي خونة وهجامة
زعيط معيط نطاط الحيط
خيوط في إيدك يا أوباما

قالولك المسلم ساذج
مع العرب يكرف ويصيص
فجيت لا سرب ولا بوارج
معاك سلاح اسمه التقريص
والندل قام غازل ناسج
والناس بقت جوعى وبلابيص

بياع خسيس ماستغربشي
ما انت ابن مكتب بيضاوي
ياما ظلمنا وما ندمشي
ولا اعترف ولا يوم ناوي
خد المعونة يا تيس وامشي
والعهدة على ابن الصاوي

أعملك ايه طيب تاني؟!
هزأت فيك تهزيء تنين
لو ذرة أحمر حيواني
كنت اعتزلت شمال ويمين
رسمت خطة شيطاني
ولبستها من غير كباسين

قال احنا زحنا سلطاننا
طمعت فيها بمماليكك
واما ندب في جنرالنا
تصحى هوا ويدن ديكك
مالك يا أحف بأيماننا
اثبت لحكسرلك ايدك

من آخر الآخر يا باراك
يابو الابتسامة الثعابيني
وحياة شرف مامتك وباباك
لتقرا عن بلدي وديني
اهجم يا بفتة عشان تتحاك
ونرجعك حتة بكيني

ذاكرت طبعا كام صفحة
في كتاب حكيم اسمه فيتنام
اضرب في عشرة وعالبطحة
يا جمجمة مليانة اخرام
خد المدام آن القارحة
وارمي سفارتك في الحمام

تعرف ما أشوف وش جنابك
ولا اعرف انك قلت خطاب
حبست مرسي ومبارك
وجاي تقلب نور وضباب!
هذا اتجاه واحد قلنا
ارجع وسك وراك الباب

طولت؟ قل لي ما طولتش
ولو ما قلتش برضه حقول!
تحب ولا ما تحبش
كان فيه وخلص وانت المسئول
والمصري حر ما يتهتش
وكلنا واخدين عالفول

إياك يغرك أسطولك
والرباطية اللي عاملها
واياكش مين كان دلدولك
حنقصهولك.. نعملها
سبحانه أبطل مفعولك
وادانا قوة نقفلها

يا شعب أمريكا ما تصحى
وكفاية أحلام فكسانة
مين اللي حارب مين ضحى؟
وفي القصور خلق جبانة
وهبت عمرك والصحة
فدا لطبقة عيانة

حرر بلادك مش بلدي
وموت عشانك مش ليهم
مع احترامي انا مش هندي
لو مية كولمبوس حنبيدهم
الناس هنا جدعة وبلدي
وبالأصول تاخد عينهم

حرر بلادك وابدأها
بابن اللئيمة رسول إبليس
أوباما هو اللي فتأها
والحرب دايما للمتاعيس
على وول ستريت واللي سرقها
لو فيها عدل ما تلقى بوليس

خد الفقير والمحرومة
وأبو الضمير صاحي معانا
بلاها زعما وبروما
خليك في جورج وسيلفانا
وان جت عساكر مظلومة
تقبض على القادة أمانة

سلام رفاقة يا أمريكي
ما دام مسالم.. أخوية
قل للرئيس الأمريكي
بلاش يخش العملية
وصله ده من افريكي
على قفاه العسلية

2 comments:

TheMbroadhurst said...

I had no idea you were also a poet... G'Day my name is Prof Marleina Broadhurst Criminal and Clinical Neuropsychologist of NSW university Sydney Australia... we first met at Donia and Ramay Radwan's wedding then at the demonstration of the Ministry of Culture Zamalek 30th of June... a friend on FB send me this and I like it.... Best of luck my dear... M

TheMbroadhurst said...

I had no idea you are a poet as well... G'Day my name is Prof Marleina Broadhurst I am a Criminal and Clinical neuropsychologist Ph.D or NSW University Sydney Australia... We first met at Donia and Ramy Radwan's wedding then at the Ministry of Culture Demonstration on the 30th of June.... Well I like your Poetry or thought process really... kind regards M