Tuesday, January 06, 2009

حب إيه.. ولا إيه؟؟



طب حلّي شعرك واحضنيني بجد
حابّك بشكل ما يتوصفش لحد
حابك وحاسك جوة أحضاني
مهما بعدتِ برضه حاضناني
حابّك ومحتاجلك وما صدقت
إني لقيتك بعد طول تدوير
لفيت عليكِ واتبعَتّ كثير
مشاوير قَطَعت وقُطْعت المشاوير
طير الطيور جوة العواصف موت
إزاي كلام في الحب يبقى سكوت؟
بليلي ريقي والنبي بكلمتين
طالعين يدوب مالقلب
خلي البساط أحمدي.. خليها ضحك ولعب
دي النمرة جاية علينا وكلها فقرات
ماتوحدوه يااهل الله وشدوا حيلكوا يا حضرات
جايين نعزي ونضحك
أصل المهرج مات
-----------
سبحانه مااعظم شانه.. قلب الفسيخ شربات
والإنسانية بعبلها.. ربك وهبها اختيار
يا حبة من قلب حبة يا قلبي يا طيّار
هافف على زرع الصباح المندّي
لايف مولف عندي
لكن منايا تقول: يا سعْي يا أسفار
علشان تعود باللي من قدرك وفي استنظار
تعرفها؟ لأ! عارفاك؟ ما يمكن! كل شيء له اعتبار
واهو شيء لزوم الشيء، وإشي عشان الإشي
ده القلب فص في قفص لحد يوم الوصال
والنص يلفى النص الحلو.. عقبالنا
لما جميع مخلوقاتها تندمج أحرار..
عالحب.. أيوة يا سيدي بغني للإنسانية
وبغني للثورة، للعمال وللطلبة
قديم قديم مش مهم ده شيء بيسعدني
إني أحس بإني ساعي في الثورة
خدّام تراب الحقيقة، مأجور.. لأحبابي
زيتنا ف دقيقنا جميعاً والجميع شُرَكا
ما هيّ مركب كبيرة وكلنا.. شُرَكا
والبحر زاعق عليها وفي الخطر.. شُرَكا
واما نحارب بنطلع عالميدان شُرَكا
وازاي بنعزق ونحرث.. وفي الحصاد مش شُرَكا؟؟!
وليه بنتعب بدالكم ونبقى ف همنا شُرَكا
ولا احنا ناس وانتو ناس.. ولوحدكم شُرَكا؟؟؟
-------------
يا سيّدي مايهمنيش.. ماتسمينيش شاعر
سميني صييت، ندهجي، أو دوشجي وخلّص
أنا جاي أصرخ عساك يا ظلم تتلخص
بحلم أشوف الولاد شابّة بتتجرأ
شابة عن الطوق ويبقى الضرب أخد وردّْ
أحسن وساخة بحقيقي الضرب في الميت
قشطات يا مصري.. يا مرابط خلف قدرة فول
صامد آخر لبابة.. والرد بالمعقول
ما حد قادر يهزك.. فز يا مسطول
ماهيش شهامة وجدعنة يا طير
إنك مسامح علاوله ف عمرك المقتول
مستني إيه والنبي يا معلمي؟ ما تقول
خلاص يا سيدي ولا يهمك.. وهات راسك
حكم انت عايز اللي يمسح جوخ ويطبل
معلش ياابن امي بس مليشي في التسجيد
لا تقول فراعنة ومن كام ألف والأثارات
إحنا ولود النهارده واللي فات أموات
إصحالي حبة الحكاية أصل باظت طحن
طرطألي ودنك لأمسك فيها وأزمّر
يا تصحّي روحك يا إما ف بعض حنكسّر
علشان بحبك وقاطع بيّ في الكسرة
وان كانش اخوك يوجعك.. ملعون أبو الأسرة
أدعي عليك وادبّح في اللي ينطقها
أنا دمي دمك وهمّ النص في المية
قصاد ميتين يكدحوا.. تنبل وحيد بينش
يلعب قمار.. يلعب خضار.. يلعب ف رجله
يفك عروة سرته.. يتفك كله
مخاليق بلا آدمية تقرقش الغلبان
وتحب تعرق بجد في فدانين الجولف
البورصة تعلا وتوطى وهم في العالي
وكل شيء له دية.. ويشتروه بمالي
حتى الحكومة يجيبوها من المزاد بالقسط
واطبخ يا عبد.. عينيا يا سيدي وانا مالي
لا السلطة مني ولا الرسمال ده رسمالي
-------------
الفيلم كله مناظر.. قصته بكابورت
أبطاله ناس قد جدي.. لابسين فانلة وشورت
بينافسوا أحمد عز والسقا على النيولوك
والصبغة تحفة ومعجزة مبعوتة من نيويورك
جايين يبيعوا الهرم والنيل وصوت الست
ما لهم عزيز في البلد دي، لا ولد ولا بنت
مماليك يخونوا بعضهم مع بعضهم
ويطفحونا الدم واللبن الرضاع
خاربين غيطان القمح سافّين الضِياع
قادرين علينا بحسهم وبصيت قديم
أطقم سنانهم فلّقت لكن ضباع
وماينهشوش الا الغلابى المضروبين
-----------
أنا جاي أجرّس في إيدي فردتين باتا
ثورة نعال وابتدت من شاب بغدادي
رمى عالصنم برجولة في دنيا شحّاتة
تتوسل اللقمة من بق الكلاب عادي
وان تقتلوه على جزمته
فانا شريكه ف رميته
يالله اقتلوني لأني ناوي أعملها
واديها كرسي ف كلوب الليلة.. واعملها
مادام في إيدي القلم وفي رجلي نعليّا
أنا اللي حب.. وعصى
ومادام في بيتي عصا
حنزل واحارب وأنزف في الشوارع موت
واتلم عالناس اللي تشبهني ف حارات وبيوت
وندش جيش الظالمين بالطوب
إحنا الكثير.. احنا الشجر والحصى
والزرع، وسيور المكن والزيت
وصدى العنابر والمطر والريح
إحنا التراب والعاصفة ولعب العيال في المرج
إحنا الخيول اللي جامحة بدون لجام ولا سرج
إحنا النواحي والنواصي وريحة الكشري
إحنا التلامذة واحنا الورشة والصبيان
إحنا الخنادق وصرخة عسكري غلبان
واحنا جميع الحاجات يا مصر يا عمري
ياللي ميلادك أزف مع مولد الإنسان
غني عشان تصحى الأمم دغري
فيضي على الأرض الشراقي حنان
واديني طميك من جديد اتوضى بيه
خليني اسيب التابوت وأنط من قبري
واطلع على ملوك البقر بالفاس
ياللي انت علمتيني إسمي.. وحب كل الناس
الحب مش هو المياصة يا ناس
الحب مش مسك الإيدين وخلاص
الحب حب الناس وناس الناس
ما يحسه غير اللي كارمه ربه بالإحساس
راضية عليه تربة امه وابوه.. يا إبن الناس
مش حب غنج ولوع وفي القلوب أنجاس
الحب حب الحياة.. حب البشر والطين
حب الحاجات البريئة وشهوة البساتين
ده الحب هو لوحده الفلسفة والدين
واللي يا عيني ما يعرفوش.. ما يكونش ناس

22 comments:

MaNoO said...

استغربت من الاسم أول مابدات فى القراءة واندمجت فى الكلام ونسيت العنوان تلخيص لكل حاجة كلام خيالى سهل ممتنع اسلوب رائع والله مابعرف اجامل عشان اجاملك يااااااااه قلبت حاجات كتير أوى عزة وكرامة واحساس بالفخر والعجز بالفخر ان مصرى ابن الفراعنة زى مابيقولو وبالعجز انى مش عارف حتى افكر اعمل ربع اللى عملوه بس انا برده متفائل وهفضل زيك كدا متفائل طالما العصا فى بيتى زى ماقلت
والحب اللى انت وصفته هنقول انه قل أوى بس ماانتهاش الحب اللى فعلا للناس ومن الناس بدون اى شىء الحب اللى الحياة نسيتنا معناه ومواصفاته الحب اللى بيخلينى اساعد حد فى الشارع وانا معرفوش يخلينى اتهز لو حد من ديانتى او امتى نزف قطرة دم

ابدعت وتفوقت على نفسك احساس رائع واسلوب اروع تقبل مرورى المتواضع واتمنى التواصل الدائم

الخبز و الحرية said...

شكرا جزيلا يا مانو..
انا متفائل لاني مؤمن بالانسانية رغم كل شرورها.. حاسس انها زي البني آدم ليها مراحل عمرية.. دلوقتي هي في آخر أطوار المراهقة وعشان كده عمالة تخبط جامد ولسه فيها أنانية ومكابرة.. أول ما تبلغ سن الرشد حتبقى الحياة على الأرض متعة..
بشوف ان البشريةفي مأزق دائم هو تسلط الانسان على الانسان واللي هو المعبر لكل الشرور.. طول ما حد ماسك حد من زوره بأي طريقة، طول ما البشرية بتراهق.. سن الرشد بتاعها في رأيي يوم ما تبقى العلاقات مبنية على التعاون الحر المنظم مش على الاستعباد بكل أشكاله.
تحياتي:)

أم مريم said...

الحب مش مسك الإيدين وخلاص
الحب حب الناس وناس الناس
ما يحسه غير اللي كارمه ربه بالإحساس
يآه....بتجيب الكلام ده منين؟
فعلا مايحس الكلام ده غير اللي عنده إحساس
بس هو فين الاحساس عند الناس الباردة اللي قلوبها تلج وعيونها زجاج
ده اللي شافته عينينا الكام يوم اللي فاتوا يدوب قلب الحجر لكن في عالمنا ناس حتى الحجر أحن منهم
من إبداع لإبداع يا فنان
دايما كلامك بيلمس الوتر الحساس في قلوبنا
خالص تقديري و احترامي لك ولقلمك

!!! عارفة ... مش عارف ليه said...

الفيلم كله مناظر.. قصته بكابورت
أبطاله ناس قد جدي.. لابسين فانلة وشورت
بينافسوا أحمد عز والسقا على النيولوك
والصبغة تحفة ومعجزة مبعوتة من نيويورك
جايين يبيعوا الهرم والنيل وصوت الست
ما لهم عزيز في البلد دي، لا ولد ولا بنت
-----------------

وعجبي

ساره said...

الله عليك ياخالد
والناس تلومنا فى حبك ... انت قمه الانسانيه والاحساس
كفايه انك بتطلع اللي جونا ..... ساعات الواحد بيخونه التعبير لما يقعد يقراء لك يحس انه هذا اللي يبي يقوله
وانا من المؤمنين بجملتك هذه وان كانش اخوك يوجعك.. ملعون أبو الأسرة
الله يحفظك امين

Unknown said...

اولا يعنى أيه ( دوشجى ) ؟

----------
(لا تقول فراعنة ومن كام ألف والأثارات
إحنا ولود النهارده واللي فات أموات )

الحتة دى لوحدها بصراحة تستاهل عليها جايزة
أيوة كده أخيرا شاعر يعترف أن الهرم و أبو الهول حضارة أى نعم و النيل نعمة ربنا ميز بيها مصر و الفول مدمس كويس للصحة
بس يعنى دول مش هم الى هيرفعوا علم العروبة عشان نعد طول حياتنا كده اجيال و را اجيال نشعر و نغنى فيهم

ده حتى عبد الحليم لو كان عايش كان هيبطل يغنى للسد العالى و المصانع و المزارع
:)
لأنه كان فنان مواكب و متجدد
------------

( علشان بحبك وقاطع بيّ في الكسرة
وان كانش اخوك يوجعك.. ملعون أبو الأسرة )

تمام

مش عارفة احنا مكسلين نتحد و نبقى ايد واحدة حتى فى الدعاء حاجة بسيطة لا هتعرضنا لخطر و لا يحزنون و عاوزين ربنا ينصرنا

بأمارة أيه ؟

-------------------

( أنا جاي أجرّس في إيدي فردتين باتا
ثورة نعال وابتدت من شاب بغدادي
رمى عالصنم برجولة في دنيا شحّاتة
تتوسل اللقمة من بق الكلاب عادي
وان تقتلوه على جزمته
فانا شريكه ف رميته )

البيتين دول أجمل ما كتبت عن الزيدى حتى الأن
أتأثرت بيهم أكتر من الى قبلهم

----------------
( الحب حب الحياة.. حب البشر والطين
حب الحاجات البريئة وشهوة البساتين
ده الحب هو لوحده الفلسفة والدين
واللي يا عيني ما يعرفوش.. ما يكونش ناس )

الحزء ده وهمى

---------------

الحقيقة المجموعة دى كلها أنا حساها حصة فى تدريس كيفية ذرع بذور الحب و الخير و الأنسانية

الى يقراها يحب يتبع الخطوات و يسقى البذور كويس و يملا المشتل من زهورهم
:)

Anonymous said...

أحببت هذا
"جايين نعزي ونضحك
أصل المهرج مات"
صورة تعبر تماما عن الوضع الحالي للعالم
بكل ما يحمله من تنا قضات و مفارقات
فهمت صييت، ندهجي و لم أفهم:دوشجي!!

Anonymous said...

الحب حب الناس وناس الناس
ما يحسه غير اللي كارمه ربه بالإحساس

الحب حب الحياة.. حب البشر والطين
حب الحاجات البريئة وشهوة البساتين

تعبيرات حضرتك صادقة جدا و أسلوبك رائع

أتمنى انه ييجى اليوم اللى
الانسانية تتخلص فيه من الظلم و الأنانية والشر

تحياتى لحضرتك

فتاة مصرية

Zeina Ramadan said...
This comment has been removed by the author.
أميرة said...

كلماتك أكثر من رائعة و قمة فى الذكاء ....
لأنها بتعرف إزاى توصل لقلوب الناس
وتمس مشاعرهم وإحساسهم
وتجبر اللى مش شايف إنه يشوف ويفتح عينيه كويس

أرق تحياتى ليك ولقلمك

الخبز و الحرية said...

أم مريم أظن اليأس والتخبط هما ما وراء الصمت الظاهري.. طبعا فيه قلة من البشر بتتعرى ساعة الكوارث وتظهر احط ما في الإنسانية من أنانية وطمع ولا مبالاة وقسوة.. بس الغالبية لا.. اليأس والتخبط هم اللي بيعوقوهم عن التحليل واختيار طريق أو حتى عن التعبير، والتأثير بالتالي بيبقى صفر.
عارفة وسارة وفتاة مصريةوأميرة متشكر جدا:)
عاليا وروز دوشجي يعني بتاع دوشة:)
زينة فهمت تحليلك للفكرة بس مافهمتش إحساسك بالقصيدة ايه:)

MaNoO said...

حلو أوى أوى تشبيهك بس وان النسانسة هتوصل لسن الرشد فى يوم ما بس برده بنشوف ان فى بنى ادمين بيوصلوا لشن الرشد ومش بيتعلموا من اخطاء المراهقة ولا بيحاولوا يصلحوها هل فكرك ان الانسانية هتقدر تعدى عقبة زى دى

سامحنى ان زدت فى التعليقات بس الحوار ممتع وادينا بنستفيد

Anonymous said...

هى اه ممكن تكون الانسانية لسة فى مرحلة المراهقة زى ما بتقول و لسة بتتخبط و ده احساس متفاءل نوعا بس انا شايفاها مراهقة مريضة مضطربة مشتتة و كمان ميولها انتحارية ؟ يعنى مش باينلها رشد ولا علاج

وينكى said...

:')

esraa mohamed saleh said...

الله الله الله بجد أنت مش بسممثل رائع بجد ماشاء الله فنان شامل كلمات زى الرصاص فى محلها تستاهل ميت نوبل مصر بخير طول ما انت فيها يا خالد انا كنت فاكرة انى بكتب شعر بس ده طلع كفتة بجد ربنا يحميك

Basma Tharwat said...

بحبها اوى القصيدة دى
رائع ياخالد

leeno said...

انا جيت اعمل كوبي للمقاطع اللي حبيتها من القصيدة لقيتني حكرر معظمها بصراحة فقلت بلاش

خالد قصايدك بالرغم من انها بتوجع و دة لأنها بتحك الجرح لكن مقدرش ما استمتعش بيها و انا بقراها و احبها و احب اتابعها كمان !

بس تفتكر يا خالد ان مش دة حال الانسان من زمان و التاريخ هو هو بس باشكال و اسماء و مبرات مختلفة ؟

طب ليه على مر التاريخ بنتوجع و نثور و نقول اشعار طالما هو دة حال الانسان؟

و لا الانسان دة فطرة مع انه بيخرج عنها لكن بيفضل بيحبها و يحنلها ؟

yassoo said...

لا تقول فراعنة ومن كام ألف والأثارات
إحنا ولود النهارده واللي فات أموات
إصحالي حبة الحكاية أصل باظت طحن
طرطألي ودنك لأمسك فيها وأزمّر
يا تصحّي روحك يا إما ف بعض حنكسّر
علشان بحبك وقاطع بيّ في الكسرة
وان كانش اخوك يوجعك.. ملعون أبو الأسرة
.....


الفيلم كله مناظر.. قصته بكابورت
أبطاله ناس قد جدي.. لابسين فانلة وشورت
بينافسوا أحمد عز والسقا على النيولوك
والصبغة تحفة ومعجزة مبعوتة من نيويورك
جايين يبيعوا الهرم والنيل وصوت الست
ما لهم عزيز في البلد دي، لا ولد ولا بنت
مماليك يخونوا بعضهم مع بعضهم
....
الحب مش هو المياصة يا ناس
الحب مش مسك الإيدين وخلاص
الحب حب الناس وناس الناس
ما يحسه غير اللي كارمه ربه بالإحساس
راضية عليه تربة امه وابوه.. يا إبن الناس
مش حب غنج ولوع وفي القلوب أنجاس
الحب حب الحياة.. حب البشر والطين
حب الحاجات البريئة وشهوة البساتين
ده الحب هو لوحده الفلسفة والدين
----------------------------
لا ده مش جميل!!

ده اكتر من رائع
ماسبتش حاجة الا لما اتكلمت فيها
وفي كلام بالعامية( طرطألي..) وفي بعض الكلمات المنتشرة اوي الايام دي زي( طحن..)
بجد صعب الاقي كلام اقوله عشان مهما قلت مش هديك حقك..
بس اقولك انك بارع واني بستمتع لما بقرا القصائد الجميلة دي

yassoo said...

واعتقد ومعرفش صح ولا غلط ياعاليا ان دوشجي من الدوشة ..
وياريت نعرف الصح فين

وتحياتي

alia said...

عرفت خالد الصاوي ممثلا رائعا ولكنى تفاجات عندما وجدته مفكرا يفلسف السهل الممتنع ويغنى كلماته بطرب اصيل لا تستطيع معه ان تتوقف عن التحليق فى معانيه
وصدق اذا لم نكن نعرف ماهو الحب الحقيقي كيف نستطيع ان نكون احرارا و نبنى اجيالا واوطانا فى زمان بات التكالب على الكرسى والمال والسلطه هو الهدف وليس عزه الانسان وعزه الاوطان
هنيئا للاستاذ الصاوي ابداعه

hamza soud said...

وصف رائع ومعبر للحب اللذي عجز عن وصفه الكثيرين ولكنه بدأ يغيب بين الناس ولكنه موجود ,فقط للنفض قلوبنا عن الغبار اللذي اثقله ونفكر في الحب ومعناه السامي نجده في حياتنا وفي قولبنا
شكراا خالد على القصيده الرائعه

Rana said...

الكلمات رائعه جدااا واحساسك رائع
أنا عاشقه لقصائدك ومؤلفاتك وطبعا تمثيلك الراقي المقنع
انا فخوره ان في بلدي مبدع زي حضرتك
الى الأمام دائما أيها المبدع الراقي